Kujataani helikopterimik ilaasunik ingerlassineq tamanut suliariumannittussarsiuunneqartoq

Qaqortup mittarfiata ammarneqarnerata kingorna nunatta kujataani angalariaaseq allanngorpoq, taamaammallu nunap immikkoortuani angallassineq eqqarsaatigeqqinneqartariaqarpoq.

- Qaqortumi mittarfik nutaaq angalariaaseq allanngortillugulu nunatta kujataa tamakkerlugu angallassinermik aaqqissuussinermi periarfissanik nutaanik ammaassissasoq, ineqarnermut, attaveqarnermut, isorliunerusunut upalungaarsimanermullu naalakkersuisoq Iddimanngiiu Jensen Bianco oqarpoq.

Assiliisoq: Oscar Scott Carl

Hanna Hviid Hanna Hviid Tusagassiortoq

Saqqummersinneqarpoq 2. Aggusti 2026 - 10:02

Nunatta kujataani helikopterimik ilaasunik angallassinermut sullissinissamik isumaqatigiissut tamanut suliariumannittussarsiuussinikkut neqeroorfigineqarsinnaanera maanna ammaanneqarpoq.

Taama ineqarnermut, attaveqarnermut, isorliunerusunut upalungaarsimanermullu naalakkersuisoq Iddimanngiiu Jensen Bianco (IA) tusagassiuutinut nalunaarummi allappoq.

Qaqortumi mittarfiup nutaap ammarneqarneratigut ingunerisaanillu angalariaatsip allanngornerani, nunap immikkoortua kujataa tamakkerlugu angallassinerup eqqarsaatigeqqinneqarnissaa pisariaqartinneqalerpoq.

Ussassaarut

- Qaqortumi mittarfiup nutaap angalariaasioreersoq allanngortissavaa, aammali nunatta kujataa tamakkerlugu angallassinermik aaqqissuussinermi periarfissanik nutaanik ammaassissaaq. Taamaammat tassunga atatillugu ataatsimoorluta helikopterimik ilaasunik angallassinermi nutaamik pisariitsumillu aaqqissusiornermik, nunap immikkoortuani inuiaqatigiinni allannguinernik isiginiartussamik periarfissaqarnerput nuannaarutigaara.

- Kikkut tamarmik periarfissaqartut, soqutigisaqartut naammassinnissinnaasullu suliariumannittussarsiuussinermi neqeroornissaanik kaammattorumavakka, taamaalillutillu pitsaanerpaamik angallassinikkut aaqqiissuteqarnissatsinnik qulakkeerinneqataallutik, taanna oqarpoq.

Nunatta kujataani helikopterimik ilaasunik angallassinermut sullissinissamik isumaqatigiissut nutaaq ulloq 1. maj 2027 aallartiffissaqarpoq, 2030-llu naanerani sullisinissamik isumaqatigiissutit sinneruttut ingiaqatigalugit atorunnaassalluni. 