Juullip Inuata mikkiartornissaanut pilersaarut piareerpoq

Nuummi meeqqat inersimasullu juullip inuata ikiortaasalu Dronning Ingridip Napparsimmavissuata eqqaanut decembarip 24-ani minissaat ukioq manna aamma misigisinnaavaat.

Peqqissutsimut Inunnullu Innarluutilinnut Naalakkersuisoqarfiup paasissutissiinera naapertorlugu qulimiguulik nalunaaqutaq aqqanermut missaaq.

- Juulimaap qulimiguulimmut aappalaartumut ilaalluni Napparsimmavissuup silataanut minnerani tikilluaqqusinnaanera nuannaarutigaarput. Misigisaavoq nuannersoq ukiut tamaasa qilanaarisartagarput amerlaqisunullu isumalerujussuusoq nalunngisarput, Peqqinnissaqarfiup pisortaanera Tina Amondsen oqarpoq.

Juullilli inua meeqqanut ukioq manna mamartullissanngitsoq naalakkersuisoqarfimmit aamma paasissutissiissutigineqarpoq:

- Tamanna ukiuni siuliini meeqqat tamarmik nuannersumik misigisaqartillugit mamakujunnik agguaaniarnerup ajornakusoorsimaneranik patsiseqarpoq, naalakkersuisoqarfimmiit allapput.

Assersuinerup ataqqinissaa eqqaamajuk

Isumannaallisaanissaq eqqarsaatigalugu assersuisoqartussaammat taassuma ataqqinninnissaa pingaaruteqartoq, oqartussat aamma eqqaamaqquaat:

- Qulimiguullip minnerani isumannaallisaanikkut palleqqusaannginnermut katersuuteqqusaannginnermullu killiliussat eqquutsinneqarnissaannik qulakkeerinissaaq, assersuinermi siunertaavoq, Air Greenlandip attartortitsinermut immikkoortortaaneersoq Finn Siegstad oqarpoq.

Qulimiguullip miffissaa, tarnikkut nappaatilinnut immikkoortortassap nutaap sanaartorneqarnera pissutaalluni, saanap sioraani kangerliumanermut qaninnerulersillugu inissinneqarpoq. Silarlussaooat Nuummi Qatserisartut juulimaap illoqarfimmi meeqqanut isumannaatsumik apuunnissaa isumagisaavaat.

Air Greenland, Kalaallit Nunaanni Politiit, Nuummi Qatserisartut, Kommuneqarfik Sermersooq nunatsinnilu Peqqinnissaqarfik aaqqissuisuupput.