Landry apersorneqarnermini: Trumpip Kalaallit Nunaat puiorsimanngilaa

Jeff Landry, Donald Trumpimit Kalaallit Nunaannut immikkut aallartitatut toqqagaasoq, tupaallannartunik oqaaseqaqqippoq.

Oqaatsit taakku The Alex Marlow Show-imi apersorneqarnermini oqaatigai, aallakaatitassiallu ilaa X-imi siammarterneqarpoq.

Donald Trump sapaatip-akunnerata naanerani oqaloqatigisimallugu, Trumpillu Kalaallit Nunaat puiorsimanngikkaa, Jeff Landry ilaatigut oqaluttuarpoq.

Ukioq manna siusinnerusukkut Nuummut tikeraarnermi kingorna isummersimalluni kalaallit "USA-mut ilanngunnissartik“ kissaatigigaat, Jeff Landry apersuisumut oqaluttuarpoq:

- USA-mut qanimut suleqatiginnikkusupput, tuluttut ilinniartitsisut amerlanerusut sakkutuullu amerlanerusut Kalaallit Nunaanni najugaqalernissaat kissaatigaat, Jeff Landry oqarpoq.

Aammattaaq oqaluttuaraa USA-p Kalaallit Nunaat qanoq ’pigilersinnaaneraa’.

Amerikamiut sakkutooqarfitoqaat inuttalersoqqinneqarnerisigut, USA-p Kalaallit Nunaatalu akornanni toqqaannartumik umiarsuartigut timmisartukkullu angallannikkut niuertoqarsinnaalissasoq, Landry isumaqarpoq.

- Iliuuserisinnaasavut amerlaqaat, isumaqarlungalu taakkua toqqaannartumik uatsinnut ilanngutitinnissaannut iluaqutaasinnaasut, Jeff Landry naliliivoq.

Inuiattut ullorsiornermut atatillugu Landry aamma maluginiarneqarpoq, Kalaallit Nunaannut pilluaqqusinermini aappaagu Kalaallit Nunaat USA-mut naalagaaffinngorsinnaasoq.

Nunanut allanut tunngasunut naalakkersuisup Múte B. Egedep (IA) Landryp oqaasii ima isornartorsiorpai:

- Piumanngilagut. Kalaallit Nunaata siunissaa Kalaallit Nunaanni aalajangerneqassaaq. Suleqatigiisitanik suliaqartoqarnerani taama oqaaseqartoqarnera, Kalaallit Nunaannut Kunngeqarfimmullu ataqqinninngitsuliorneruvoq, Múte B. Egede oqarpoq.

Jeff Landryp oqalugiaataanik videoliaq takuuk.