Kunngi Maniitsumukarpoq - Kangerlussuarmullu ingerlaqqissalluni

Kunngi Frederik X Nuummi politikkikkut nuimasunik, atuartunik innuttaasunillu hunnorujukkaanik ilassinninnereerluni Maniitsumut Kangerlussuarmullu ingerlaqqippoq. Tassani inuusuttunik, inuussutissarsiortunik, sakkutuunik inuiaqatigiinnillu naapitsilluni Issittumi angalanermini inuit soqutigisaannik sammisaqarfiusussami malunnartinneqassaaq.

Kunngip Frederiup Issittumi tunngaviusumik ilinniarfimmeersut ilassivai.

Assi: Oscar Scott Carl

Hollie Olsen Kielsen Hollie Olsen Kielsen Hollie Olsen Kielsen Tusagassiortoq

Saqqummersinneqarpoq 19. Februaari 2026 - 13:18

Annonse

Kim Kielsen Jens-Frederik Nielsenilu Kunngi Frederimmut tikulluaqqusipput.

Kunngi Frederik X Nuummut pingasunngornermi februaarip 18-ianni nalunaaqutaq 11:34 tikippoq. Tassani Naalakkersuisut siulittaasuannit Jens-Frederik Nielsenimit Inatsisartullu siulittaasuannit Kim Kielsenimit tikilluaqquneqarpoq. Jens-Frederik Kimilu Kunngimik tikilluaqqusinerminni tungujortunik annoraaqarput.

Kunngip meeqqat Mikisumeersut ornigussimasut naalagaaffiup sinniisaanukartilluni Julie Præst Wilchemut ilassiorpai.

Taava Hans Egedep illuanukarpoq, tassanilu Katuap igaffiani nerisassiarineqartunik ulloqeqqasiutitorluni. Kingorna pisuinnaq inunnik malitseqarluni GUX Nuummukarpoq.

GUX Nuummi inuiattut erinarsuut “Nuna Asiilasooq” atorlugu tikilluaqquneqarpoq, kingornalu atuartut naapissallugit klassiannukarluni.

Pisussarpassuit

Kunngi Frederik Royal Greenlandip aalisakkanik tunisassiorfiani takornariartinneqartoq.

Kunngip ilaatigut aalisakkerivik Royal Greenland, umiarsuaq alapernaarsuut Vædderen aamma Issittumi Sakkutooqarfik ualikkut pulaarpai. Ullormilu pilersaarutit naggaserlugit Katuami innuttaasunut kaffillertunukarluni.

Kunngip Nuummi tikeraarnera Hans Egedep Illuani nalunaaqutaq 19.00 nerinermik naggaserneqarpoq, tassani Jens-Frederik qaaqqusisuulluni.

Ullumi pisussat

Kunngi ullaaq manna, februaarip 19-ianni, Maniitsumut tikippoq.

Kommunalbestyrelsimi ilaasortat ulloqeqqasioqatigissagai pilersaarutaavoq. Tamatuma kingorna Maniitsup aqquserngi pisuinnaq ingerlaarfigalugit innuttaasut ilassinissaannut periarfissaqassalluni. Kingorna suliffeqarfimmut inuussuttunit aallarnisaasunit pigineqartumu Maniitsoq Lodgesimut pulaassaaq,

Kunngi Maniitsoq Lodgesimiit biilerluni katersortarfimmi kaffillertunukassasoq pilersaarutaavoq, kingornalu Kangerlussuarmut ingerlaqqissalluni.

Kunngi Frederik Katuamut apuummat nuannaartunnguaqarpoq.

Kangerlussuarmut ualeru nalunaaqutaq 17.50 tikinnissaa naatsorsuutigineqarpoq, tassanilu Frederik Qulingat KFUM-ip sakkutuunut angerlarsimaffiani innuttaasunik ilassinninnissamut periarfissaqassalluni.

Aqagumut pilersaarut

Aqagu, februaarip 20-anni nalunaaqutaq qulingiluanut Kangerlussuarmi Issittumi Tunngaviusumik Ilinniarfik pulaassavaa, tamatumalu kingorna nalunaaqutaq qulinut Black Ridgemi issittumi ilinniarfiup tammaarsimaffianukassalluni. Motoorilinnik angallateqarluni tassungassaaq.