Kigutit Nuup avataani narlorissarneqartarnissaat kissaataasoq

Kigutit narlorissarneqarnissaat inuit ilaannut pisariaqarluinnartuuvoq. Kigutilli narlorissassappata tamanna illoqarfiit pingaarnersaanni, Nuummi, taamaallaat pisinnaavoq. Tamanna Ilulissani innuttaasumit naammagisimaarneqanngilaq.

- Innuttaasut tamarmik, sumi najugaqarnertik apeqqutaatinnagu, naligiimmik periarfissaqarnissaat aaqqissuuneqassasoq kissaatigaara. Kigutinik narlorissaasarneq Nuummi najugaqartunuinnaq periarfissatut maanna atuummat, Paarnannguaq Mathiassen Sermitsiamut oqarpoq.

Taanna kissaatini pillugu Peqqissutsimut Naalakkersuisoqarfimmut aamma saaffiginnippoq. Saaffiginnissut Sermitsiap aamma pissarsiaraa. Paarnannguaq Mathiassen Avannaata Kommuniani Siumut sinnerlugu kommunalbestyrelsimut aamma ilaasortaavoq. 

Nalornisoq

Paarnannguaq Mathiassenip kigutit narlorissagassat pillugit Ilulissani kigutileriffik peqqinnissaqarfillu arlaleriarlugit saaffigisarsimagaluarlugit oqaluttuaraa. Saaffiginninnermini kigutit narlorissarneqarnissaannut innersuunneqarnissaq kissaatigisarpaa. Ilulissanit Nuummut innersuussisoqarsimasoq ilisimatinneqarsimalluni aamma oqaluttuarpoq. Tamannali apuuffissaanut apuussimanngilaq. 

- Nuummut innersuussinerarput, Nuummulli paasiniaagama innersuussisoqarsimanngitsoq paasitinneqarpunga. 

- Erseqqissumik nassuiaateqartoqartariaqarpoq qanoruna sinerissami najugaqartut, kigutimik narlorissarneqarnissaannut pisariaqartitsisut, kimut saaffiginnittarniartut aamma innersuunneqassagunik suunukua sillimaffigisariaqaraat, najugaqarneq, nerisaqarneq, ineqarneq angalanerlu eqqarsaatigalugit. Periarfissat maannakkut qanoq ippat? Paarnannguaq Mathiassen oqarpoq.

Taassuma akisussaaffik kimit paarineqarnersoq aamma paaserusuppaa.

- Sinerissami najugaqartuusugut kigutileriffimmut peqqinnissaqarfimmulluunniit saaffiginnikkaluaraangatta akisussaaffik tigujumaneqarneq ajorpoq. Kiamuna akisussaaffigigaa innersuussinissaq? Imminnut tikkuartuutilertarput taava sinerissami najugaqartuusugut innersuutsinnissamut ingerlariaqqissinnaaneq ajorpugut.

Sermitsiap Peqqissutsimut Naalakkersuisoqarfik kigutit narlorissarnissaannut periarfissat pillugit attaveqarfigaa. Taakkuali Peqqinnissaqarfimmi qullersanut innersuussipput. Sermitsiap innersuussineq malillugu Peqqinnissaqarfimmi qullersat attavigai. Allaaserisalli suliarineqarnerani taakkunanit akisoqanngilaq.

Nuna tamallerlugu qinikkat iliuuseqaqqugai

Paarnannguaq Mathiassen kigutit Nuup avataani narlorissarneqaqqittalissanersut pillugit naalakkersuinikkut nassuiaasoqarnissaanik kissaateqarpoq.

AAMMA ATUARUK

Kigutinik narlorissaanissamik neqeroorutip annertusineqarnissaa ilisimasallit misissussavaat

- Naalakkersuinikkut ersarissaasoqartariaqarpoq. Pisariaqassappallu Inatsisartutigut qaqinneqartariaqassagaluarpoq sineriammiut aamma periarfissaqalernissaat kigutimik narlorissarneqarnissaannut tunngatillugu, taanna oqarpoq.

Kigutinik narlorissaasarneq pisortat kigutileriffiini periarfissaajunnaassasoq 2019-imi aalajangerneqarpoq. Kigutit nakorsaannik immikkut ilinniarsimasunik pissaaleqineq taamanikkut tunngavilersuutit ilagaat. Pisortat kigutileriviini kigutinik narlorissaasarneq Nuummi 2021-mi atulersinneqaqqippoq, tassani meeqqat 40-t neqeroorfigineqarnissaat naatsorsuutigineqarluni. Taamanimiilli narlorissaasarnerup Nuup avataani periarfissaaleqqinissaa oqallisaajuartarpoq. Ukiut arfineq-marluk qaangiussimalerput. Ullorli manna tikillugu suli periarfissanngoqqinnikuunngilaq. 

Peqqissutsimut 2020-mi Naalakkersuisoq, Martha Abelsen (S), taamanikkut nalunaarpoq kigutinik narlorissaasarneq periarfissanngoqqissappat tamanna ukiumut 20 millionit koruuninik nunap karsianut akeqassasoq.

Sermitsiap Peqqissutsimut Naalakkersuisoq, Anna Wangenheim (D), kigutit narlorissarneqartarnerat pillugu politikkikkut suliniutit suliassallu suunerat pillugit apersornissaa sulissutigaa.