Jeff Landry: Kalaallit periarfissarujussui 

Trumpip Kalaallit Nunaannut immikkut aallartitaa Louisianami guvernøri Jeff Landry, USA-p Kalaallit Nunaatalu attaveqatigiinnerat nikittorsarneqarnissaa pingaaruteqartoq, USA-milu naalakkersuisut siuliisa Kalaallit Nunaat soqutigisimanngikkaat, Sermitsiamit apersorneqarnermini oqarpoq. Trumpip siuttunngornerani tamanna allanngorpoq, Kalaallit Nunaanniillu nuannaarutigineqartariaqartoq, Jeff Landryllu oqaatigaa.

USA-p præsidentiata "big poorly run, piece of ice" (sermiminersuaq aqunnerlutaq aaqq.)  ilaatigut oqaatiginikuuaa. Ulluni marlunni tamaaniinnerit aallaavigalugu, oqaaserisaa isumaqatigaajuk?

– Isumaqarpunga isumalluuteqarnermiit namminiilernissamut arlalialunnik pitsaasunik periarfissaqartoq. Allaanngilaq nuna tamanna aningaasaqarnikkut Danmarkimik isumalluuteqartoq. Isumaqarpungalu USA-mi præsidentip nuna tamanna aningaasaqarnikkut kiffaanngissuseqalersikkumagaa. Tamannalu periarfissaasoq isumaqarpunga, Jeff Landry oqarpoq.

Trumpimut oqariartuut

Tikeraarnerup kingorna præsident Trumpimut suna anngutissaviuk?

– Innuttaasut tusarliussaat, inuussutissarsiornermilu siuttut oqaloqatiginerani paasisat anngutissavakka, Jeff Landry oqarpoq, Nuummi borgmesteriunikoq Nikolaj Heinrich marlunngornermi naapippaa, taassumalu saniatigut inuussutissarsiornermi Kalaallit Nunaani siuttut qulit naapillugit, taamaasillunilu USA-mi naalakkersuisut siuliisa Kalaallit Nunaat qanoq soqutigisimanngitsigineraat ersarinnerusumik takusinnaalerpaa.

– Qasseriarmita USA-miit Europamiillu atorfilittat qaffasissut Kalaallit Nunaannut tikittarpat, qasseriarmita atorfilittat qaffasissut Kalaallit Nunaat oqalugiaamminni eqqaasarpaat? Nikolaj Heinrich tamanna pillugu apeqquteqarfigaara, taassumalu "taamaattoqanngisaannartoq" akissutigaa - 88-inik ukioqarnera eqqarsaatigissagaanni sivisoqaaq, Jeff Landry oqarpoq, USA-lu Trump siuttunngornerata kingorna Kalaallit Nunaannut aningaasarsiornikkut aatsaat taama pitsaatigisumik periarfissiisoq tikkuarlugu.

Niuernermut aqqutit toqqaannartut

USA-p Kalaallit Nunaannut aningaasarsiornikkut periarfissat sooorpiaanuku pilersissinnaagai?

– Siullertut USA-p Kalaallit Nunaatalu akornanni toqqaannartumik niueqatigiinneq pilersinneqarsinnaavoq, isumaqarpunga United (timmisartuutileqatigiiffik aaqq.) aasaanerani toqqaannartumik timmisartuussinerit aallartissagaat, tamannalu ataavartumik pilersitsisoqarnissaanut aqqutissiuisinnaavoq.

– Qularinngilara præsidentip tamanna paasissagaa periarfissallu taakku nukittorsarnissaannut peqataajumaartoq. Apeqqutaaginnarpoq præsidentinngortussap tulliata suliaq tamanna ingerlatiinnassaneraa. Kalaallit innuttaasut paasisariaqarpaat præsident Trump ataavartumik aaqqiisuteqartoqarnissaanik kissaateqarmat, taamaalilluni præsidentinngortussat Kalaallit Nunaat sumiginnarsinnaajunnaassavaat, Landry oqarpoq.

Kalaallit Nunaat sanileraarput

Præsidentilu marluullusi killeqarfiit naalakkersuisut eqqartugaat ataqqivisigit?

– Killeqarfik uagutsinnut ataasiinnaavoq. Aappaluttoq, qaqortoq tungujortorlu. Eqqaamasariaqarpat Kalaallit Nunaat nunarsuup kitaata killigusaaniinnera pissutigalugu, præsidentip Kalaallit Nunaat pingaartimmagu. Præsidentip aalajangiusimavaa nunat nunarsuup kitaata ilaaniittut eqqortumik isumannaallisaanermik aningaasaqarnikkullu periarfissaqarnerat qulakkeerneqarnissaat, tamannalu USA-mut attaveqarnermik pilersitsillunilu nukittunerulersitsissammat. Isumaqatigiissut Monroe naapertorlugu USA pissaanilissuuvoq, nunanik eqqaamiuminik taakkualu innuttaasunik isumaginnittussaq.

