Aasaq inuiattut ullorsiornitsinni Qaqortumi pisut tassaapput Kommune Kujallermi borgmesterip 2025-mi eqqaamanerpaasaanut ilaasut.
- Inuiattut ullorsiornitsinni kommunip silataani oqalugiarnera, innuttaasunillu
qaaqqusannik erfalasunik amusititsinera puiunaatsutut eqqaamavara. Inuiattununa
ullorsiornissatsinnut inunnik erfalasunik amusisussanik qaaqqusinikuugama,
kommunitsinni inuit ilisarnaatigisagut ersarissarniarlugit tamattalu
inissaqarnerput takutikkusullugu.
Aasaq inuiattut ullorsiornitsinni Qaqortumi pisut tassaapput Kommune Kujallermi borgmesterip 2025-mi eqqaamanerpaasaanut ilaasut.
- Inuiattut ullorsiornitsinni kommunip silataani oqalugiarnera, innuttaasunillu
qaaqqusannik erfalasunik amusititsinera puiunaatsutut eqqaamavara. Inuiattununa
ullorsiornissatsinnut inunnik erfalasunik amusisussanik qaaqqusinikuugama,
kommunitsinni inuit ilisarnaatigisagut ersarissarniarlugit tamattalu
inissaqarnerput takutikkusullugu.
Erfalasumik amusisussat kikkuuneri borgmesterip ima ilisaritippai.
- Niviarsiaraq ukiukitsoq kommunitsinni ineriartorluarumaartoq, aamma meeqqat atuarfianniit atuartut sinniisaanni ilaasortaq isummersorsinnaanerup pingaaruteqarneranik ineriartortiteqataasinnaanermillu pigisaqartoq, ilinniarnertuunngorlaaq nuannaarnermik ikiuukkusunnermillu siammarterisoq ilinniaqqiffissaminut alloriaqqilersoq, nukappiaraq innarluutilik tamatta naligiinnitsinnik ersersitsisoq, utoqqaq 85-iliisussaq ukioqqortugaluarluni maligassiuilluartoq, politeeq aamma qatserisartoq tamatsinnut paarsisuusut, savaatilik nammineq pilersornitsinnut aqqutissiuuseqataasoq, aamma politikkeritoqaq erfalasunik amusitikkakkit attortisimaqaanga, tassanilu soorlu aatsaat qamani misigalugu ilumut borgmesterinngorsimallunga. Misigisaq taanna eqqaamaqaara, Malene Vahl Rasmussen kingumut qiviaqquneqarami taama oqaluttuarpoq.
Kommunip aningaasaqarnera anartarfiillu
Ukiorli kingumut qiviaraanni nuannersut saniatigut unammillernartissimasat aamma puttallartunut ilaasarput.
Borgmesteritut ilinnut suna ukioq manna
unammillernarnerpaava?
- Innuttaasut paasitinnissaat kommunip
aningaasaqarnerata qanoq inissisimanera. Qinersinerummi kingorna kingornutarput
aningaasaqarnikkut ajorluinnartumik inissisimavoq. Taassumalu kingunerisaanik suliassartavianik
aallartitsinitsinni innuttaasut qisuariarnerani paasititsiniaaneq
unammillernartippara. Soorlu 2026-mut missingersuusiornitsinni akileraarummik qaffaaneq,
eqqaaviillu akiinik qaffaasariaqarnerup pinngitsoorneqarsinnannginneranik
paasititsinissaq unammillernarsimasoq.
Suliassaq suna ukioq manna
naammassinngitsoorpiuk?
- Tissinartunngorlugu, Qaqortumi takornarianut
anartafiliinissaq, borgmesteri quiasaarluni oqarpoq.
Ingerlatsiviit tamarmik pisortaqalissapput
Illit borgmesteritut suna ukioq manna
iluatsinnerpaasoriviuk?
- Isumaqarpunga inuppalaartumik kiinnersinnaaneq
aammalu tamanut ammallunga oqaloqateqarluarsinnaanera iluaqutigilluarlugu.
Sulinikkullu allannguisinnaanermik uperinnillunga suleriuseqarnera. Soorlu
2026-mut missingersuusiornissarput sioqqutilaarlugu Naalakkersuisunik
oqaloqateqartaqattaarninni tamanna iluatsilluartoq, oqaloqatigiilluarnikkummi
aaqqissutissanik nassaarnikkut akileraarutip procentinik marlunnik
pingasunilluunniit qaffaneqarsinnaanerigalua pinngitsoorpoq,
sanaartornissamullu aningaasaliissutit peerneqarsinnaagaluartut aamma
attatiinnarneqarlutik.
Kommunerisarni aappaagu 2026-mi suna
pingaarnertut suliniutigerusuppiuk?
- Ingerlatsiviit tamarmik pisortaqalernissaat,
pisortammi tamarmik inisseriarpata politikkikkut anguniakkatta tulleriaarlugit
timitalersorneqarnissaat suliarisinnaanngussagatsigu.
