Kofoeds Skolep kommunimut isumaqatigiissut millionilikkaanik naleqartoq annaasinnaagaa
Eqqartuussissuserisut nalunaarutaat naapertorlugu Kommuneqarfik Sermersuup Kofoeds Skole-mik suleqateqarnera maannakkutut ingerlaannassappat suliariumannittussarsiuussisoqartariaqarpoq.
Kommuneqarfik Sermersuup Kofoeds Skole-mik isumaqatigiissutaa allanngortinneqartariaqarpoq, eqqartuussissuserisut naliliipput.
Toqqorsivimmit assi: Leiff Josefsen
Kommuneqarfik Sermersuup Nuummi Kofoeds Skolemik suleqateqarnera allanngortinneqassaaq.
Ingerlatsinermut suleqatigiinnermullu isumaqatigiissut 2019-imi atsiorneqarpoq, maannalu atuarfik isumaqatigiissummi piumasaqaatit naapertorlugit isumaginninnermik suliaqarnermini ukiumut kommunimit 5,34 million koruuninik tapiiffigineqartarpoq.
Eqqartuussissuserisulli nalunaarusiaa kommunip suliaritissimasaa naapertorlugu suliassat atuarfiup suliarisartagai suliariumannittussarsiuunneqartariaqarput.Tassa imaappoq allat Kofoeds Skole Nuummi sulianut unammillerlutik neqeroornissamut periarfissinneqassapput.
Atuarfiup kalaallinik isumaginninnermi sulisussanik ilinniartitsinissamut, kalaallit isumaginninnikkut ajornartorsiuteqarlutik pilersaarusioratik Danmarkimut aallartartut ikilisarnissaannut kiisalu kalaallit Danmarkimi najugaqarsimallutik utertut Kalaallit Nunaanni inuiaqatigiinnut suliffeqarnermullu ilanngunnissaannut ikiuunnissaa isumaqatigiissutip maanna atuuttup ilaatigut imaraa.
Ingerlatsivik aaqqiissutissanik pingasunik saqqummiussisoq
Periutsit pingasut kommunimi ingerlatsivimmit siunnersuutigineqarput, suleqatigiinnerlu inatsisinut naapertuutsilerumallugu taakku arlaat politikkerinit toqqarneqarsinnaavoq:
- Suliassat utertinneqarnissaat, tamatumalu Nuummi Kofoeds Skolep suleqatigiunnaarnissaa kingunerissavaa.
- Suliassanik tamanut suliarinnittussarsiorneq, tassa suliassat tamanut suliarinnittussarsiuunnerat ingerlaannassasoq.
- Aningaasat Nuummi Kofoeds Skolemut tapiissutitut akuersissutigineqassasut politikerit aalajangersinnaapput, taamaaliornikkulli kommuni neqeroorutip imarisaanut pitsaassusaanullu tassungalu atatillugu malinnaatitsinissamut piumasaqaateqarsinnaajunnaassasoq aaqqiissuteqarnerup kingunerissavaa.
Ataatsimiititaliap neqerooruteqartitsinikkut aaqqiissutissaq siunnersuutigigaa
Kommunimi Isumaginninnermut Innarluutilinnut Ataatsimiititap aaqqiissutissat aappaat akueraa; tassa suliassat allanik suliariumannittussarsiuunneqarnissaat.
Suliassaq maanna Aningaasaqarnermut Inuussutissarsiornermullu Ataatsimiititaliamut ingerlateqqinneqarpoq, taakkualu suliariumannittussarsiuussisoqarnissaa akuerissanerlugu sapaatip-akunnerani matumani marlunngornermi aalajangiiffigissavaat.
Kommuneqarfik Sermersuup aamma Nuummi Kofoeds Skolep isumaqatigiissutaat qaammatit arfinillit qaangiuppata atorunnaarsinneqarsinnaavoq.
Ilinniarfiup suliassai pisortanit inatsisitigut pisussaaffiusutut nalilerneqarneq ajormata ingerlaannassappata politikkikkut pingaarnersiuisoqartariaqarpoq.
Suliassalli ingerlateqqinneqarsinnaaniassammata suliariumannittussarsiuussisoqarnissaanik politikkikkut kissaateqartoqartoq (ullormi tamatumunnga tunngasumik sammisaqarfiusumi) ersersinneqareerpoq. Taamaammat ingerlatsivik suliariumannittussarsiuussinissamut atortussanik piareersaavoq; ''Nuummi Kofoed Skolemiit suliat isumagineqartut pillugit neqeroortitsisussaatitaaneq'', aaqqiissut aningaasaqarnermut ataatsimiititaliamit akuerineqarpat atorneqarsinnaasussaq.
