Critical Metals Corp. akuersissutinik tigusinissamut qinnuteqartoq
Australiamiut Amerikamiullu aatsitassarsioqatigiiffiat Critical Metals Corp. Killavaat Alannguanni aatsitassat qaqutigoortut pillugit akuersissutinik tigusiniarluni qinnuteqarsimavoq. – Piffissap sivikitsuinnaap ingerlanerani aalajangiisinnaanissaq naatsorsuutigaarput, ingerlatseqatigiiffilli inuillu ataasiakkaat ingerlatseqatigiiffimmik ingerlatsisut peqqissaartumik misissornissaat inatsisitigut pisussaaffigigatsigu suliaq sivisusinnaavoq, Aatsitassanut Naalakkersuisoq Naaja H. Nathanielsen oqarpoq.
Australiamiu niuertoq aatsitassarsiorfimmilu Critical Metals Corp-imi pisortaq Tony Sage 2020-mili Tanbreez-imi piginneqataassutinik pisiortorpoq, maannalu piginneqataassutit 49,5 procentii pigilerpai. Inerlatseqatigiiffik 1,5 procentimik ilaqqinnissaanik siumoortumik neriorsorneqarnermigut taamaalillunilu amerlanerussuteqarluni piginneqataalernissamigut Killavaat Alannguani akuersissummik tigusinissamik aatsitassanut naalakkersuisoqarfimmut qanittukkunni qinnuteqarpoq.
Assi: Trine Juncher Jørgensen
Aatsitassarsioqatigiiffik Critical Metals Corp., Jomfruøernemi nalunaarsorneqarsimasoq 2024-milu USA-mi aningaasanik niuerfimmi Nasdaq-imi niueqatigiinnermut ilannguttoq, maanna Tanbreezip Killavaat Alannguanni piiaanissamut akuersissutaata tigunissaanut Namminersorlutik Oqartussanut pisortatigoortumik qinnuteqarsimavoq.
Piginneqataassutinik pisiortorneq
Australiamiut Amerikamiullu suliffeqarfiutaat Tanbreez-imi piginneqataassutinik ukiut arfinillit matuma siornatigut pisiortorluni aallartippoq. Aatsaalli maannakkut 49,5 procentinik piginneqataassuteqalerlunilu aamma 1,5 procentimik piginneqataassuteqarnerulernissamik neriorsorneqarluni taamaalillunilu amerlanerussuteqarluni piginneqataalersussatut akuersissutip tigunissaanut Namminersorlutik Oqartussanut qinnuteqarsinnaalerpoq.
Australiami suliffeqarfimmi Critical Metals Corp.-imi pisortaaneq Tony Sage, Tanbreezimi pisortaq Greg Barnes peqatigalugu sapaatip-akunnerani kingullermi Torontomi PDC-mi ataatsimeersuarnermut peqataasoq, taama oqarpoq.
Aningaasarpassuit aningaasaliissutigineqartut
Tony Sage naapertorlugu Critical Metals Corp. 2020-miilli suliniummut 20 millionit dollarit missaannik aningaasaliisimallunilu ukioq manna 50 millionit dollarinik aningaasaliinissamik pilersaaruteqarpoq.
– 50 millionit dollarit ilaatigut sumiiffimmi toqqorsiviliornissamut, tammaarsimaartarfiliornissamut Qaqortumilu allaffiliornissamut atorneqassapput. Tamatuma saniatigut aatsitassarsiorfimmit toqqorsivimmut aqquserniornissamut naalakkersuisoqarfimmut qinnuteqarpugut, Tony Sage oqaluttuarpoq, suliffeqarfillu 2024-mi Amerikamiut aningaasaliisuinut attaveqarusunneq pissutigalugu USA-mi aningaasanik niuerfinnut ilannguttoq nassuiaavoq.
