Jens-Frederik Nielsen eqqartuussivilersuussiniaanermut: Múte B. Egedep oqaaseqarsinnaanini pisinnaatitaaffigaa

Danmarkimi Kalaallit Nunaat pillugu ministeriunikoq kingulleq Tom Høyem, Naalakkersuisut siulittaasorisimasaat Múte B. Egede (IA) eqqartuussivimmut suliassanngortinniarpaa.

Múte B. Egedep kalaallinik niviarsiaqqanik arnanillu spiralilersuinikuuneq Danmarkimiit inuiannik toqoraanertut decembarimi taavaa, taamatulli oqarnera eqqartuussivimmut suliassanngortinniarneqarpoq.

Tom Høyem Danmarkimi Kalaallit Nunaat pillugu ministereqarfiup 1987-imi atorunnaarnissaata tungaanut kingulliulluni ministeriuvoq. Ukiuni tallimani tassani atuuffimmi akisussaasuulluni.

Naalakkersuisut siulittaasuata Jens-Frederik Nielsenip (D) Múte B. Egede isummersinnaatitaasoq tusagassiuutitigut nalunaarummi erseqqissarpaa.

- Tamat oqartussaatitaanerani ammasumik annernarsinnaasunik eqqartuisinnaasariaqarpugut.

AAMMA ATUARUK

Eqqartuussivik sioorasaarutaareersorlu:
– Nipangiunnavianngilakka

- Múte B. Egedep oqaaseqarsinnaanini pisinnaatitaaffigaa – inuit ataasiakkaat soorlu qallunaat nunaanni ministeriusimasut misigissusaat aallaaviginagit, Jens-Frederik Nielsen oqarpoq.

Ilisimasalinnik misissuiffigineqarnera utaqqineqartoq

Naalakkersuisut spiralilersuinermut suliaq, ilaatigut inuit pisinnaatitaaffiinut tunngasortaa, qulaajartippaat. Qulaajaaneq 2026-p naanerani naammassineqassasoq naatsorsuutigineqarpoq.

Jens-Frederik Nielsenip ministeriunerullu Mette Frederiksenip (Socialdemokraterne) arnat piumassuserinngisaminnik naartunaveersaaserneqarsimasut septembarip naanerani utoqqatserfigaat.

Tamatuma kinguninngua Sermitsiap tusagassiortunik katersortitsinermi Jens-Frederik Nielsen, Múte B. Egedep inuiannik toqoraarneruneraalluni oqaaserisimasai pillugit, aperimmani ima oqarpoq:

- Tamanna pillugu isummersuutit amerlaqaat. Maannakkut inuit pisinnaatitaaffii pillugit misissuineq ingerlanneqarpoq. Taannalu naammassippat aamma iliuuseqarfigisariaqassavarput.

Taamatut oqarnikuunini tusagassiuutitigut nalunaarummi maanna uteqqippaa. Spiralilersuisimaneq inuiannik toqoraanerusimasutut nalilerneqarsinnaanersoq massakkut ilisimasalinnik misissuiffigineqarnerata naammassinissaa Naalakkersuisut utaqqigaat nalunaarutigineqarpoq.

Nipangiunnavianngikkaa

Naalakkersuisut politikkikkut oqariartuutit eqqartuussivilersuunneqarnissaasa sioorasaarutigineqarnera ernumanartoqartippaat. Naalakkersuisut Tom Høyemip sammisami toqqaannartumik pineqanngitsoq isumaqarput. Isornartorsiorneqartut tassaapput iliuuserineqarsimasut aammalu naalagaaffiup inissisimaffigisimasaa – inuit ataasiakkaat pineqanngillat.

Naalakkersuisut inuiaqatigiittut oqaluttuarisaanermut aammalu politikkimut tunngasunik oqallittoqarsinnaanera pingaartippaat, ilaatigut eqqartuussivilersuussinissamik qunusaarisoqarani Danmarkip Kalaallit Nunaannut politikkia oqallisigineqarsinnaasariaqarluni.

- Oqaluttuarisaanermut imaluunniit politikkimut tunngatillugu isummagut annissinnaanngikkutsigit, suna tullinnguuppa? Nipangiinnassaagut naak ajortoqaraluartoq isummagut anniseqqusaanagit? Jens-Frederik Nielsen aperaaq.

Tom Høyemip Múte B. Egede eqqartuussivimmut suliassanngortinniarlugu eqqarsaatigalugu Politikenimut oqaaseqareersorlu Múte B. Egedep Facebookikkut saqqummiussilluni taanna qisuariarfigaa.

- Spiralilersuisimaneq pillugu oqaatigisimasakka sioorasaarneqarnikkut utertinnaviarnagillu nipangiunnavianngilakka. Taamaaliuinnarsinnaasorineq qangarsuarli qaangiutereerpoq. Oqaatigisimasakka aamma inunnut ataasiakkaanut tunnganatik, danskit naalagaaffiannut tunngassuteqartuaannarnikuupput.

- Taamaammat qanorluunniit pisoqarnissaanut piareersimavunga, oktobarip 14-iani allappoq.