Meeqqat atuarfiat pillugu siunnersuut akerleriissutaasoq kinguartinneqarpoq
Naalakkersuisut aalajangersinnaasuugunikku meeqqat atuarfianni nukarliit akunnerni ikinnerusunik atuartinneqartalissapput. Inatsisissatut siunnersuutip suliarineqarnissaa maanna kinguartinneqarpoq.
Meeqqat atuarfianni nukarlernut atuartitsissutit assigiinngitsut amerlavallaartut, taamaammalu ullup ataatsip ingerlanerani sammineqartut allanngorarpallaatarlutik, Naalakkersuisut isumaqarput.
Toqqorsivimmit: Leiff Josefsen
IMAK-imiit tusagassiuutitigut nalunaarut nutaaq nassiunneqarmat allaaserisaq nutarterneqarpoq.
Naalakkersuisut meeqqat atuarfianni atuartitsissutit akunnerillu atuartitsiffiusut ikilisikkusuppaat. Atuartitsissutigineqartartut ilaasa atorunnaarsinnerisigut tamanna anguniarneqarpoq.
Meeqqat atuarfiini nukarlerni kalaallisut atuartitsineq pitsanngorsarneqassaaq, qallunaatut tuluttullu atuartitsinerit 4. klassimiit aatsaat aallartittalissallutik.
Siunnersuut isornartorsiorneqangaatsiartoq pingasunngorpat juunip pingajuanni aappassaaneerneqartussatut pilersaarutigineqarnikuugaluarpoq. Aappassaaneerneqarnissaalu ukiaanerani ataatsimiinnissamut kinguartinneqarsimasoq Inatsisartut nittartaagaanni takuneqarsinnaavoq.
Siunnersuut siullermeerneqareerluni Kulturimut, Ilinniartitaanermut, Ilisimatusarnermut Ilageeqarnermullu Ataatsimiititaliamut ingerlateqqinneqarnikuuvoq.
MIO-p ullut atuarfiusut ikilisinneqarnissaat isornartorsiornikuuaa, meeqqat pisinnaatitaaffiinik illersuiniaqatigiiffik naapertorlugu meeqqat pisariaqartitsinerpaat eqqugaassapput, atuarfimmi taakkununnga tassaavoq ornitassaq aaqqissuulluagaq, ataatsimoorfiusoq, ilikkariaatsinik ajunngitsunik neqeroortoq inersimasunillu aalajaatsunik sulisulik.
Ilisimatusartut arlallit inatsisissatut siunnersuut ukioq manna siusinnerusukkut aamma isornartorsiornikuuaat. Isummernerat tusaatissatut tiguneqarpoq, taamaakkaluartorli suli isorisaqarlutik isummersuutaat Sermitsiami apriilip qaammataani saqqummertumi ilanngunneqarpoq.
Meeqqat kalaallisuinnaq atuartinneqartalerunik eqqarsartaatsimikkut ineriartornissaat sunnerneqarsinnaasoq taakku ernummatigaat. Ilisimatuussutsikkut misissuinerit takutippaat meeqqat oqaatsit arlallit atorlugit atuartinneqartartut eqqarsartaatsimikkut pitsaanerusumik ineriartortartut.
Tuluttut danskisullu atuartitsisoqartarunnaassava?
Ilinniartitsisut kattuffiata IMAK-ip inatsisissatut siunnersuut aamma apeqquserpaa, taakku inatsisissatut siunnersuutip oqaasertalernerat paasiuminaatsippaat.
- Siunnersuut malillugu danskisut tuluttullu aamma fagitut atuartitsisoqartassava? Imaluunniit allassimasut malillugit oqaatsit taakkua “aallarniutitut” atuartitsissutaassappat? Taamaassimassappat “aallarniutitut” atuartitsineq qanorpiaq paasineqassava? Ilinniartitsisut tamanna nalunngittariaqarpaat. Maannakkullu suliarineqartumi tamanna erseqqinngilaq, kattuffiup siulittaasua, Elna Thomsen Heilmann tusagassiuutitigut nalunaarummi oqarpoq.
IMAK-ip ilisimatusartut akerliannik isumaqarluni nukarliit kalaallisuinnaq atuartinneqartarlernissaat isumassarsiatsialattut isigaa.
Nalunaaquttap akunneri atuartitsiffiusut 700-niit 560-inut ikilisinniarneqarput, taakku ullunut 180-inut agguataarneqassallutik. Maanna nalunaaquttap-akunneri 700-t ulluni 200-niit 240-nut agguataarneqartarput. Ullut atuarfiusut ikilisinnissaat atuartunut akullernut angajullernullu atuutinngillat, taakkulu ukiumut ulluni 200-ni atuartinneqartarnerat ingerlaannassalluni.
Danskisut tuluttullu atuartitsinerup allanngortinneqarnerata saniatigut aamma "kulturi inuiaqatigiillu", tassaasut inuiaqatigiilerineq, oqaluttuarisaaneq, upperisarsiorneq isumaliutersortarnerlu, atorunnaassapput.
Atuartitsissutit pingajuat, "matematikki pinngortitalerinerlu", aamma allanngortinneqarlutik matematikki kisimi atuartitsissutaasalissaaq.
