Jens-Frederik Nielsenip Naalakkersuisuni qanoq pisoqassanersoq saqqummiussinnaanngikkaa

Bentiaraq Ottosen isumaginninnermut, suliffeqarnermut, nunamut namminermut avatangiisinullu naalakkersuisutut tunuarpoq. Naalakkersuisut nikisititerneqarnissaannik tamanna kinguneqassaaq.

Naalakkersuisut martsip naanerani saqqummiunneqarput. Taamaasilluni qaammatit arfineq-marluk naalakkersuisuutitaqartoqareersorlu nikisiterisoqarsinnaanera qaqinneqarpoq.

Naalakkersuisumik nutaamik ivertitsisoqassanersoq, nikisititerneqassanersut suliassaqarfiiluunniit Naalakkersuisunut ilaasortanut allanut agguaanneqassanersut, Naalakkersuisut siulittaasuata suli oqaatigisinnaanngilaa.

AAMMA ATUARUK

Bentiaraq Ottosen: Akisussaaffik tamakkiisoq uanniippoq

- Soorunami allannguisoqassaaq, taamaaliornissarlu tikikkumaarparput. Bentiaraq Ottosen naalakkersuisutut tunuarniarluni aalajangerpoq, tamannalu soorunami akueralugu tusaatissatut tiguara, Jens-Frederik Nielsen Sermitsiamut oqarpoq.

Bentiaraq Ottosen Atassummi kisiartaalluni Naalakkersuisuni ilaasortaavoq. Naalakkersuisunngortitseqqinnissartillu ammaffigalugu Bentiaraq Ottosenip Sermitsiamut siusinnerusukkut oqaatigaa.

Atassut naalakkersuisunngortitseqqinnissamut piareersimapput. Tamanna qanoq isumaqarfigaajuk?

- Isumaqatiginninniarnerit taamaattut tusagassiuutitigut saqqummiunneqarneq ajorput. Naalakkersuisut siulittaasuattut oqaatigisinnaasatuara tassaavoq Naalakkersuisoqarfiit inatsit malillugu agguataartussaanerat, taannalu malillugu sulissaagut, Jens-Frederik Nielsen oqarpoq.

Suleqatigiilluartoqarpoq

Bentiaraq Ottosenip nittartakkatigut sulisussarsiortarfimmut suliniut aningaasaliiffigineqarani ingerlasimanera tunuassutigaa.

Suliaq taanna pillugu ippassaq ammasumik isumasiortoqarpoq. Jens-Frederik Nielsenili taanna pillugu oqaaseqarusuppallaanngilaq:

- Suliassaqarfimmi tassani naalakkersuisoq tunuarniarluni aalajangerpoq, tamannalu tusaatissatut tigullugu sulineq tassanngaanniit aallartissaaq.

Suliaq taanna Atassummik suleqateqarnermut sunniuteqarsimanersoq aperineqarami akissutaa paatsuugassaanngilaq:

- Partiit naalakkersuisoqatigiit sisamat suleqatigiilluarput. Aamma suliap matuma kingorna, tamannalu nuannaarutigaara. Inuiaqatigiit pitsaanerpaamik aaqqiissutissarsiornissap suleqatigiissutiginissaa pisariaqartippaat, suli taanna attanneqarpoq, tamannalu nuannaarutigaara, Jens-Frederik Nielsen oqarpoq.

Naalakkersuisuini allannguutit qaqugu paasisaqarfigissavagut?

- Tamanna suli oqaatigisinnaanngilara, isumalluarpungali. Pisussaaffiga naammassissavara, tassalu suliassaqarfiit uanga atinniittut akisussaassilimmik naalakkersuisoqarnissaat aamma qanoq agguataarneqarnissaat. Agguataarneqassappatalu suleqatigiit akornatsinni nalilersortussaassavarput.