Naalakkersuisut nutaat inissipput. Nunanut allanut tunngasunik ataatsimiititaliaq pingasunngornermi danskit nalunaaqutaat malillugu 10.30 ataatsimiippoq, oqaluuserisassanilu siulleq tassaavoq Kunngeqarfiup USA-mut attaveqarnera.
Naalakkersuisut sinnerlugit nunanut allanut ministeri Lars Løkke Rasmussen (M) illersornissamullu ministeritut ivertinneqarlaaq Jeppe Bruus (S) ataatsimeeqataapput.
Naalakkersuisut nutaat inissipput. Nunanut allanut tunngasunik ataatsimiititaliaq pingasunngornermi danskit nalunaaqutaat malillugu 10.30 ataatsimiippoq, oqaluuserisassanilu siulleq tassaavoq Kunngeqarfiup USA-mut attaveqarnera.
Naalakkersuisut sinnerlugit nunanut allanut ministeri Lars Løkke Rasmussen (M) illersornissamullu ministeritut ivertinneqarlaaq Jeppe Bruus (S) ataatsimeeqataapput.
Kalaallit Nunaat sinnerlugu Folketingimut ilaasortat marluk, Qarsoq Høegh-Dam Naleqqameersoq aamma Naaja H. Nathanielsen Inuit Ataqatigiinneersoq pingasunngornermi ataatsimiinnermi aamma peqataapput.
Suleqatigiissitat pilersaarutit malillugit ingerlasut anguniagarli suli anguneqanngitsoq nunanut allanut ministeri Lars Løkke Rasmussen ataatsimiinnerup kingorna tusagassiortunut, matumanittaaq nunatsinni tusagassiivinnit Sermitsiamit KNR-imiillu, takkussimasunut oqarpoq
USA-mut attaveqarnerup saniatigut ataatsimiisitaliami Ruslandip Ukrainemik tiguaanera, Kangiani Qiterlermi pissutsit, nunat tamalaat akornanni sorsunnerit kiisalu Danmarkip FN-imi isumannaallisaanermut siunnersuisooqatigiinni ilaasortaanera oqaluuserissavaat.
FOLKETINGEMI ATAATSIMIISITALIAT INISSIPPUT
Ataatsimiititaliat ataavartut 20-nik amerlassuseqartut Folketingimi juunip pingajuanni naalakkersuisunngortitsinerup kingorna pilersinneqarput. Ataatsimiisitaliat siusinnerusukkut 30-nik amerlassuseqarsimagaluarput. Tamannalu ataatsimiisitaliat ilaasa eqiterunneqarsimanerannik isumaqarpoq.
Ataatsimiititaliat ataatsimut eqiterunneqartut ukuupput:
Suliffeqarnermut Naligiissitaanermullu Ataatsimiititaliaq Meeqqanut, Ilinniartitaanermut Ilisimatusarnermullu Ataatsimiititaliaq Inuussutissarsiornermut Digitalimullu Ataatsimiititaliaq Nunamut Namminermut, Ineqarnermut Nunaqarfinnullu Ataatsimiititaliaq Kultureqarnermut Ilageeqarnermullu Ataatsimiititaliaq Peqqissutsimut Utoqqaat Atugaannut Ataatsimiititaliaq Nunanut Allanut Illersornissamullu Ataatsimiititaliaq
Ataatsimiititaliat allat maannamut ataatsimiititaliatut ingerlaqqittut tassaapput:
Sulinermut ataatsimiititaliaq Europamut ataatsimiititaliaq Aningaasaqarnermut ataatsimiititaliaq Savalimmiunut ataatsimiititaliaq Kalaallit Nunaannut ataatsimiititaliaq Innuttaasut pisinnaatitaaffiinut ataatsimiititaliaq Silap pissusianut, nukissiornermut pilersuinermullu ataatsimiititaliaq Avatangiisinut inuussutissanullu ataatsimiititaliaq Inatsisinik atortitsinermut ataatsimiititaliaq Akileraartarnermut ataatsimiititaliaq Isumaginninnermut ataatsimiititaliaq Assartuinermut ataatsimiititaliaq Nunanit allaneersut akulerutsitsinerillu pillugit ataatsimiititaliaq
Najoqqutaq: Folketinget.dk
Nunanut allanut tunngasunut ataatsimiititaliap ataatsimiinneri isertuunneqarlutillu oqaluuserineqartut imaqarniliarineqarneq ajorput.
Matoqqasumik ataatsimiinnermi pissuserissaarneq
Nunanut allanut ministeri Sermitsiamut nassuiaavoq:
– Tamakkiisumik isigalugu ukiortaap nalaani qanoq issimanerput sanilliutissagaanni ullumikkut sutigut tamatigut ajunnginnerusumik inissisimasugut oqarsinnaavunga.
