Kalaallit Nunaata USA-mut pingaaruteqassusaa Trumpip eqqartoqqikkaa

USA-p præsidentiata Donald Trumpip Kalaallit Nunaat pillugu oqaaseqaatini uissuumisaarutigeqqippai, tamatumuuna aallakaatitassiami Real America’s Voice-mi.

Præsidentimik apersuinermi, Trump præsidentiujunnaartinnagu USA-p Kalaallit Nunaat "aqussinnaalissagaa“, aallakaatitassiortoq Steve Gruber siulittuisimanerarpoq.

Tamanna ilumoornerarlugu Trumpip tusagassiortoq akivaa:

- Ilumoorputit, iliuuseqarusupput, Trump Real America’s Voice-mut oqarpoq. Iliuuseqarusuttulli kikkuuneri taassuma oqaatiginngilaa, Trumpili nangilluni oqarpoq:

- Kalaallit Nunaat uagutsinnut pingaaruteqarpoq, taakkununnga pinnani... Tamanna eqquiniutigisariaqarpat, Trump oqarpoq. Taassumalu præsitantitut atuuffia 2029 aallartilaarnerani naammassissaaq.

Donald Trumpip 2024-p naalernerani præsidentitut qinigaaqqinnermi kinguninnguatigut arlaleriarluni USA-p Kalaallit Nunaat tiguarlugulu aqussagaa, oqaatigisarpaa.

Præsidentip silassorissuusiaq atorlugu assiliaq Tasiilamut alakkarterisoq assitaliullugu Truth Socialimi sapaatip akunnerata naanerani ikkuppaa, "Hello Greenland“-mik allagartalerlugu.

"Kalaallit Nunaanni pissutsit apeqqutaatillugit", USA-p Europami sakkutuuni angerlartinniarlugit julimi Trumpip oqaatigaa.

Præsidentip tatisinerata kingunerisaanik Danmarkimit, Kalaallit Nunaannit USA-millu atorfilittanit qaffasissumik inissisimasunit ilaasortalinnik, suleqatigiissitaliortoqarpoq.

Naalakkersuisut arlaleriarlutik Trumpip nikassaaneri illuatungilersortarpat..

- Ajoraluartumik uteqqiisariaqarpugut: Kalaallit Nunaat tuniniarneqanngilaq. Nunatta ataqatigiinnera, nunat tamalaat akornanni inatsisit namminerlu aalajangiisinnaatitaanerput ataqqineqassapput, Naalakkersuisut siulittaasuat Jens-Frederik Nielsen (D) juulimi oqarpoq.