Meeqqat annertut ilaatigut takunngitsoortarpagut

Rakel Andersen, perorsaasoq.

Sooruna inulerisutut ilinniagaq toqqarsimaviuk?

- Inuusuttuaraallungali sinnattoriuaannarnikuuara inulerisuussallunga. Inuilimi igaffimmi ikiortitut naammasseqqaarnikuuvunga. Kingornali ilinniagara atulereerlugu, meerartaareerlunga, inissikkiartulerpara ilumut inulerisussaallunga. Inulerinerup iluani arlaatigut tunniussinissara nuannarisarakku. Nammineq inuttut aamma iluaqutigisarakkit, pissarsiffigalugit. Pilluarnartuaannarpoq meeraaqqerilluni tunniussisimalluni.

Ulluinnaat suliffiusut qanoq misigisarpisigit?

- Apequutaajuaannarpoq takkukkaanni meeqqat sulisullu qanorinnersut. Inimi aqutsisuulluni eqqumaffissat aamma assigiinngitsuusarput. Akisussaaffiit annertuujupput. Ulapinnartaqaaq, soorlu ulluni makkunani angajoqqaanik killiffissiuivugut, meeqqaniinniarlutalu. 

- Saniatigullu saaffiginnittut akisariaqarnerini qarasaasiap saavaniittariaqarneq, aamma massakkut meeqqap ineriartornerata killiffii digitalinngorlugit tunniunnissaat piumasaqaataapput. Meeqqat tamarmik immikkut mappeqartariaqarput. Taamaattoq kisima allattarpunga, kisimalu suliarisariaqarlugit. Eqqissillunga suliarisinnaanngilakka, ulapputissanik allanik ulikkaarmat. Soorlu meeraq ullormut qanorippa? Innartitassaava? Qasua? Nangilersugassaava? Sukkut kaammattugassaava? Qanoq qisuariarfigissavara? Meeqqamut ulloq imaqarnikkaarujussuummat toqqissisimanissaat pingaaruteqarpoq. Ulapilluni meeqqat ataatsikkut qissatileraangata pikkunartarpoq. Eqqissisimaniarnartarpoq, ilaatigut imminut pilliutigaluni.

- Amigarfinni ulapittaqaagut. Timimut akisoorujussuuvoq, soorlu tuilunnerit, talit qiterlu aamma sunnerneqartarput. Timi tamaaviat atorparput, saniatigut misigissutsikkut, eqqarsartariaatsikkut aamma nukinnik atuinartarpoq. Imminut tunniulluta, suna tamaat akigalugu sulivugut. Ajunnginnerpaamik sullisserusuppugut, ajunnginnerpaaq anguniarlugu sulivugut. Soorunami ulloqartarpugut qasuuilluta. Saniatigullu angajoqqaat immikkut suleqatigisussaallugit, tamarmillu immikkut ilaatigut piumasaqarsinnaasarlutik. Unammillernarsinnaasarpoq. Kisianni aamma qanimut suleqatigalugit nuannertuaannarpoq. Aamma meeqqamut ineriartuutissatut alloriarfiit annerit angusimagaanni nuannaarutissaq annerpaasarpoq pilluarnarnerpaasarlunilu.

Sulisussaaleqinerup ilinnut meeqqanullu sunniuteqarneranik ersersitsisumik ullormik aaliangersimasumik oqaluttuarsinnaavit?

- Allaat ima ulapitsiginikuuvugut annertut ilaatigut takunngitsoortarpagut, paasinngitsoorlugu nakkartoqartoq. Pisarialimmik eqqumaffissaraluagut eqqumaffiginngitsoorsinnaasarpagut. Soorlu silami illup iluanilu sinittoqartarpoq, nerisitassaqartarpoq, ermitassaqartarpoq nangilersugassallu. Ulapingaaratta ilaatigut ingippianngitsoortarpugut iminngitsoorlutaluunniit, immitsinnut pilliutigerujussuartarpugut. Ajunnginnerpaaq anguniartuaannarlugu toqqissisimanartumillu tunniuserusuttuaannartuulluni ilaatigut unammillernartaqaaq. Soorlu meeqqanut angajoqqaanullu tatiginassuseq takutittariaqarlugu. Atugarissarititaasut eqqarsaatigalugit, immikkut itinerusumik imaajaaffeqanngilagut.

Atugassarititat eqqarsaatigalugit aqagu allanngortitsisinnaasuugit suna allanngortissagaluarpiuk?

- Aningaarsiat allanngortissagaluarpakka. Inulerisuulluni annikippallaarujussuarput. Naammanngerujussuaramik, taama unammillernartorsiorfimmiitigaluta qanorlu pingaaruteqartiginerput eqqarsaatigissagaanni. Meeqqap ineriartornerata aallartiffia pingaarnerpaajuvoq, taamaattumik ajunnginnerpaaq atorlugu tunniusserusunnartaraluarpoq. Tarnip pissusaanik aamma oqaloqateqarnissaq periarfissaatikkusunnaraluarpoq, soorlu arlaannik pisoqarsimatillugu oqaloqatigisinnaasatsinnik. Inulerisutut immikkut paarineqarnissarput kissaatiginartorujussuuvoq.