Tony Sage naapertorlugu suliniut ineriartortinniarlugu 500-700 millionit dollarit akornanni aningaasaliisoqartariaqarpoq, tamannalu taamaallaat Amerikami aningaasaliisartut akornanni piviusunngortinneqarsinnaavoq. Ingerlatseqatigiiffik akuersissummik tigusinissamut akuerineqarpat Exim Bankimit 120 millionit dollarinik taarsigassarsisoqwassasoq isumaqatigiissutigineqareersimavoq.
– Piffissap sivikitsuinnaap ingerlanerani aalajangiisinnaanissaq naatsorsuutigaarput, ingerlatseqatigiiffilli inuillu ataasiakkaat ingerlatseqatigiiffimmik ingerlatsisut peqqissaartumik misissornissaat inatsisitigut pisussaaffigigatsigu suliaq sivisusinnaavoq, tamannami aatsitassanut inatsimmi nutaami sukateriffigineqarnikuuvoq, Aatsitassanut Naalakkersuisoq Naaja H. Nathanielsen oqarpoq.
Assi: Trine Juncher Jørgensen
Suliaq naalakkersuisoqarfimmi suliarineqartoq
Aatsitassanut Naalakkersuisoqarfimmit Naaja H. Nathanielsenip Critical Metals Corp.-imit qinnuteqaat tiguneqarsimasoq suliarlu suliarineqartoq uppernarsarpaa.
– Piffissap sivikitsuinnaap ingerlanerani aalajangiisinnaanissaq naatsorsuutigaarput, ingerlatseqatigiiffilli inuillu ataasiakkaat ingerlatseqatigiiffimmik ingerlatsisut peqqissaartumik misissornissaat inatsisitigut pisussaaffigigatsigu suliaq sivisusinnaavoq, tamannami aatsitassanut inatsimmi nutaami sukateriffigineqarnikuuvoq, Naaja H. Nathanielsen oqarpoq nangillunilu:
– Assersuutigalugu ingerlatseqatigiiffiup akuersissutinik allanik siusinnerusukkut peqarsimanera, sulianilu eqqartuussisoqarsimasoqarnera kiisalu piginnittutut siusinnerusutut suliniutip ingerlateqqinnissaanut teknikkikkut aningaasatigullu piukkunnaateqarnersut misissortariaqarpagut, Naaja H. Nathanielsen oqarpoq.
Piginnittuusoq siornatigut eqqartuunneqarsimasoq
Akuersissummik piginnittoq ilaatigut peqquserlunnermut peqquserluttuliornermullu atatillugu ukiuni sisamani kingullerni eqqartuunneqarsimasussaanngimmat akiligassinneqarsimasussaanngimmallu Critical Metals Corp. Kalaallit Nunaanni inatsisimmik eqquutsitsinissamut ajornakusoortitsisinnaasoq Sermitsiap siusinnerusukkut allaaseraa.
European Lithium, Critical Metals Corp.-imi piginneqataassutit 83 procentiinik piginnittuullunilu aqutsisuusoq aningaasanik nioqquteqarnermik peqquserlunneq, atornerluineq nalunaarutiginninnissamillu pisussaaffimmik unioqqutitsinermut aningaasanik niuernermik nakkutilliisoqarfiup FMA Österreichip naatsorsuisimanera naapertorlugu 2020-mi, 2021-mi aamma 2022-mi katillugit 343.000 euronik akiligassinneqarsimavoq.
Australiamiut suliffeqarfiutaat Tanbreez 2001-imiilli Killavaat Alannguanni aatsitassarsiornissamut akuersissuteqarpoq. Tanbreezip naafferartumik tigunissaa pillugu Australiamiut Amerikamiullu suliffeqarfiutaat Critical Metals Corp. 2020-mi isumaqatigiissuteqarfigisimavaat. Akuersissutip tigunissaanut qinnuteqaat qanittukkut tunniunneqarpoq, taannalu maanna Aatsitassanut Naalakkersuisoqarfimmut suliarineqassaaq, tassani ilaatigut ingerlatsiviup inuttullu ingerlatsivimmik aqutsisut tunuliaqutaat misissorneqassallutik.
