Kommunip kajumissaarisoq: Assakaasut quasattorsiutillit ilumut pisariaqarnersut eqqarsaatigiuk

Assakaasut quasattorsiutillit maannakkut ikkunneqassappat? Immaqa naamik.

Taama Kommuneqarfik Sermersuumi Sanaartornermut Avatangiisinullu Ingerlatsivimmit Facebookikkut allaaserisaat aallartippoq.

Kommunip maluginiaqquaa Nuummi aqquserngit aputeqaratillu maannakkut sermersimanngitsut ukiunilu kingullerni oktobarimi Aputeqartanngitsoq:

- Taamaattumik Kommuneqarfik Sermersuup biilertut kajumissaarpai assakaasut quasattorsiutillit ikkunneqarnissaat utaqqilaaqqullugit, aqquserngit silallu tamanna periarfissiineri najoqqutaralugit – aammalu ukiukkut assakaasut quasattorsiuteqanngitsut biilinut tulluartunik taarsiinissamut eqqarsaatigeqqullugit, ingerlatsivik allappoq.

Malittarisassat naapertorlugit assakaasut quasattorsiutit oktoberip aallaqqaataaniit apriilip 30-ata tungaanut atorneqarsinnaapput, taamaattumik assakaasussanik quasattorsiutilinnik taarsersuinissaq inatsisinut maannakkut naapertuuppoq.

Kommuneqarfik Sermersooq naapertorlugu assakaasut ukiuunerani atorneqartartut pitsaasut quasattorsiuteqanngitsut assakaasutut atorneqassasut maannakkut kajumissaarutigineqarpoq.

Tamatumunnga tunngatillugu Kommuneqarfik Sermersuumit tikkuarneqarpoq aqquserngit aserfallatsaaliornissaannut millionilikkaanik ukiut tamaasa atuisarluni, ilaatigut assakaasut quasattorfiutillit asfaltimut aserorterisarneri erseqqissarpaa, soorluttaaq assakaasut quasattorsiutillit aqqusinermi asfaltimilu pujoralammik avatangiisinut ajoqutaasumik annertuumik pilersitsisartut.

Kommunip soorunami aqqusinermi angallannermi isumannaatsuunissaq eqqarsaatigissallugu pingaaruteqartoq naqissusiivoq:

- Pissutsit naapertorlugit biilertarit.