Kalaallit ilaasortat qaaqqusallu Folketingip ammarnissaanut piareerput 

Oktobarip aallartinnerani marlunngorneq siulleq Danmarkimi Folketingip ukiuani nutaami aallartippoq. Ileqquusut naapertorlugit Christiansborgip oqaluffiani naalagiaqatigiinnermik ulloq aallartinneqarpoq, tassani Folketingimi ilaasortat, ministerit aamma qaaqqusat peqataallutik, taakkununnga ilaapput Inatsisartut siulittaasuat Kim Kielsen Inatsisartullu Allattoqarfiani pisortaq Steen Lynge.

Taamatuttaaq Naleraq sinnerlugu Folketingimi ilaasortaq Qarsoq Høegh-Dam aappani ilagalugu naalagiarnermi peqataavoq. Inuit Ataqatigiit sinnerlugit Folketingimi ilaasortaq Naaja H. Nathanielsen Humanistisk Samfundip Folketingip ammarneqarnerani nalliuttorsiornermi peqataavoq.

Naalagaaffiup inissisimanera

Folketingimi ukioq ataatsimiiffiusoq aallarnerlugu ammaanersiorneq pisortatigoortumik danskit nalunaaqutaat naapertorlugu nal. 12.00 aallartinneqassaaq.. Ataatsimiinneq ilaasortani sivisunerpaamit ilaasortaasimasumit tamatigut aqunneqartarpoq, ukiorlu manna Lars Løkke Rasmussen ukiuni 32-ni ilaasortaasimasoq aqutsisuussaaq. Folketingip siulittaasuata siulittaasullu tullii sisamat qinerneqareerpata, ministeriuneq Mette Frederiksen oqaaseqassaaq.

Ministeriunerup ammaanermi oqalugiaataa naalagaaffiup inissisimaneranik killiffimmik saqqummiussinerusarpoq naatsorsuutigineqarporlu tassani aamma USA-p, Kalaallit Nunaata Danmarkillu akornanni septembarip 22-anni isumaqatigiissut pillugu oqaaseqarumaartoq.

Sisamanngornermi kalaallit Folketingimut ilaasortat namminneq oqaluttarfimmut qaqissapput, ministeriunerup ammaanersiornermi oqalugiaataa oqallisigineqassammat.

Ministeriuneq ammaanersiorluni oqalugiareerpat Københavns Drengekor Det Kongelige Kantori Folketingimi ilaasortat 179-it peqatigalugit ”Der er et yndigt land” erinarsussavaat.