– Jens-Frederiup qaninnerpaasaatut sanianiittuulluni assut ernumanarnikuuvoq

Naalakkersuisut siulittaasuat Jens-Frederik Nielsen angalaqatinilu pingasunngornermi Nuummut tikimmata niuffiortorpassuit akornanniipput qaniginerpaasai.

Niuffiortunimi sallersaallutik inissisimapput inooqataa Anika Brandt Sørensen meeraallu pingasut. Ulloq pingaartorsiorfiummat annoraalerlutik niuffiorput.

Ulloq nunatsinnuinnaanngitsoq, ilaqutariinnguanulli puigunngisaannagassaq. Jens-Frederik Nielsenip nunaqqatini persuarsioqisut mittarfimmit anillatsinnani qularnanngitsumik pingaarnerutitani ilasseqqaarpai.  

- Soorunami meeqqani siulliullugit ilasseqqaarpai, Anika Brandt Sørensen oqaluttuarpoq.

Misigisaq oqaasertaleruminaatsoq.

- Nassuiaruminaappoq. Tuppallernarpoq. Attortinnarpoq. Tussunngunarpoq.

Kiisami eqqissiallassinnaalertut

Nunatsinni innuttaasorpassuit USA-p, imaluunniit eqqornerusumik taallugu, nunap præsidentiata Donald Trumpip nunarput persarilillaraangagu toqqissiunnaartarsimaqaat. 

Ilaqutariinnuttaaq sunniuteqarsimaqisoq nunatta firstladyata oqaluttuaraa.

- Ukua ukiut kingulliit sakkortusimaqaat. Assoroorfiunikuupput. Saniatigullu aamma isaasalerlugu Jens-Frederiup qaninnerpaasutut sanianiittuulluni assut ernumanarnikuuvoq, sakkortunikuuvoq. Aamma uangaagami misigissutsinik takutitsiffigisinnaasaa, avammut sassanngikkaangami, Anika Brandt Sørensen oqaluttuarpoq.  

Taamaammat ullut eqqissisimanarnerusunut qilanaarpoq.

- Kiisami tussinnaalertutut misigivunga. Ippassaq atsioreermata eqqissiallappunga. Kisianni aatsaat timmisartoq nunatsinnut mimmat eqqissineq misigaara.

Meeqqat sunnernaveersaartaraluarpaat

Nunatsinni toqqissiviilliortoqalersillugu meeqqat aamma sunnerneqartarput. Takorlooruminaapporlu nunap siuttuanik ataataqarluni qanoq toqqissisimananngittartigisimanera.

- Meeqqagut pingasut pisunut akuliutsinnaveersaarlugillu sunnertinnaveersaarnikuuagut sapinngisarput tamaat.

Tamatigulli tamanna pisinnaasarsimanngilaq. Pisummi inuiaqatigiinnimi tamani oqallisigineqarput. Aamma meeqqat atuarfianni. 

- Soorunami atuarfimminni tusagaqartarput, kisianni angerlarsimaffitsinni inuuneq nalinginnaasoq atorniarnikuuarput, naak angalarsuaaraluarluni, taavalu aamma uagut ernumarsuaarnikuugaluarluta toqqissisimatillugit malunnartinnaveersaarnikuuarput. Sakkortunikooqaaq, taamaammat ulloq manna oqiliallannarpoq, aamma kingumut qiviarnarpoq, Anika Brandt Sørensen oqaluttuarpoq.

Sinilluaqqissinnaalerput

Ilaqutariit ippassaq pingasunngornermi Katuami kaffisortitsisoqarnerani naapikkatsigit, kingorna Jens-Frederik Nielsenip angajoqqaavanut neriartussamaarlutik inooqataata oqaluttuaraa.

- Neriartussamaarpugut angajoqqaavanut. Nereqatigiilaariarluta meeqqat innartissavagut.

Naalakkersuisulli siulittaasuannik inooqateqassagaanni naammagittarsinnaasariaqarpoq, unnuummi sinnerani eqqissillutik peqatigisinnaassanerlugu suli piffissami tassani naluaa.

- Pilersaarutai ilisimavallaanngilagut, Suli oqaluutinnginnatta aatsaat ingikkami, Anika Brandt Sørensen illarlunilu oqarpoq imaluni nangilluni.

- Ulapittarnermik, imaassinnaagami sulisoq imaluunniit arlaannik pisassaqartoq.

Ataaserli qularnanngilaq. Ilaqutariit ittuat USA-mi præsidentimik aamma danskit ministeriunerannik atsioqateqareerluni tassa angerlamut tikereerpoq. Naallu suli ulapputissaqaraluartoq ilaqutariit eqqissiallassinnaalerput.

- Sinilluarsinnaaleqqippasippugut, Anika Brandt Sørensen oqiliallassimarpasilluni oqarpoq.