Løkke erseqqissaavoq: USA Kalaallit Nunaanni sakkutooqarfimmik sanaartornermut nammineq akiliissaaq

USA-p isumannaallisaanermut illersornissamullu isumaqatigiissut nutaaq tunngavigalugu Kalaallit Nunaanni sakkutooqarfinnik nutaanik pilersitsinissaa nammineq akisussaaffigaa.

Tamanna nunanut allanut ministerip Lars Løkke Rasmussenip (M) Ritzauimut erseqqissarpaa.

- Amerikamiut Kalaallit Nunaanni sakkutooqarfiliornissaat soorunami amerikamiunit aningaasalersorneqassaaq, nunanut allanut ministeri oqarpoq.

Isumaqatigiissummi aningaasalersuinissaq pineqanngitsoq, Lars Løkke oqarpoq.

USA-p præsidentiata Donald Trumpip USA, Danmarki Kalaallit Nunaallu isumaqatigiissuteqarumaartut tallimanngormat siullermik nalunaarutigaa, oqaatigalugulu isumaqatigiissut akeqassanngitsoq.

- Isumaqatigiissut USA-mut aningaasartuutaanavianngilaq, Trump Truth Socialimi allappoq ilaatigut "no cost" atorlugit.

Apeqqut: (Trumpi) Qanoq ililluni oqarsinnaava aningaasanik naleqarnavianngitsoq?

- Taanna nammineq aperisariaqarpat, Lars Løkke oqarpoq.

- Nunaminertamilli attartornerat akilerneqassanngilaq, nangilluni oqarpoq.

USA-p Kalaallit Nunaanni sakkutooqarfissaanut nutaanut marlunnut “piumasaqaatit sukumiinerusut” isumaqatigiissutigineqaqqaassasut, Løkke nangilluni oqarpoq.

Sakkutooqarfiliornermimi avatangiisit aamma kalaallit inooriaasiat kulturiallu eqqarsaatigineqartussaapput.

- Pingaarutillit taakku 1951-imi isumaqatigiissummut sanilliullugit Kalaallit Nunaata nukittunerulerneranut pissutaapput.

Lars Løkkep naqissuserpaa USA nammineq akiliissasoq assersuutigalugu Pituffimmi, USA-p Kalaallit Nunaanni ullumikkut sakkutooqarfigisatuaani, pitsanngorsaanerit suliarineqassappata.

- Tamanna ersarilluinnarpoq, oqarpoq.

Pituffimmi Space Base siornatigut Thule Air Base-tut ilisimaneqarpoq, Amerikamiut sakkutuui 150-it missaanniipput.

Isumannaallisaanermut illersornissamullu isumaqatigiissummi nutaami allassimavoq USA nunaqarfimmi Narsarsuarmi Mestersvigimilu sakkutooqarfiliornissaanut akuerisaasimasoq.

Nunanut allanut ministereqarfiup allakkatigut akissummini uppernarsarpaa nunat taakkua pingasut akornanni isumaqatigiissutaanni "aningaasaliinissaq pineqanngitsoq".

RITZAU