Halibut Greenlandip Ilulissani tunisassiorfini 50 millionit sinnerlugit atorlugit allililerpaa

Halibut Greenland ApS Ilulissani pingaarnertut qaleralinnik saarullinnillu tunisassiortuuvoq. Suliffeqarfiup 2008-mi aallartinneqartup, tunisassiorfini maanna mikigilerpaa. Illuutit tunisassiornermi atorneqartut 500 kvadratmeteri sinnerlugu annertussusilinnik ilaneqartussanngortut, ingerlatseqatigiiffiup pisortaa oqarpoq.

- Suliarinnikkusullutik neqeroornikunut isumaqatigiiniarnerit maana ingerlappagut, Erik Sivertsen Sermitsiamut oqarpoq.

Kikkut sanaartortuussanersut suli isumaqatigiinniartoqarnera innersuussutigalugu oqaatigisinnaangilai. Nivariarnerulli siulliup ukioq manna pinissaa naatsorsuutigaa.

- Sanaartornerup ukiuni marlunni ingerlanissaa siunnersortitta naatsorsuutigaat, sivikinnerulaarnissaali neriuutigaara, pisortaq oqarpoq. 

AAMMA ATUARUK

Halibut Greenland aningaasaliineruniarpoq

Nunaminertat atorneqartussat kommunimit akuerineqareertut, illutassat titartarneqareertut, aningaaserivillu aningaasaleeqataarusuttoq taanna aamma oqarpoq.

Tunisassiorfimmik alliliineq suliffeqarfimmut qanoq akeqarumaassanersoq pillugu apeqqut pisortap ima akissutissaqartippaa:

- Aningaasat 10 millionilikkaat arlallit atorlutigit alliliiniarpugut. 50 millionit koruunit sinnerlugit akeqassaaq.

Nalittorsaanerorusuttut

Tunisassiorfiup maanna piusup kangiatungaani aalisakkanut tigooraavimmik, immikkoortitseriffiusumik, illumik sanaartortoqassaaq. Tunisassiorfiullu maanna piusup kitaatungaani illumik sanaartortoqareerpat qeritisiviup annersaa nuunneqassaaq. Taakkua maanna tamarmik illup tunisassiorfiusup iluaniipput. Nuunneqarpali tunisassiorfimmik alliliinissaq periarfissanngussaaq. Tunisassiorfiit suliffiusut marlunngussammata.

- Maannakkut tunisassioraangatta tunisassiorfik ataaseq atorlugu taamaallaat tunisassiorpugut. Tamanna isumaqarpoq aalisagaqatigiit ataatsit suliarineranni allanik suliaqarsinnaanata. Allannguerusunnerup aallaavigivaa aalisakkat assigiinngitsut marluk ataatsikkut suliarisinnaaneri. 

- Aalisagaqatigiit ataasiinnaat suliarineranni nalittorsaaneq akigalugu tunisassiupallattaratta. Taava alliliigutta aalisakkat marluk annertunermik tigooqqakkagut (qaleralik saarullillu, aaqq.) nalittorsarnerusinnaalissavagut, Erik Sivertsen oqarpoq.

Aalisakkat tunisassiat, soorlu qalerallit saarulliillu, aalisagaqatigiittut ataatsimoortillugit arlariisillugit qeritinneqartarput, siunissamili ataatsiakkaarlernissaat sulissutaavoq, taamaaliornikkut nalittorsaaneq anguneqassasoq, pisortaq oqarpoq. Aalisagarli tisaneqareersoq maanna igiinnarneqartartoq suli atorluarneqarnerorusuppoq.

- Taamaaliorutta (alliliisoqarpat, aaqq.) aamma immitsinnut periarfississaagut aalisakkamiittut eqqaannartakkat tunisassiarisinnaanerinut. Assersuutigalugu ersai, manui, oqai, qutui, tunisassiareriikkagut annertunermik tunisassiarisinnaalissavagut. Puttaqutai aamma tunisassiarisinnaalissavagut, nunarsuarmi niuerfinni tunisaavoq. Tisagaangatta tisaanngortup sinnera igiinnarnagu aamma nerpia aserortersinnaalissavarput, pisortaq pilersaarutini pillugit oqarpoq.

Amoniakkimit CO2-mut

Tunisassiorfiup allilerani illuutit kisimik sanaartorneqaratik atortut aamma nutarsarneqassapput. Nillusaatit tunisassiorfiup maannakkut atugai amoniakkimik atuipput. Taakkua atorunnaarlugit CO2-mik atuilissapput. Kiak tassannga pinngortoq aamma atorluarneqassaaq.

- CO2-mik atuinermi kiak pilersinneqartoq atorluarlugu illuutit ilaat kiassarneqassapput, Erik Sivertsen oqarpoq.

Halibut Greenland ApS 141-nik piginnittoqarpoq. Taakkunannga 121-it sinerissamut qanittumi aalisartuupput. Suliffeqarfik ukioq 2025-imi akileraareerluni 27.7 millionit koruuninik sinneqartoorpoq. Tunisassiorfiullu piorsarnerata saniatigut aallanik aamma anigaasaliinissamut sulissuteqartoq, pisortaq oqarpoq. 

- Sulisunut inissiat 24-it sanaartorneqarnissaat aamma suliniutaavoq. Inissiat titartarneqareerput.

- Sulisut 79-pput. Illunik ukiuni kingullerni tuniniakkanik, 20 millionit koruuninik missaannik atuilluta pisivugut, inissiamik aamma maanna attartorput, taakkuli naammanngillat, Erik Sivertsen oqarpoq.