Avannaata Kommuniata Qaanaami innuttaasunut sullissinerup pitsaanerulersinnissaa siunertaralugu, Naalakkersuisut maajimi 2020-mi suleqatigiinnissamik isumaqatigiissuteqarfigai.
Maanna ukiut arfinillit qaangiunneranni, Avannaata Kommuniani kommunalbestyrelsi marsip 27-anni ataatsimiinnermini, isumaqatigiissut atorunnaarsinniarlugu aalajangerpoq.
Avannaata Kommuniata Qaanaami innuttaasunut sullissinerup pitsaanerulersinnissaa siunertaralugu, Naalakkersuisut maajimi 2020-mi suleqatigiinnissamik isumaqatigiissuteqarfigai.
Maanna ukiut arfinillit qaangiunneranni, Avannaata Kommuniani kommunalbestyrelsi marsip 27-anni ataatsimiinnermini, isumaqatigiissut atorunnaarsinniarlugu aalajangerpoq.
Kommunip allaffeqarfianit politikerinut nalunaarusiami oqaatigineqarpoq, isumaqatigiissut aallaqqaammut siunertarineqartumit allaanerusumik ingerlasimasoq.
Toqqissisimanannginnerit aningaasartuuteqarnerillu
Isumaqatigiissut Qaanaami peqqinnissamik suliaqartut utoqqaat illuatalu qanimut suleqatigiinnerisigut innuttaasunut pitsaanerusumik sullissinissamik siunertaqarpoq. Isumaqatigiissulli Qaanaami utoqqaat illuanni sulisunut nanertuutaangaatsiarsimasoq, ingerlatsivimmit oqaatigineqarpoq:
- Isumaqatigiissutip malinneqannginnerata kingunerisaanik, Qaanaami utoqqaat illuanni sulisut utoqqaat angerlarsimaffianni suliassamik saniatigut innuttaasunik napparsimasunik isumassuinermik ulapputeqarsimapput, kommunip allaffeqarfia allappoq nangillunilu:
- Tamanna sulisut aqutsisullu akornanni toqqissisimajunnaarsitsivoq, tamatumalu saniatigut kommunip aningaasartuutit tamaasa — ilaatigut sulisunut, nerisassanut ingerlatsinermullu tunngasunut allanut aningaasartuutit nammineq akilertariaqarsimavai.
Kommunimit ingerlatsivimmit oqaatigineqartut naapertorlugit, Namminersorlutik Oqartussat aamma Qaanaami peqqissutsimik suliaqartut ajornartorsiut pillugu arlaleriarlutik ilisimatinneqartarsimapput, aaqqiissutissamilli nassaartoqarsinnaasimanani. Taamaattumik kommunimi ingerlatsivimmit innersuussutigineqarluni isumaqatigiissut atorunnaarsinneqassasoq, tamannalu kommunalbestyrelsimit akuersissutigineqarluni.
Utoqqaat pillugit oqaaseqartartoq isumaqatigiissutip atorunnaarsinneqarnissaanik piumasaqartoq
Isumaqatigiissut 2023-mi februaarimi taamanikkut utoqqaat pillugit oqaaseqartartumit Inga Egedemit sakkortuumik isornartorsiorneqarpoq, taannami isumaqarami isumaqatigiissut ingerlaannarluni atorunnaarsinneqartariaqartoq.
Taassumami naliliinera naapertorlugu, isumaqatigiissutip kingunerisaanik Qaanaami utoqqaat illuata peqqissutsimut isumaginnittunit napparsimmavittut atorneqarnera najugaqartunut sulisunullu ajoqutaalluinnarmat.
Taamanikkut borgmesteriusup Palle Jerimiassenip uppernarsarpaa, isumaqatigiissut utoqqaat illuanni sulisut toqqissisimajunnaarnerannik kinguneqartoq, ilaatigut utoqqaat illuata napparsimmavittut aamma atorneqalernerata kinguneranik sulisut ilinniaqqinnermikkut piginnaanngorsarneqarsimanngimmata.
Naalakkersuisunut tamanna saqqummiunniarlugu, taamanikkut borgmesteriusup oqaatigaa.
