Japan Kalaallit Nunaanni ataqqinaammik sinniisoqalissasoq

Inooraq Brandt Japan sinnerlugu Kalaallit Nunaanni ataqqinaammik sinniisunngussaaq.

Nunanut allanut ministereqarfik taama allappoq.

Inooraq Brandt Rambøll Grønlandimi pisortaaneruvoq. Rambøll danskit illussanik titartaasartunik, ingeniørinik siunnersortinillu suliffeqarfigisaat nunarsuaq tamakkerlugu ingerlatsivoq.

DTU-mi sanaartornermik ingeniøritut bacheloritut kandidatitullu ilinniagaqarami geofysikimik immikkut ukkataqarsimavoq.

Inooraq Brandt 2025-mi oktobarimi Royal Arctic Linep siulersuisuini siulittaasunngorpoq. Siornatigut siulittaasup tulliusimalluni Pâviâraq Heilmann taarserpaa.

Inooraq Brandt aamma Sulisitsisut Peqatigiiffianni Teknikkikkut Siunnersuisartunut Ataatsimiititaliami ilaasortaavoq.

Ataqqinaammik sinniisunngortoq atorfittaava pillugu Sermitsiap oqaaseqartinniaraluarpaa, iluatsinngilarli.