Namminiilivinneq

Nunammi taakku inuisalu tamanna kissaatiginngippassuk? Kalaallit Nunaanniimmi USA-mik suleqateqarusunneq oqaatigineqarnikuuvoq, taamaattorli USA-mit nunanilluunniit allanit aqulerneqarnissartik kissaatiginagu.

– Utaqqilaanngualaarit. Aperilaarlakkit. Kalaallit Nunaata Islandituut aningaasaqarnikkut inissisimalluarluni USA-mut attaveqarluarluni iliorsinnaannginneranut tunngavissaqarunanngilaq. Kalaallit Nunaat aningaasaqarnikkut taamatut imaluunniit pitsaanerusumik inissisimalluni namminiilivissinnaasoq isumaqarpunga.

Trump suleqatigiinnissamik ammaassivoq

Naalakkersuisuni ilaasortat ataatsimeeqatigigakkit qanoq oqarpat?

– Ataqqeqatigiilluni oqaloqatigiinnissaq kissaatigalugu oqarput. Aamma USA-p Kalaallit Nunaatalu akornanni Trumpi sioqqullugu attaveqatigiinneq eqqartorparput, tassanilu “Kalaallit Nunaat suleqatiserinnilluni saaffiginnissimagaluartoq akineqaranilu” oqaatigineqarpoq. Trump suleqatigiinnissamik ammaassivoq, taannalu aallartilluarnersoq isumaqarpunga. Kalaallit Nunaat nammineernerusoq kissaatiginerissi apeqqutaaginnalerpoq. Nammineq aalajangiisinnaaneruneq? Qitornassinnut periarfissat amerlanerusut? Peqqinnissaqarfimmut tunngasuni periarfissaqarneruneq? Umiarsuaq napparsimmavik aaqqiissutissaagunanngilaq, taamaanngippammi aaqqiissutissamik isumassannik apuussivigisinga. Taamatut oqarfigaakka.

Teqqiallit MAGA-mik allaqqasut

Teqqiallit "Make America Great Again"-imik allaqqasut nassarpatit. Agguaappigit? Aningaasat sukkulaat aamma agguaakkassigit?

– Sukkulaajunngillat. Aningaasanuku ammajuitsussat meeqqanut nammineerlunga tunniukkikka. Aamma teqqialinnik nassarpunga, inunnulli nammineerlutik piumasunut tunniullugit. Oqarfigilakkit aat. Nunarsuarmi sumiiffinni allarpassuarni teqqiallit taakku piumaneqartorujussuupput. Nalunngiliuk sooq? Kiffaanngissusermut periarfissanullu takussutissaammata. USA-p tamanna tunngavigaa. Uagoqanngitsuuppat tamassi qallunaatut oqalunnasi tyskisut oqalussimassagaluarpusi. Europami nunap sakkutuulersornikkut nunamik allamik tiguaanani aniguisitsinikuua? Nunarsuup kitaatungaani taamaattoqarnikuunngisaannarpoq.

USA-mili nunap inoqqaavi aamma naqisimaneqartarnikuupput?

– Taanna pimoorullugu eqqartorusuppiuk? Ilimaginngilara.

Præsidentip aalajangissagaa

Danmarkimi aallartitaqarfik Nuummilu sinniisoqarfik Kalaallit Nunaannik suleqateqarnermut tunngatillugu isumaqataaffigaajuk, suleqatigiissitaliallu pilersinneqartoq qanoq isigaajuk?

– Ataaseq kisimi isiginiarneqartariaqarpoq, tassalu præsidenti. Taanna suleqatigiissitanik pilersitsivoq, aalajangiitinnani inuit assigiinngitsut qanoq isiginnittaaseqarnersut kaammattuuteqarnersullu tusaqqaarusuttarpai. Suleqatigiissitat tatigilluinnarunigit, taakkualu apuussaat naammaginagit, taava paasissutissanik tamakkiisumik pissarsisimanerluni ilisimassanngilaa. Qularinngilara aallartitaq oqaloqatigisimassagaa, aallartitallu suleqatigiissitaniittut oqaloqatigissavai. Præsidentimut periarfissat pillugit, kalaallinut piviusuulluinnartutut isigisakka anngutissavakka. Taava susoqarumaarnersoq taassuma aalajangissavaa, Landry oqarpoq.