Mette Frederiksen nersualaarneqartoq – Kalaallit Nunaanniilli allannguisoqarnissaa suli kissaatigineqarpoq

Folketingip marlunngornermi oktobarip arfernani ammaanersiorneqarnerani, inatsisartut sulinerat aallartilluarpoq, tamannalu Kalaallit Nunaannit Folketingimut qinigaasup Qarsoq Høegh-Damip (Naleraq) aamma Naaja H. Nathanielsenip (IA), ministeriunerup Mette Frederiksenip naalagaaffiup qanoq inissisimaneranik Folketingip ataatsimiittarfiani oqalugiarnerani peqataasut, nuannaarutigaat.

Kalaallit Nunaannut isumaqatigiissut

Mette Frederiksenip nalunaaquttap-akunnera ataaseq oqalugiarnermini, kalaallit toqqaannartumik ima saaffigai: “Asasavut kalaallit. USA-mik sapaatit akunneri marluinnaat matuma siorna isumaqatigiissuteqarpugut.”

Aappaattut erseqqissarpaa isumaqatigiissut Kalaallit Nunaat pillugu isumaqatigiissutaanngitsoq, kisiannili Kalaallit Nunaannik isumaqatigiissutaasoq.

“Kalaallit Nunaat pillugu isumaqatigiissutaanani, taamaattorli Kalaallit Nunaannut tunngatillugu isumaqatigiissut. Isumaqatigiissut Kunngeqarfiup killeqarfiinik ataqqinnittoq. Kunngeqarfiup kisimi oqartussaaneranik. Erseqqissarneqarlunilu kimilluunniit kalaallit siunissarsi pillugu, nammineq aalajangiisinnaassuseqartusi.”

Kalaallit Nunaat nersorpaa, Jens-Frederik Nielsenilu "silatuutut, siumut isigisutut pikkorissutut“, qutsavigalugu.

Aamma atorfillit sulisullu isumaqatigiissummik suliaqarnermut peqataasut qutsavigineqarput.

"Amerlavusi ataqqineqartussat. Inatsisartut sinnerlugit ullumikkut qutsavigaassi. Kalaallit Nunaat Danmarkilu aalajangersimalluinnarput pisussanngoratta. Tunngaviusumik najoqqutassiat, nigunngisaannartussat.“

Pitsanngorsaaniarluni allannguineq

Naaja H. Nathanielsenip oqalugiaat paasiuminartoq, Kalaallit Nunaata Danmarkillu ukiuni kingullerni affarmi qanimut suleqatigiinnerannik ersersitsisoq, pingaartippaa.

– Oqaatsit kusanartut Inatsisartuni Naalakkersuisunilu qanimut ineriartorfiusumillu suleqatigiinnitsinnik misigisatsinnut, aqqutaa tamaat qanimut pitsaasumillu suleqatigiinnermut ersiutaapput. Oqalugiaat paasinarlunilu attortinnarpoq.

– Isumaqarpunga Mette Frederiksenip ministeriunertut Kalaallit Nunaannut ajunngitsuliorsimanera isumaqatigineqarluartoq. Aammali siammasissumik allannguerusussuseq suli atuuttoq, isumaqatigineqarpoq. Maluginiarpara ministeriuneq oqalugiarnermini ima oqarmat: "Pitsaanerulerumalluta suli allannguisariaqarpugut.“ Tamannalu aamma Kunngeqarfiup iluani attaveqarnermut tunngatinneqartoq isumaqarpunga. Taakku marluk ilumoorput; suleqatigiilluarpugut, pissutsilli ilaat suli allanngortittariaqarpavut, Naaja H. Nathanielsen oqarpoq.

Oqaloqatigiissutissaqaqaagut suli

Qarsoq Høegh-Damip ministeriuneq nersualaarpaa “Kalaallit Nunaat”-mik oqarnera pillugu, aammali Danmarkip nunarsuarmi pitsaanerpaatut oqaatigineqarnera isornartorsiorpaa.

– Kalaallit Nunaat-mik oqarniarsarineruvoq pitsaasoq. Tamanna nassuerutigissavara. Maluginiarparali qallunaat oqalugiarfigineqartut, Danmarkilu nunarsuarmi pitsaanerpaatut oqaatigineqartarpoq. Danmarkimi kalaallit najugaqartunut Danmark nunarsuarmi pitsaanerpaajunngilaq. Suli oqallisigisassaqaqaagut, Qarsoq Høegh-Dam oqarpoq, qinigaaffimmi matumani suliassaqarfiit Danmarkip Kalaallit Nunaanni akisussaaffigisaasa namminersorlutik oqartussanut inatsimmi piumasaqaatigineqartutut qaffassarneqarnissaat immikkut ukkatariniarpaa.

Naaja H. Nathanielsen aamma Qarsoq Høegh-Dam sisamanngornermi oqaluttarfimmiissapput, tassani ministeriunerup ammaanersiorluni oqalugiaataa oqallisigineqassaaq.