Tanbreez
Avatangiisinik illersuiniaqatigiiffik maalaaruteqartoq
Aammattaaq avatangiisinik illersuiniaqatigiiffik NOAH European Lithiumip Østrigimi suliniummut akuersissummik tamakkiisumik peqarnerarluni piginneqataasunut paasissutissiisimanera eqqunngitsoq isumaqaramik 2024-mi Nasdaqip qullersaqarfianut New Yorkimiittumut maalaaruteqarpoq, Østrigimili aningaasaqarnermut ministereqarfik naapertorlugu taamaanngilaq.
Sermitsiattaaq Romaniamiut tusagassiorfiisa marluk: Romania-Insider.com aamma Ziarul Financiar, European Lithium niuertumut Rumæniamiumut Australiamiumullu assortuussutaasumut Frank Timisimik atilimmut qanoq attuumassuteqartikkaat oqaluttuaraa. Frank Timis suliffeqarfimmi piginneqataassutit amerlanerpaartaannik piginnittuusoq, Romaniami saffiugassanik saviminernillu tunisassiorfissamik illersornissamut atortussanillu sanaartorfissamut siunissami suliarinnittarfinngorsinnaanermik siunertaqarnerminik qulakkeerinninniarpoq.
Piiaaffeqarneq pillugu Saudi Arabiamik suleqateqarneq
Critical Metals Corp.-ip Saudi Arabiami suliffissuaqarfiit angisuut peqatigalugit suliffeqarfimmik pilersitsinissaq ukioq manna januaarimi isumaqatigiissutigigaa tusagassiivik Danwatch qanittukkut allappoq. Killavaat Alannguanni suliniummit aatsitassat piiarneqartut 25 procentiisa Saudi Arabiamut assartorneqarnissaat siunertaavoq, tassanilu suliffissuarmi nutaami suliarineqariarlutik tamatuma kingorna aatsitassat minguiarneqareerpata USA-mi tunisassiornermut ingerlateqqinneqassapput.
Annikitsualuit eqqartuussutaasut
Annikitsualuit eqqartuussutaasut
Tony Sage suliat assigiinngitsut pisuussutinik ilanngaasut pillugit aperineqarami aktiat Australiami Østrigimilu piffissani assigiinngitsuni nioqqutigineqarmata, tamatumalu kingunerisaanik ingerlatseqatigiiffiup Wienimi børsimi aktiaatini allattorsimaffiannit peertariaqarsimammagit Østrigimi eqqartuussutinut sanilliullugu teknikkikkut ajornartorsiuteqartoq Sermitsiamut oqarpoq.
Suliffeqarfik 2024-mi USA-mi aningaasanik niuerfimmi nalunaarsorneqarnissaanut piareersaalermat tunuliaqutaa pillugu misissuilluartoqarsimasoq Tony Sage aammattaaq oqarpoq.
– Niuertup Frank Timisip European Lithiumimi piginneqataassutinik amerlanerpaanik piginnittuuneranik oqaluttuaq eqqunngilaq. Taanna European Lithiumimi piginneqataanngilaq, taamaallaallu uuliamik aatsitsiviliornissamut atatillugu Romaniami naalakkersuisunut akuersissuteqarnissatsinnut ikiorsimavaatigut, Tony Sage oqarpoq, taassumalu aamma avatangiisinik illersuiniaqatigiiffiup NOAH-p maalaarutaa ilumuunnginnerarpaa.
– Tamanna isumakuluutiginngilarput.
Naalakkersuisoqarfik naapertorlugu Killavaat Alannguani piiaanissamut akuersissut Critical Metals Corp.-ip tigusinnaaneraa marsip naannginnerani aalajangiisoqassasoq ilimanarluinnarpoq.
