Kalaallit Nunaat pillugu suleqatigiissitap ukioq manna naammassinissaa Løkkep utaqqigaa

Danskit, kalaallit amerikamiulluukiullu suleqatigiisitaat   januaarimiilli isumaqatigiinniarnerat aallartittoq, aaqqiissutissanik ukiup naannginnerani naammassisaqarnissaat, nunanut allanut ministerip Lars Løkkep naatsorsuutigaa.

”Ataatsimiinnerit amerlanerusut“ suli pisariaqartinneqartut, Politikenimut taanna oqarpoq.

- Diplomatit qaffasissut tassani qitiusumik inissisimapput, Trumpimullu taakkua qanipput, USA-p præsidentiata Donald Trumpip isumaqatigiissummut inaarutaasumut missingersuut akuerisinnaassaneraa aperineqarami taama akissuteqarpoq.

Isumaqatiginninniarneq pillugu USA-p naalakkersuisuni qaffasinnerpaat diplomatinit malinnaatinneqartut, taassuma itisilerlugu oqaatigaa.

- Inuit taakku aalajagiisartunut qanimut attaveqarput, taamaattumik isumaqarpunga isumaqatiginninniarnissaminnut piginnaatitaassasut, isumaqatigiissusiorsinnaatitaallutillu, piviusunngortitsisinnaasut, Løkke oqarpoq.

Trumpip arlaleriarluni Kalaallit Nunaat, Danmarkimi naalagaaffeqatigiinnermut ilaasup tiguarnissaanik eqqarsaateqarneq saqqummiuttareeraalu, USA-p Kalaallit Nunaatalu kiisalu USA-p Danmarkillu akornanni pissutsit ilungersunartumik inissisimapput.

Nunat taakkua suleqatigiisitanik pilersitsisoqarnissaa isumaqatigiissutigaat. Politikkikkut nalunaarut tamanna (tiguaanissaq aaqq.) nunarsuaq tamakkerlugu sammineqangaatsiarpoq, Europamilu tupaallaatigineqarluni. Taamaattorli suleqatigiissitap sulinera pillugu paasissutissat annikitsuinnaapput.

Suleqatigiisitaq taanna nunanut allanut tunngasunut naalakkersuisuusimasup Vivian Motzfeldt Løkke peqatigalugu Washington D.C.-mut januaarimi tikeraarnerisa kingorna pilersinneqarpoq.

Tassani USA-p vicepræsidentia J.D. Vance aamma nunanut allanut ministeriat Marco Rubio naapippaat.

Ilaatigut saqqummiunneqarpoq USA isumannaallisaanermik pitsaanerulersitsiniarluni Kalaallit Nunaanni sakkutooqarfinnik pingasunik ammaanissaminik kissaateqartoq, naak Kalaallit Nunaat nammineq oqartussaassuseqarnera ataqqineqartariaqartoq Kalaallit Nunaanniit oqaatigineqareeraluartoq.

USA tusindilinnik siornatigut sakkutooqartaraluarluni, Kalaallit Nunaanni ataasiinnarmik maanna sakkutooqarfeqarpoq.

/ritzau/