Kalaaleq Danmarkimi peqqissartoq: Københavnip qeqqani dataaruteriataarpunga

OBS: Tusassip akissutaa nalimmassarneqarpoq.

Hans Ole Jensenip, Danmarkimut misissortikkiartorluni Kalaallit Peqqissartut illuanniittup, pisiniarfissuarmi Fieldsimit Københavnimiittumi anilerluni Tusassimi atuisuuffini nunguttoq pillugu sms-isisivoq.

- Siullermik kukkusorivara, Hans Ole Jensen, Sermitsiamut oqaluttuarpoq.

Allagarsiaali eqqortuuvoq.

Tusassimi atuisuuffik annerpaaq, mobilikkut internetimik 20 GB-imik nunani allani atorneqarsinnaasumik imalik nungummat, internetsimut attavini atorsinnaajunnaarpaa, paasivaalu Tusassimi atuisuuffini qaffanneqarsinnaanngitsoq.

Ulluinnarni inuunermi pinngitsoorneqarsinnaanngitsut oqarasuaatip angallattakkap iluaniimmata ajornakusoortitsilerpoq.

- Oqarasuaammi angallattakkamiipput ulluinnarni inuuninni pinngitsoorsinnaanngisakka tamarmik, soorlu metronik angalanissamut kortera, akiliutiga allallu oqarasuaat angallattagaq aatsaat atorlugu atorneqarsinnaasut. Dataarunnerma nalaani kisimiissimasuuguma, Kalaallit Peqqissartut Illuannukarsimassagaluarpunga pisullunga, Hans Ole Jensen oqaluttuarpoq.

Tusassimi atuisuuffik qaffanneqarsinnaanngitsoq

Hans Ole Jensennip Tusassip atuisuuffini qaffakkumallugu saaffiginnissimagaluarpoq.

- Apeqqutiginikuuara Tusassimi atuisuuffiga qaffanneqarsinnaanersoq, kisiannili ilisimatinneqarpunga taamaaliorsinnaanngitsunga. Oqarfigineqarpunga qallunaat nunaanni teleselskabimut atuisuuffimmik pisisariaqassasunga, Hans Ole Jensen oqaluttuarpoq.

Hans Ole Jensennillu oqarnera naapertorlugu siornatigut Tusass nunani allani atorsinnaasoq neqeroorutaa pigalugu atuisuuffiup internetimut attaveqaannarnissaa pillugu annertusineqarsinnaasarsimagaluarpoq.

- Siornatigut nunani allani angalanitsinni atuisuuffipput 20 GB-miit 50 GB-mut qaffassinnaasarparput. Massakkullu taamaaliortoqarsinnaanngilaq. Isumaqarpunga tamanna allornerpaalunnik kinguariarnerusoq, Hans Ole Jensen oqarpoq.

Tusassip atuisuminut allannguutinik paasissutissiisimanera amigarineqarpoq.

- Allanngortoqarsimanera amerlasuut naluaat. Utoqqaat oqarasuaatinik passussinissaminnut ikiorneqarnissamik pisariaqartitsisut eqqarsaatigalugit, Tusassip allannguutinik paasissutissanik siammarterisimanera amigarpoq. Utoqqaat ilaquttaminnut sianersinnaajunnaartarput qanoq iliussanerlutik nalusaramikku, Hans Ole Jensen oqarpoq.

Tusassip GB akikinnerusoq salliuppaa

Nunani allani atuiffimmi data nungunneqarpat, datamik piseqqittoqarsinnaasoq, Tusassimi attaveqaqatigiinnermut pisortaq Maasi Brøns Chemnitz Sermitsiamut oqarpoq. Nittartakkatigut atuisuuffik saldo immerneqarsinnaavoq, tassanngaanniillu aningaasat datamut atorneqartussat nusunneqartassapput.

Taassuma erseqqissaatigaa atuisut nittartakkamik atuinermut annertunerusumik siornatigut pisisinnaasut, maannali nunani allani nittartakkatigut atuineq (Roaming aaqq.) allanngortinneqarsimavoq, atuisullu annerpaamik maannakkut 20 GB-mik nunani allani nittartakkatigut atuinermi taamaallaat atuisinnaapput.

Tusassip nunani allani nittartakkamik atuinermut taarsiullugu Kalaallit Nunaanni datap akia appartippaa:

- Taamaalilluta sullitatta angerlarsimanerminni GB-nik amerlanerusunik akikinnerusunillu atuisinnaanissaat nunani allani angalanermi atuisinnaanerannit pingaarnerutipparput, Maasip suleqataa Brøns Chemnitz allappoq.

Tusassip nassuerutigaa atuisunut sivisuumik, assersuutigalugu katsorsartinnermut atatillugu Danmarkimiittunut tamanna unamminarsinnaasoq.

– Inuit ikiorneqarnissamik pisariaqartitsisut assersuutigalugu Kalaallit Peqqissartut Illuannut imaluunniit Kalaallit Illuutaannut saaffiginninnissaat kaammattuutigaarput, Maasi Brøns Chemnitz allappoq, taassumalu nalilerpaa 20 GB pisariaqartitanut pingaarnernut naammattoq:

– Nunani allaniikkaanni Danmarkimiikkaanniluunniit datamik atuisinnaaneq Tusassimi periarfissaavoq, 20GB-illu pisariaqartitanut pingaarnernut tamanut naammapput, soorlu Wi-Fi-mut attaveqarfiunngitsumiikkaanni. Oqaatigineqareersutullu imminut sullinnermi nunani allani nittartakkamik atuissagaanni saldo imminnut sullinnermi immerneqarsinnaavoq, atuisuuffik nungunneqarsimappat.

Tusassip attaveqaqatigiinnermut pisortaa ilisimatitsivoq aaqqissuussaq pitsanngorsarnissaanut periarfissanik misissuisoqartoq.