Jens-Frederik: Suliaq pillugu ilisimatinneqanngilagut

Naalakkersuisut siulittaasuat, Jens-Frederik Nielsen ullaaq iterami nutaarsiassatigut paasivaa amerikamiut præsidentiat, Donald Trump, nunatsinnut Kunngeqarfimmullu Danmarkimut tatisinini sakkortuseriaannarsimagaa, nunatsinnut immikkut aallartitaq toqqarlugu:

- Ullaaq iterama allat assigalugit nutaarsiassatigut paasivara amerikamiut præsidentiat nunatsinnut immikkut aallartitassamik toqqaasimasoq. Arlaannaatigulluunniit paasitinneqarnikuunngilagut amerikamiit immikkut aallartitassaq taanna pillugu qanoq pilersaaruteqartoqarnikuunersoq, taamaattumik allat tamarmik assigalugit paatsuungavunga susoqassanersoq, kisianni tusagassiorfinnit paasivara Trumpip nunarput tigusinnaajumallugu ikiortissaminik toqqaasimasoq.

USA marlunnik oqaqarpoq

Jens-Frederik Nielsenip aamma oqaatigaa misigisimalluni USA nunatsinnut tunngatillugu marlunnik oqaqartoq:

- Amerikamiut Danmarkimi aallartitaat, Ken Howery, qaammatip matuma aallartinnerani tikeraarmat, oqaloqatiginerani USA-p tungaanit paasinninnerarpoq nunatsinnit ersarissuliorfigigatsigu nunatta USA-p ataaniilersinnaanera kissaatiginngikkipput paasinnilluarnerarpoq ataqqinninnerarlunilu. Oqaloqatigiilluarpugut misigaangalu pissutsit ileqqumisut iliartoqqilissasut, Jens-Frederik Nielsen oqarpoq nangillunilu:

- Kisianni maannakkut misigisarput aallartitamik oqaloqatigiinnerup akerlerluinnaraa, tassami Trumpip qanoq iliornissani pillugu pilersaarutiminik ilisimatitsinikuunngilaq, aammalu qanoq siunertaqarnini pillugu nassuiaateqarnikuunngilaq, tassami oqaloqatigiissagaanni minnerpaamik marluusoqartariaqarpoq, taamaattoqanngilarli, Naalakkersuisut siulittaasuat oqarpoq.

Nunani allani aqutsisunit tapersersorneqarpoq

Jens-Frederik Nielsen ullup ingerlanerani nunani assigiinngitsuni aqutsisunit sianerfigineqartarsimavoq, tapersersuinerminnik nalunaaruteqartunik aammalu aammalu matumani pineqartumut atatillugu tamakkiisumik nunatsinnut tunuliaqutaallutik nalunaaruteqartunik.

USA nalinginnaasumik ikinngutaavoq, ikinngut tatigisinnaasaq aammalu ikinngut  suleqatitut naatsorsuutigineqarsinnaasoq. USA-p nunatsinnik "piginnittunngornissaa aqutsilernissaalu" pillugu sakkortuumik aallartimmalli, Kalaallit Nunaat Danmarkilu ataatsimoorlutik periarfissat tamaasa atorlugit erseqqissaatigisimavaat USA-mik suleqateqarneq aqqutigerusullugu, tamannalu ataqqeqatigiinnermik tatigeqatigiinnermillu aallaaveqassasoq. 

USA-p Kalaallit Nunaat tiguniarlugu piumasaqarnerminik sakkortuumik aallartimmagu, nunarsuarmi aqutsisut iligisat nunatsinnut Kunngeqarfimmullu Danmarkimut tapersersuinermik nalunaaruteqarput. Kisianni Trumpip USA-llu Kalaallit Nunaat Danmarkilu nunat tamalaat inatsisaat malillugit oqariartuutaannik tusarusunngitsutut ippai:

- Oqareernittut oqaloqatigiinnermi minnerpaamik marluusoqartariaqarpoq, ikinngutigiittut imminnut tatigiissinnaasariaqarput imminnullu naatsorsuutigisinnaasariaqarlutik, tamannalu USA-mut tunngatillugu kissaatigivara ullumikkut inissisimanerput eqqarsaatigalugu. Amerikamiut nalunngilaat uagut suleqatigerusukkitsik, nalunngilaat USA-p Issittumi isumannaallisaanikkut annertusaaniaruni Kalaallit Nunaanni inerterneqarnaviarani, tamanna kissaatigigunikku, kisianni tassanngaaniit nunamik inoqartumik namminersortumillu tigusiniarluni piumasaqarneq aqqutissaanngilaq.

Inissisimanerup eqqartorneqarnissaa aaqqiissutissarsioqqissaarnissarlu pisariaqarpoq

Kalaallit Nunaat Danmark Savalimmiullu peqatigalugiillutik naalagaaffeqatigiinnerup iluaniipput, USA-mit sakkortusisamik tatisimaneqarnerup kingunerisaanik inissisimanerup eqqartorneqarnissaa pisariaqartinneqarpoq:

- Maanna Danmarkip Kunngeqarfianiippugut, taamaattumik nunat pingasut akunnitsinni oqaloqatigiittuarpugut inissisimaneq aaqqiissutissallu pillugit, aamma taamaappoq uani pineqartumi. 

Naalakkersuisut siulittaasuata, Jens-Frederik Nielsen-ip, ministeriuneq Mette Frederiksen peqatigalugu ataatsimoorlutik oqaaseqaatertik innersuussutigaa:

”Siusinnerusukkut ersarissumik oqaatigereerparput. Maanna uteqqipparput. Naalagaaffiit killeqarfiat naalagaaffiillu namminersornerat nunarsuarmi inatsisitigut tunngaveqarpoq. Tunngaviusumik periaaseqarpugut. Nunanik allanik tigusiinnartoqarsinnaanngilaq. Aamma nunarsuarmi isumannaallisaanermik tunngavilersuuteqaraluaraanniluunniit. Kalaallit Nunaat kalaallit pigaat, USA-llu Kalaallit Nunaat tiguassanngilaa. Naalagaaffeqatigiinnerup killeqarfiisa namminiussuseqarnerpullu ataqqineqassasut naatsorsuutigaarput.”