Maleruagassat tusarniaassutigineqartut: Kalaallit Nunaanni biilit ima qanimut misissorneqartassapput

Kalaallit Nunaanni 1999-miilli biilinik qamutinillu allanik qanimut misissuisoqarneq ajorpoq. Qanimulli misissuisarnissamut maleruagassat nutaat maanna tussarniaassutigineqaleruttorput.

Biilit teknikkikkut isumannaatsuunissaat, qanimut misissuinermut aaqqissuussap nutaap qulakkiissavaa. Qanimut misissuinerit, misissuisartunit Danmarkimi Angallannermut Aqutsisoqarfimmiit, Kalaallit Nunaanni pissutsinut immikkut ittunut tulluarsakkamik ingerlatsissapput.

Misissuisartut aqqusinermi biilinik misissuinerit ingerlattassavaat, tassanilu biilit bremsii, assakaasui, qaava, aquutaa allallu pingaaruteqartut misissorneqarsinnaapput.

Akornutit amigaataasullu misissuisartut nassaarisaat eqimattanut ima immikkoortinneqartassapput:

1. Akornutit amigaataasullu minnerusut biilit isumannaatsuuneranut annerusumik sunniuteqarsinnaanngitsut, immaqaluunniit avatangiisinut sunniuteqarsinnaasut, allallu naapertuutinngitsut.

2. Akornutit amigaataasullu annertuut biilit isumannaatsuuneranut, avatangiisinut imaluunniit aqqusinermi angallattunut allanut navianartorsiortitsisinnaasut, allallu naapertuutinngitsut.

3. Akornutit amigaatillu ulorianaatilimmik aqqusinermi, angallannermilu isumannaatsuunermut toqqaannartumik ulorianartorsiortitsisinnaasunik.

Tamakku tunngavigalugit nakkutilliisoq nalunaarusiorsinnaasarpoq, biililu ima allagartalerneqarsinnaapput: 1) Akuerineqarpoq. 2) Misissuineq naammaginartoq. 3) Akuerineqanngilaq. 4) Misissuineq naammanngitsoq.

Biilit akuerineqarpata imaluunniit misissuineq naammaginarpat, igalaamut allagartamik ilisarnaatitalimmik nipititsisoqartassaaq.

Piginnittoq, atuisoq biilertulluunniit misissuinerup kingorna ajoqutaasoq paasineqarsimasoq iluarsinngikkuniuk, akiligassinneqarsinnaavoq. Biilli misissorneqarnerata nalaani akiliisoqassanngilaq.

Qanimut misissuinermut aaqqissuussaq nutaaq Danmarkimi angallannermut ministerip aamma Ineqarnermut, Attaveqarnermut Isorliunerusunullu Naalakkersuisup 2025-mi isumaqatigiissutaannik tunngaveqarpoq taamatullu majimi 2025-mi kingumut akuerineqaqqilluni.

Maleruagassat nutaat siunnersuutigineqartut Naalakkersuisut immaqaluunniit Angallannermut Aqutsisoqarfiup nittartagaanni atuarneqarsinnaapput. Tusarniaanerit oqartussanit taakkunannga marlunnit ingerlanneqarput.

Angallannermut Aqutsisoqarfiup naatsorsuutigaa nalunaarut malittarisassanik nutaanik imalik 2027-mi januaarip aallaqqaataani atuutilersinneqassasoq.