Jens-Frederik Nielsenip Bentiaraq Ottosenip akisussaaffii tigugai
Isumaginninnermut, suliffeqarnermut, nunamut namminermut avatangiisinullu tunngasut agguarneqarnerat Inatsisartuniit akuerineqarnissaata tungaanut Naalakkersuisut siulittaasuata akisussaaffigilerpai.
- Naalakkersuisut Siulittaasuattut kissaatigaara Naalakkersuisup pineqartup tunuarniutaa ataqqineqassasoq tusaatissatullu tiguneqassasoq. Naalakkersuisut Siulittaasuattut qulakkiissavara suliassaqarfiup eqqortumik ingerlanneqarnissaa, Jens-Frederik Nielsen oqarpoq.
Assi: Oscar Scott Carl
Isumaginninnermut, suliffeqarnermut, nunamut namminermut avatangiisinullu naalakkersuisoq Bentiaraq Ottosen (A) ippassaq tunuarmat allamik atorfissaqartitsisoqalerpoq.
Akisussaaffiit agguataarneqarnissaat Inatsisartunit akuerineqarnissaasa tungaanut, Naalakkersuisut siulittaasuata Jens-Frederik Nielsenip (D) akisussaaffigissallugit maanna nalunaarutigaa.
Naalakkersuisut siulittaasoqarfiat tusagassiuutitigut taama nalunaaruteqarpoq.
- Naalakkersuisut Siulittaasuattut kissaatigaara Naalakkersuisup pineqartup tunuarniutaa ataqqineqassasoq tusaatissatullu tiguneqassasoq. Naalakkersuisut Siulittaasuattut qulakkiissavara suliassaqarfiup eqqortumik ingerlanneqarnissaa, Jens-Frederik Nielsen oqarpoq.
Allamik naalakkersuisunngortoqassanersoq, naalakkersuisut nikisititerneqassanersut, imaluunniit susassaqarfiit maanna Naalakkersuisunut ilaasortaareersunut agguaanneqassanersut ilisimaneqanngilaq.
Inatsisartut ukiakkut ataatsimiinnerat ullumi tallimanngornermi novembarip 14-ianni naggataarpoq. Ukiukkut ataatsimiinnerat 2026-mi februaarip pingajuanni aallartissaaq.
Bentiaraq Ottosen nittartakkatigut sulisussarsiortarfimmut suliniut pissutigalugu tunuarpoq. Suliniummut suli aningaasaliisoqanngitsoq sulineq aallartinneqarsimanera tamatumunnga pissutaavoq.
