Jens-Frederik tusagassiortunik katersortitsinermi: Unnuit tamaasa sioorasaarneqartarneq imaannaanngilaq

Jens-Frederik Nielsenip apersorneqarnera ilassutigalugu nutarterneqarpoq.

Kalaallit Nunaat suli tatineqangaartutut misigivoq, Naalakkersuisut siulittaasuat Jens-Frederik Nielsen Katuami nunanit tamalaanit tusagassiortunik katersortitsinermi oqarpoq.

- Pissutsini makkunani iligisatsinnit tapersersorneqarnerput pingaaruteqarpoq. Eqqissisimasumik oqaloqatigiinnissaq anguniarlugu suli kissaatigaarput, ilaatigut oqarpoq.

Kalaallit Nunaata Kunngeqarfik toqqaraa uteqqippaa.

- Uteqqillara: Kalaallit Nunaata Kalaallit Nunaat maannatut ittoq qinerpaa, tassa Kunngeqarfimmut Danmarkimut atasoq.

- Kunngeqarfik Danmarki toqqarparput. EU toqqarparput. NATO toqqarparput, Jens-Frederik Nielsen oqarpoq.

- Kiffaanngissusernik arsaarniarneqarnerit takorlooruk

Naalakkersuisut siulittaasuat Kalaallit Nunaat isumannaatsuumik inissisimalersimanersoq aperineqarpoq.

Jens-Frederik Nielsenip USA Kalaallit Nunaat tiguarniarlugu sakkutuulersorsinnaannginnerarsinnaanngitsoq ippassaq tikillugu oqaatigineqarsinnaanngitsoq oqaatigaa, aamma Kalaallit Nunaata siunissami oqaloqatigiinnerit Kalaallit Nunaata nammineq oqartussaassuseqarnera ataqqillugu ingerlanneqassasut piumasarigaa.

- Tiguarneqarnissaq pillugu unnuit tamaasa sioorasaarneqartarneq imaannaanngilaq. Ippassaq tikillugu susoqarsinnaasorluunniit isumaqarsimavugut.

- Takorlooriaruk kalaaliullutit, inuiaqatigiit eqqissisimasut, ullut tamaasa tusagassiuutitigut kiffaanngissutsivit arsaarinnissutiginiarneqarnera takusarlugu, Jens-Frederik Nielsen oqarpoq.

Ruttep suna isumaqatigiissutigaa

Jens-Frederik Nielsen Donald Trumpip Kalaallit Nunaat pillugu isumaqatigiinnissamik sinaakkutissat inissinnerarlugit pingasunngornermi unnukkut oqaatigisai pillugit arlaleriarluni aamma aperineqarpoq.

Jens-Frederik Nielsen oqarpoq Trumpip isumaqatigiissutaa sunik imaqarnersoq nalullugu, ministeriunertullu Mette Frederiksenip Nato-p generalsekretæria Mark Rutte Danmarki Kalaallit Nunaallu sinnerlugit Trumpimik isumaqatiginninniarsinnaanngitsoq pillugu oqaatigisaa aamma naqissuserpaa.

- Danmarkip Kalaallit Nunaatalu sinniisaasa Rutte ullualuit qaangiuttut oqaloqatigaat. Assigiinngitsut oqaloqatigiinnissaannut piareersimavugut, oqartussaassuseqarnerpulli pinnagu, Jens-Frederik Nielsen oqarpoq.

Aatsitassarsiorneq pillugu suleqatigiinneq

Jens-Frederik Nielsenip Mark Ruttep nammineerluni Naalakkersuisuniluunniit ilaasortat allat peqataanngitsut Donald Trump Kalaallit Nunaat pillugu oqaloqatigisimanera qanoq isumaqarfigineraa tusagassiortunik katersortitsinerup kingorna Sermitsiap aperaa.

- Soorunami Kalaallit Nunaat - Kunneqarfik Danmarkilu - peqataatinnagit isumaqatigiissuteqartoqarsinnaananilu isumaqatigiinniartoqarsinnaanngilaq.

- Tamatta isumaqatigiissutigisavut ataatsimiinnermi oqaluuserineqarsimasut ilisimatinneqarpunga.

- NATO-p iluani iliuuseqarnerulaarnissatsinnut piareersimavugut. Taannaana pineqartoq.

- Aatsitassanik, aatsitassarsiornissamik isumaqatigiissutinik allanillu oqaloqatigiissutigineqarsimasunik paasissutissinneqanngilanga, oqarpoq nangipporlu:

- Ataqqinnittumik pitsaasumillu suleqatigiinneq pillugu oqaloqatigiinnissamut piareersimavugut – aamma aatsitassanut tunngatillugu. Suleqatigiinnerunissarput piareersimaffigaarput. Aamma iliuuseqarnerunissatsinnut piareersimavugut, soorunamili killissavut ataqqillugit. Inatsisit ataqqillugit. Inuiaat kulturerpullu ataqqillugit.

Suleqatigiissitaq sussava?

Jens-Frederik Nielsenip tusagassiortunik katersortitsinermi arlaleriarluni USA-p, Kalaallit Nunaata Danmarkillu suleqatigiissitaat nunanut allanut tunngasunut naalakkersuisup Vivian Motzfeldtip (S), nunanut allanut tunngasunut ministerip Lars Løkke Rasmussenip aamma amerikamiut nunanut allanut tunngasunut ministeriata Marco Rubiop præsidentillu tullersortaata J.D. Vancep ataatsimiinneranni isumaqatigiissutigineqartoq innersuussutigaa.

Kalaallit Nunaalli USA-llu suleqatigiinnertik arlaleriarlugu ersersippaat, ilaatigut Joint and Permanent Committee aqqutigalugu. Taamaammat suleqatigiissitami tassani suna eqqartorneqassava?

- Isumaqarpunga pingaarnerpaamik suleqatigiinnermut tunngatillugu oqallittoqassasoq. Kalaallit Nunaanni aallaqqaammulli oqartarpugut suut tamaasa eqqartornissaannut piareersimalluta, killissaqarpugulli qaagingassaanngitsunik: Oqartussaanerput. Killiliineq. Tamatta killissaqarpugut.

- Suleqatigiinnissarli – aamma sakkutooqarnerunikkut, oqartussaassutsimik atuutsitsineq aningaasaqarnikkullu niuernermillu attaveqatigiinneq – ataqqinnittumik oqaloqatigiissutiginissaannut piareersimavugut, Jens-Frederik Nielsen Sermitsiamut oqarpoq.