Jens-Frederik Nielsen: Nunarput, Danmark USA-lu isumaqatigiissuteqarput

Naalakkersuisut siulittaasuat Jens-Frederik Nielsen ministeriunerlu Mette Frederiksen ataatsimoorlutik tusagassiorfinnut nalunaarummi uppernarsarpaat USA-mik isumaqatigiissuteqartoqartoq, isumaqatigiissutigineqarluni Issittumi kiisalu Atlantikup avannaani sillimaniarneq nukittorsarneqassasoq.

Naalakkersuisut siulittaasuat Jens-Frederik Nielsen aamma ministeriuneq Mette Frederiksen ataatsimoorlutik tusagassiuutinut nalunaarummi uppernarsarpaat Kalaallit Nunaata, USA-p Danmarkillu akornanni isumaqatigiissuteqartoqarsimasoq, isumaqatigiissullu sapaatip akunnerata tulliani atsiorneqarnissaa naatsorsuutigineqartoq. Uani assimi EU-mi kommissionimi siulittaatoq Ursula von der Leyen nikorfaqatigaat.

Foto: Oscar Scott Carl

KASSAALUK KRISTENSEN KASSAALUK KRISTENSEN Nittartakkami aaqqissuisoq

Saqqummersinneqarpoq 18. Septembari 2026 - 21:29

Ussassaarut

USA-p Kalaallit Nunaata Danmarkillu akornanni aaqqiagiinnginneq qaangiuppoq.

USA-p, Kalaallit Nunaata Danmarkillu akornanni tallimanngornermi unnukkut isumaqatigiittoqarpoq.

Kalaallit Nunaata, Danmarkip USA-llu Issittumi Atlantikullu avannaani isumannaallisaanerup nukittorsarneqarnissaanik isumaqatigiissummik sapaatip akunnerata tulliani atsiornissaq naatsorsuutigaat.

- Nuannaarutigaarput nunatta, Kunngeqarfiup Danmarkip, USA-p nunallu killiit iligiit isumaqatigiissutigisinnaammassuk sillimaniarnerup nukittorsarnissaa. Isumaqatigiissummi Kalaallit Nunaata soqutigisai nunanilu tamalaani suleqatigiinnermi inissisimaffia akuerineqarput. Tamatsinnut iluaqutaavoq, Naalakkersuisut siulittaasuat Jens-Frederik Nielsen (D) tusagassiuutinut nalunaarummi oqarpoq.

Januaarip 14-ani 2026-mi Kalaallit Nunaat, Danmark USA-lu suleqatigiissitaliorput nunat taakkua akornanni isumaqatigiissusiortoqarnissaanik siunertalimmik. Suleqatigiissitaliap nunat tamarmik akuerisinnaasaannik sinaakkutissat qulakkeerniarpai. Tamanna sioqqullugu, kingornalumi, USA-p præsidentiata Donald Trumpip “nunap isumannaatsuunissaa” pissutigalugu Kalaallit Nunaata aqunnissaanik arlaleriarluni kissaateqartarpoq.

Ussassaarut

Sapaatip-akunnerani tulliuttumi atsiorneqartussaq

Ministeriunerup Mette Frederiksenip (Soc.) isumaqatigiissut aamma nuannaarutigaa:

- Nuannaarutigaara Kalaallit Nunaata, Kunngeqarfik Danmarkip USA-llu akunneranni pitsaasumik isumaqatigiissuteqartoqarsinnaanera qanillimmat. Isumaqatigiissut Issittumi Atlantikullu avannaani ataatsimut isumannaatsuunermik nukittorsaataassaaq taamaalillunilu NATO-mut Europamullu iluaqutaassalluni. Aammattaaq isumaqatigiissut kunngeqarfiup kisimi oqartussaaneranik nunallu immikkoortuanik ataqatigiinneranik kalaallillu namminneq aalajangiisinnaatitaanerannik akuerinnittuuvoq, Mette Frederiksen oqarpoq.

Præsidenti uppernarsaavoq

Donald Trump Truth Social-imi allappoq Danmark, USA Kalaallillu Nunaat Kalaallit Nunaat pillugu isumaqatigiissuteqarsimasut, tassanilu „sillimaniarnermut tunngatillugu USA aqutsisussanngortinneqartoq“.

- Nuannaarutigalugu nalunaarutigisinnaavara USA Kunngeqarfiullu Danmarkip Kalaallit Nunaatalu isumannaallisaanermik ataavartumik aqutsisinnaanngortitsisumik isumaqatigiissuteqarfigigatsigu, USA-p præsidentia Donald Trump ilaatigut allappoq.