Juulli orpeqanngitsoq

Pilersuisup nunatsinni illoqarfinni nunaqarfinnilu 64-iusuni 67-inik pisiniarfeqartup pisisartui amerlasuut allaanerusumik juullisiortussanngorput, tassami juullip orpii tipigissut ukiut tamaasa amerlasoorujussuanngorlugit Danmarkimiit tikisinneqartartut, ukioq manna niuertarfinni nioqqutaassanngitsut Pilersuisumiit pisisartunut nalunaarutigineqaqqammerpoq.

Tamanna pisisartorpassuarnit pakatsissutigineqarlunilu aliatsaatigineqartoq inuit attaveqatigiittarfiini takuneqarsinnaavoq.

Aammali pisisartut tipigissunik “ilumoortunik” juullikkuni orpeqarusullutik sukkasuumik periarfissarsiullaqqissut paasinarsivoq.

Orpiit plastikkit nioqqutaassasut

Orpiit assartorneqarnerminni panerlutik pisiniarfinnut apuuttarnerat, ilaatigullu pilutaarutingajamassimasut tuniuminaattarnerat, Pilersuisup ukioq manna orpinnik qisunnik tuniniaassanani alajangerneranut peqqutaasoq, KNI A/S-imi Sulisoqarnermut, Attaveqatigiinnermut, Piujuartitsinermullu Pisortaq Julianne Henningsen Heilmann paasissutissiivoq.

- Tamatuma kingunerisaanik orpiit amerlasuut kaseerneqarsimapput. Nunatsinni juulli pingaartinneqartorujussuuvoq, taamaammallu pisiniarfitsinni soorunami juullerpaluttunik allanik peqarnissarput isumagisarparput.

- Mamakujuit juullisunnitsut, juullimut pinnersaatit, taamatullu orpiit plastikkimik sanaajusut ukioq manna tikisinneqarput, Julianne Henningsen Heilmann Pilersuisup pisisartuinut tuppallersaavoq.

Periarfissat allat

Pilersuisoq illoqarfinni nunaqarfinnilu sumiiffiit ilaanni kisimi pisiniarfeqarpoq, taakkunanilu pisisartut juullip orpiinik “ilumoortunik” ukioq manna pisiassaqanngillat, tamannalu Pilersuisup Facebookimi quppernerani saqqummiunneqarmat qisuariaatit amerlapput. Pakatsineq, iliuusissaaleqineq kamannerlu ilaatigut takussaapput – sivitsunngitsorli periarfissanik ujarlernermik taarserneqarpoq.

Assersuutigalugu Qeqertarsuarmi Pilersuisoq kisiartaalluni niuertarfiuteqarpoq, innuttaasullu 850-it missaanniittut amerlasoorparujussuit juullip orpiinik “ilumoortunik” tipigissunillu juullimi orpeqarnissartik pingaartippaat. Taamaammat Qeqertarsuarmi sanasoq namminersortoq Sanasoq Felix, Felix Brandtimit pigineqartoq, juullip orpiinik Danmarkimiik tikisitsiniarluni aalajangerpoq.

- Danmarkimi juullip orpiinik tuniniaasumik nalunngisaqarpugut, taannalu suleqatigalugu orpiit 40-t missaanniittut decemberip 11-iani maanga tikisissavagut, tamannalu illoqarfinni tigulluarneqartoq paasivarput, orpiimmi taakku tamarmik inussaqalereerput.

- Ulloq orpinnik aallerfissaq aalajangiukkutsigu sannavitta eqqaani juullerpalaartitsissaagut, taamaalilluta juullimi ileqqoq orpinnik aallertarneq nuannarineqarluartoq ingerlatissavarput, taanna oqarpoq.

Aasianni Starkimi immikkoortortami pisortap Malik Siegstadip oqarnera naapertorlugu inuit arlallit Qeqertarsuarmiit saaffiginnereerput juullillu orpiisa qisuit arlallit nassiunneqarnissaat maanna piareersarneqartoq taassuma oqaatigaa.