– Marloqiusamik attaveqarpugut, tassani matoqqasumik ataatsimiinnermi pissuserissaarniarlutalu USA-p piumasaqaataasa isumannaallisaanermut tunngasunut inatsisit naapertorlugit eqqortinniarsaralugillu tamatuma saniatugut Kunngeqarfiup killissarititaasa ataqqineqarnissaat qulakkeerniarlugit siunissami atuuttussamik isumaqatigiissuteqarniasaraagut.
– Tamatuma saniatigut Issittumi NATO-mik suleqateqarnissaq annertooq iluatsipparput. Kalaallit Nunaata Issittullu illersorneqarnissaa USA-mit isumagineqassasoq Amerikamiut ukiup ataatsip matuma siorna isumaqarput. Tamannattaaq NATO-mut attuumassuteqartoq kingorna akuersaarneqarpoq, Lars Løkke Rasmussen, nunanut allanut ministerit NATO-mut attuumassuteqartut Helsingborgimi maajip 21-ani 22-anilu ataatsimiinnerannut, ilaatigut Amerikamiut nunanut allanut ministeriata Marco Rubiop saniatigut nunanut allanut naalakkersuisumit Múte B. Egedemit peqataaffigineqartumut innersuussisoq, oqarpoq.
– Taamaalilluni Kunngearfik Danmark imaluunniit USA, kisimiillutik Issittumi unammilligassanik isumaginnittuussanngillat. Tamakku NATO-mi suleriutsit malillugit isumagineqassapput. Taamaammat sutigut tamatigut ajunnginnerusumik inissisimavugut. Sulialli naammassineranik isumaqanngilaq. Præsidentip tullia J.D. Vance nunanullu allanut ministeri Marco Rubio suliakkiisoralugit qaffasissumiilluta, suliallu piffissap ilaani naammassineqartariaqartut ilisimalluinnarparput.
– Tamatumanittaaq præsidenti nammineerluni suleqataasariaqarpoq, Lars Løkke Rasmussen oqarpoq.
Suliaq ingerlalluartoq sulili naammassinngitsoq
Lars Løkke Rasmussen suleqatigiissitat killiffiat pillugu aperineqarami "ataatsimiinnerit arlallit" ingerlanneqarsimasut, sulili ataatsimeeqattaaqqittoqassasoq oqaluttuarpoq.
– Suli naammassinngilagut. Suliarli ingerlalluarpoq, taanna oqarpoq.
Kunngeqarfiup USA-mut attaveqarnerata saniatigut Ruslandip tiguaanerata kingorna Ukrainemi pissutsit, Kangiani qiterlermi pissutsit, nunani tamalaani suliaqarnerit kiisalu Danmarkip FN-ip isumannaallisaanermut ataatsimiititaliaanut ilaasortaanera aalajangiisartunit aamma eqqaaneqarput.
Nunanut allanut tunngasunut ataatsimiititaliami ataatsimiinnerit isertortuusarlutillu eqqartukkat allanut oqaatigineqaqqusaanngillat.
Inatsisissatut siunnersuutip suliarineqarnera
Ataatsimiisitaliat naalakkersuisooqatigiit juunip pingajuani pilersinneqarnerani 20-nut ikilisinneqarput. Tamatuma saniatigut Folketingimi partiit aasamut ataatsimiinnissamut pilersaarut isumaqatigiissutiineqarpoq.
Siunnersuutinik marlunngornermi juunip 16-iani saqqummiussisoqarsinnaavoq, inatsisissatut siunnersuutit aalajangiiffigisassatullu siunnersuutit sisamanngornermi juunip 18-iani immaqalu tallimanngornermi juunip 19-iani siullermeerneqassapput. Inatsisissatut siunnersuutit marluk, tassa angallannermi ilanngaatip qaffannissaa pillugu naalakkersuisut ilimasaarutigisimasaat aamma pigisanik nalilersuisarneq pillugu inatsisissatut siunnersuut, ilaatigut sisamanngornermi siullermeerneqarnissaat naatsorsuutigineqarpoq.
Tamanna pillugu juunip 23-ani ataatsimiittarfimmi ataatsimiittoqassaaq, pingasunngornermilu juunip 24-anni nal. 13.00 ministerit apeqqarissaarfigineqarlutillu siunnersuutit siullermeerlugit suliarineqassapput.
Naggasiutigalugu juunip 25-ani ataatsimiittoqassaaq. Tassani ministeriunerup Mette Frederiksenip naalakkersuisut inatsisissatut siunnersuutinik tulleriiaaralutik arlalinnik aggustimi Folketingimi suliarineqartussanik saqqummiussiumaartut naatsorsuutigalugu ilisimatitsivoq.
Folketingip ataatsimiittarfia juunip 26-anit oktobarip aallaqqaataata tungaanut ataatsimiiffiuneq ajorpoq.
