Landryp Jens-Frederik Nielsen itigartitsereersorlu isornartorsioraa
Naalakkersuisut siulittaasuat kanngusuttariaqartoq, USA-p Kalaallit Nunaannut immikkut aallartitaa Jeff Landry oqarpoq. Jens-Frederik Nielsenip Amerikamiut umiarsuarmik napparsimmavittut atugassamik Kalaallit Nunaannukartitsisinnaanera sapaatiummat itigartitsissutigereeraalu isornartorsiuineq pivoq.
Jeff Landry Louisianami guvernøriuvoq, Donald Trumpimiillu Kalaallit Nunaannut immikkut aallartitatut toqqarneqarnikuulluni.
Assi: Brendan Smialowski/AFP/Ritzau Scanpix
Naalakkersuisut siulittaasuata Jens-Frederik Nielsenip (D) Kalaallit Nunaata Amerikamiut umiarsuaat napparsimmavik, USA-p præsidentiata Donald Trumpip Kalaallit Nunaannut aallartitassaa, tikilluaqqorusunnagu sapaatiummat oqaatigaa.
Taamatut oqarnera USA-p Kalaallit Nunaanni immikkut aallartitaata Jeff Landryp sakkortuumik qisuariarfigaa. Jens-Frederik Nielsen kanngusuttariaqartoq inuit nittartakkatigut naapittarfianni X-imi allappoq:
- Naalakkersuisut siulittaasuat Jens-Frederik Nielsen kanngusugit!
- Præsidenti @realDonaldTrump Amerikamilu innuttaasut isumaalupput, Landry allappoq.
Landryp "kalaalerpassuit ulluinnarni ajornartorsiutaat pillugit oqaloqatigisimallugit", peqqinnissaqarfillu immikkut maluginiarnartoq allappoq.
- Kalaallit Nunaata peqqissuunera USA-p isumannaatsuuneranut pingaaruteqarpoq
- Tunngaviusumik pisariaqartinneqartut amerikamiut taamaattussaannartut isigisaat nunaqarfippassuit illoqarfinnilu minnerni amigaatigaatigineqarput. Inoqarfiit minnerit aalajangersimasumik nakorsaqanngillat, nappaammik suussusersiutissanik atortorissaaruteqanngillat immikkut ittumik katsorsaaveqaratik – taamaattumik innuttaasut katsorsarneqarniarlutik ungasissumut angalasariaqartarput, naak najukkaminni taamaaliorsinnaasariaqaraluarlutik. Kalaallit Nunaata peqqissuunera USA-p isumannaatsuuneranut pingaaruteqarluinnarpoq, Jeff Landry X-imi allappoq.
Præsidentip Jeff Landry suleqatigalugu “umiarsuarmik napparsimmaviusumik” inunnik isumagineqanngitsunik nakorsiarfiusinnaasoq Kalaallit Nunaannut aallartinniarlugu Donald Trumpip nalunaarutaa, Jens-Frederik Nielsenip sapaatiummat qisuariarfigaa.
- Maanngaanniit qujaannarpugut. Præsident Trumpip amerikarmiut umiarsuaat napparsimavik Kalaallit Nunaannukaanniaaraa paasivarput. Nunatsinnili akeqanngitsumik tamanit atorneqarsinnaasumik peqqinnissaqarfeqarpugut. Tamanna asuliinnaq aalajangigaanngilaq. Inuiaqatigiinni pingaaruteqarluinnartuuvoq aamma, Jens-Frederik Nielsen Facebookimi allappoq.
USA-p isumannaatsuunissaa peqqissutsimut atassuserneqartoq
Trumpip “umiarsuaq napparsimasoq pitsassuaq” Kalaallit Nunaannut aallartinnissaa Truth Socialimi saqqummerpoq. Issittumi Sakkutooqarfik aqqartartumi inuttaasumik Dronning Ingridip Napparsimavissuanut Nuummiittumut aallarussinerata kinguninngua taama nalunaaruteqarpoq.
Qanoq iliortoqassanersoq pillugu paasissutissanik tigussaasunik soqanngilaq, aamma danskit kalaallillu oqartussaasui tamanna pillugu USA-mit saaffigineqarsimagunaratik.
Peqqissuseq USA-p isumannaatsuuneranut attuumassuteqartoq X-imi saqqummiussamini eqqaavaa:
- USA Kalaallit Nunaata illersornissaanut pisussaaffeqarpoq, tassungalu innuttaasut nappaatinut naalliuutinullu tunngaviusumik katsorsarneqarsinnaanerannut qulakkeerinninnissaq ilaavoq.
Allaaserisami allami nakorsat peqqissaasullu Kalaallit Nunaanni "suliartortitaanissamut" soqutiginnittut qutsavigai.
