Kalaallit Nunaanni tjenestemandit 200-nit amerlanerusut Danmarkimi atugassarititaasut assiganik atugassaqalersut
Kalaallit Nunaanni tjenestemanditut atorfillit sapaatip-akunneranut agguaqatigiissillugu akunnerni 40-ni sulisarunnaarlutik nalunaaquttap akunnerini 37-t sulisalissapput.
- Maanna naalagaaffimmi atorfillit aamma isumaqatigiissut tunngavigalugu sulisut – minnerunngitsumillu atorfillit soraarninngoreersut – naligiissitaanissaat sulissutigineqassaaq. tamannalu suliaq qilanaaraarput, Múte B. Egede (IA) oqarpoq.
Assi: Oscar Scott Carl
Danskit naalakkersuisuisa Kalaallit Nunaanni tjenestemanditut atorfillit 230-t missaanniittut Danmarkimi tjenestemanditut atorfillit atugaattut atugaqalernissaat isumaqatigiissutigaat.
Aningaasaqarnermut ministeriaqarfik tusagassiuutitigut nalunaarummi allappoq.
Kalaallit Nunaanni pisortani tjenestemanditut atorfillit akissarsiaqarnerulerlutillu akunnermut sulineri ikilissapput.
Kalaallit Nunaanni naalagaaffiup atorfilittai erninermut, soraarnerussutisiaqalernissamut utoqqalinersiaqarnissamullu atugassarititaasut pitsanngorsarneqarnerat malugissavaat, aningaasaqarnermut ministeeriaqarfik allappoq.
- Kalaallit Nunaanni Danmarkimilu naalagaaffiup sulisuisa akissarsiaat atorfeqarnermilu atugassarititaat oqaluttuarisaanermi assiinngissuteqarluinnarput.
- Isumaqatigiissutip tamatuma atuutilersinneratigut naalagaaffeqatigiinni sumi najugaqarneq atorfininnermi aalajangiisuunnginnera pissutigalugu naalagaaffimmi atorfillit assigiimmik atugaqalernissaannut pitsaanerusunillu atugassaqalernissaannut pingaarutilimmik alloriarneruvoq, aningaasaqarnermut ministeri Nicolai Wammen tusagassiuutitigut nalunaarummi oqarpoq.
Aningaasaqarnermut Akileraartarnermullu Naalakkersuisup Múte B. Egedep (IA) isumaqatigiissut alloriarnertut pingaarutilittut oqaatigaa:
- Kalaallit Nunaanni naalagaaffiup atorfilittaasa Danmarkimi naalagaaffiup sulisuisa atugaannut naligiisinneqalernerat alloriarneruvoq pingaarutilik.
- Maanna naalagaaffimmi atorfillit aamma isumaqatigiissut tunngavigalugu sulisut – minnerunngitsumillu atorfillit soraarninngoreersut – naligiissitaanissaat sulissutigineqassaaq. tamannalu suliaq qilanaaraarput, oqarpoq.
/ritzau/
