Atuakkanik nioqquteqartartut unamminiagaqarput

Milik Publishing kalaallit saqqummersitsiviisa allat assigalugit atuakkani pisiniarfinni nerrivinnut saqqummersinneqarnissaat ajornakusoortippaa. Ajornartorsiutit ilaatigut atuakkanik pisiniarfik Atuagkat januaarimi 2025-mi matummat aallartipput. Nunamut tamarmut tuniniaaneq siammarterinerlu ukiuni amerlasuuni unammillernarsimapput. Ullumikkut pingaarnerpaamik katersugaasivinni aammalu takornarianut pisiniarfinni atuakkanik tuniniaasoqarpoq.

- Brugseni Pilersuisorlu siornatigutut atuakkanik tuniniaaleqqinnissaat kissaatigaara. Inuit tunissutissamik pisiniarlutik ulluinnarni pisiniarfinniittartut atuakkamik pisinissamut amerlanerusumik isumassarsisinneqarsinnaagaluarput, Milik Publishingimik piginnittoq Lene Therkildsen oqarpoq.

Kalaallit Nunaanni Atuakkiortut Peqatigiiffiat, Kalaallit Atuakkiortut, aammalu saqqummersitsiviit ukiuni ingerlanerini oqariartuutigiuarsimavaat, atuakkat nunami tamarmi pissarsiarineqarsinnaanissaat qulakkeerniarlugu pisortat Pilersuisoq sullissinermut isumaqatigiissusiorfigissagaat.

Kalaallit oqaluttuaat nipinneqassapput

Milik Publishing meeqqanut atuakkanik, oqaluttuanik, inuiaqatigiinni oqallinnermik pilersitsisunik kiisalu eqqumiitsuliornermut, pinngortitamut oqaluttuarisaanermullu tunngasunik atuakkanik assigiinngitsorpassuarnik saqqummersitsisarpoq. Saqqummersitat tamarmik Kalaallit Nunaanni tunngaveqarput.

- Soorunami taanna saqqummersitsiviup piuneranut tunngavigineqarpoq. Taamaattumik kalaallit atuakkiortut eqqumiitsuliortullu nipinneqarnissaat peqataaffigissallugu pingaaruteqarsimavoq, Lene Therkildsen oqaluttuarpoq.

Atuakkat amerlanertigut aamma qallunaatut saqqummersinneqartarput Danmarkimiilluunniit atuakkanik pisiniarfitsigut tunineqartarlutik, soorlu tuluttut naqiterneqarsimasut ilaasa nunatsinni takornariat amerlasuut akornanni kalaallit kulturiannik saqqummiussisuullutik. Naqiterisitsivik nunatsinni killeqarfiit avataanni aamma iluatsitsisimavoq.

Milik Publishingip atuakkiortut atuagaannut pisinnaatitaaffiit naqiterisitsivinnut nunani allaniittunut tunisarpaat, taakku kingorna atuakkat oqaatsiminnut nammineq saqqummersissinnaavaat. Kalaallit Atuakkiortut ukiuni kingullerni tamatuma iluani atuakkanik saqqummersitsisarfissuarnut nunarsuarmi tamalaanut peqataasarnikkut kiisalu nutserinermut tapiissutit periarfissaalersillugit annertuunik suliaqarsimapput.

Milik Publishingip atuakkiortortaasa iluatsitsilluartut ilagaat Niviaq Korneliussen. Taassuma aallartilluni oqaluttualiaa, Homo Sapienne, nunani 15-init amerlanerusuni naqiterisitsivinnut tunineqarsimavoq.

Atuakkat oqaatsinut kulturimullu pingaaruteqarput

Lene Therkildsen naapertorlugu atuakkat kalaallisut oqaatsinut tunngatillugu aamma pingaaruteqarput.

Meeqqanut atuakkat kalaallisut allatat meeqqat oqaatsiminnik kinaassutsiminnillu nukittorsaataapput. Atuakkat ilaat oqaatsinik marlunnik allatat oqaatsinik ilinniartitsinermut atatillugu aamma atorneqartarput.

Lene Therkildsen isumaqarpoq atuakkat aliikkusersuinermut atorneqartarnerisa saniatigut inunnik attuisinnaasut inuiaqatigiinnilu oqallinnermik pilersitsisinnaasut. Milik Publishing ilaatigut misiliutitut meeqqanik, inatsisilerinikkut ataataminnik uppernarsarneqarsimanngitsunik kiisalu nunatsinni inuiaqatigiinni atoqatigiinnermi suiaaqatigiinnik atuakkanik saqqummersitsisimavoq.

Anginerusumik eqqarsarneq

ukiuni ingerlaneranni Milik Publishing arlaleriarluni Nuummi Centerimi nerrivinnik attartortarsimavoq, tassani saqqummersitsiviup ingerlaannaq tuniniaanermi ilaatillugu atuakkanik tuniniaasarpoq, tamannalu innuttaasunit nuannarineqarpoq.

Taakku saniatigut saqqummersitsivik Nuummi juullimut niuernermi ukiut tamaasa immikkut tuniniaaveqartarsimavoq. Aammattaaq Milik Publishing ukiut tamaasa Tivolimi Kalaallit Nunaanni aaqqissuussinermi tuniniaaviit akornanni nassaarineqarsinnaavoq.

Milik Publishingip siunissaa eqqarsaatigalugu Lene Therkildsenip suliffeqarfiup piserusuttoqarnissaa nalunaarpat tuninissaa eqqarsaatigisimavaa. Milik saniatigut Kalaallit Nunaanni saqqummersitsiviit mikisut ikittuinnaapput, taamaattumillu atuakkamik saqqummersitsineq ajornakusoortuuvoq.

- Isumaqarpunga maanna pissutsit ilaanni Kalaallit Nunaanni saqqummersitsivik angisooq pisariaqartinneqarsinnaasoq, soorlu Atuakkiorfik taamanikkut taamatut ittoq, Lene Therkildsen oqaluttuarpoq.

Elektronikkimut digitalimullu ineriartortitsineq immikkut piginnaasaqarnissamik aammalu anginerusumik eqqarsarnissamut pisariaqartitsineq annertusitippaa. Peqatigisaanik ataasiakkaanik saqqummersitsineq nammineq aningaasatigut imminut akilersinnaanngitsoq tapiiffigineqartariaqarpoq.

- Saqqummersitsivimmik ingerlatsineq kulturimut atuakkiallu pillugit soqutigisalimmik kajumissuseqartumik pisariaqartitsivoq, kisianni aamma inuussutissarsiornermut tunngatillugu eqqarsarnissamut pisariaqartitsivoq, Lene Therkildsen naggasiivoq.