Løkkep sakkutooqarfiit pillugit USA-mik isumaqatigiissummi nutaami mingutsitsisoq akiliissasoq kissaatigaa

Danmarkip USA-mik isumaqatigiissummi nutaami Amerikamiut sakkutooqarfii Kalaallit Nunaanniittut pillugit mingutsitsisup akiliinissaanik najoqqutassiaq ilannguttariaqarpaa.

Nunanut allanut ministeri Lars Løkke Rasmussen (M) Politikenimut taama oqarpoq. USA-p sakkutooqarfiit siornatigut qimakkamigit uuliamut nappartat, kemikaliat sakkutuullu igitaat qimannikuuai.

- Mingutsitsisup akiliinissaanik najoqqutassiaq pitsaasuusoq erseqqippoq, isumaqatigiissutinilu tamani ilanngunneqarsinnaappat nuannissaaq, taanna aviisimut oqarpoq.

Danmarkip USA-llu sakkutooqarfiit pillugit isumaqatigiissut nutaaq, ilaatigut Amerikamiut Kalaallit Nunaanni sakkutooqarfigisaannik nutaanik pingasunik pilersitsinissaq pillugu, isumaqatigiinniutiginerani taama oqarpoq.

Tamanna USA-p præsidentiata Donald Trumpip Kalaallit Nunaannik tiguaaniarluni sioorasaarinerata kingorna pivoq.

Amerikamiut Kalaallit Nunaanniinnerannit eqqakkat suli pinngortitamiipput.

Tassaapput Amerikamiut Kalaallit Nunaanni sakkutooqarfigisimasaannit amiakkut. Sorsunnersuup kingulliup nalaani Danmarkip akuersineratigut sakkutuut suleqataasut tapersersorniarlugit pilersinneqarput.

Sakkutooqarfiit qangali matuneqareerput, Danmarkilu Amerikamiut sakkutooqarfiinik saliinissamik politikkikkut 2018-imi isumaqatigiissuteqarpoq.

Sakkutooqarfiilli 17-iusut ilaannaat saliiffigineqarput. Tamanna ilaatigut Covid-19-imik, allaffissornermik silalu pissutigalugu sulinissap ajornakusoorneranik pissuteqarpoq.

Danmarkip sakkutooqarfiit pillugit isumaqatigiissut 1951-imeersoq ilinniarfigisariaqaraa Lars Løkke Rasmussen aviisimut oqarpoq.

- 1951-imi isumaqatigiissummut naleqqiullugu ajoqusiineq ilinniutigineqartariaqarpoq, taanna oqarpoq.

Politiken naapertorlugu nunat taakkua tikinneqannginnerminni pissutsit atugaattut qimanneqartariaqanngitsut isumaqatigiissummi allassimavoq.

Aviisi naapertorlugu tamanna pissutigalugu Danmarkip saliinissaq akisussaaffigilertariaqarsimavaa.

USA-mik isumaqatiginninniarnermi aamma allat eqqarsaatigineqartariaqartut Lars Løkke Rasmussenip erseqqissarpaa.

Saliinissaq isumaqatigiissummut ilanngunneqassanersoq apeqqutaaginnarpoq.

- Danmark pinnani Kalaallit Nunaat taamatut siunnersuuteqartussaassaaq. Akuliunnissaminnut tamanna taarsiutitut piumasarisinnaavaat, Illersornissamut ilisimatusarfimmi lektori Marc Jacobsen siornatigut Ritzauimut oqarnikuuvoq.

RITZAU