Mette Frederiksen qinersisoqarnerani kalaallinik naapitsivoq: Kalaallit Nunaat tatineqangaatsiarnikuuvoq

Ministeriuneq Mette Frederiksen Aalborgimi aaqqissuussinermut peqataavoq, tassanilu kalaallit Danmarkimi najugallit marlunngornermi naapippai, Danmarkimi kalaallit kattuffiat Uagut oqaluttuarpoq.

Uagut tusagassiuutitigut nalunaarummi ima allappoq:

Aaqqissuussami kalaallit pisinnaatitaaffii, sinniisoqarfik inatsisitigullu isumannaatsuuneq eqqartorneqarput. Mette Frederiksenip aamma USA-p Kalaallit Nunaanni soqutiginninneranut atatillugu pisut pissanganartut eqqarsaatigai:

- Taamani ministeriunertut ivertinneqarama Naalagaaffeqatigiinnermi suleqataajumaarlunga nalunngilara.

Tatisineq naapertuutinngitsoq akuerineqarsinnaanngitsorlu

- Taamanili Kalaallit Nunaat ilissilu Kalaallit Nunaanni sorlaqartusi uummatinni qanoq initutigilerumaartusi naluara. Aamma takorloorsimanngisaannarpara avataanit pisunit arlaannit illersornissassinnut peqataassallunga, Mette Frederiksen oqartoq Uagut allapput.

Mette Frederiksen piffissaq tamanna puigunngisaannassallugu oqarpoq:

- Kalaallit Nunaat naapertuutinngitsumik akuerineqarsinnaanngitsumillu tatineqarpoq. Aalajangersimavusili, inussiarnersumik aalajangersimalluinnarlusi nukittussusersi nunarsuup sinneranit tupigusuutigineqartoq takutillugu.

Siulittaasoq: Aqqiissutaagallartut unittariaqarput

Kalaallit meeqqat inuusuttullu atugarissaarnerat, kinaassusaat ataqatigiinnerallu aaqqissuussinermi eqqartorneqarput.

Julie Rademacher, Uagumi siulittaasoq, pingaarutilinnut arlalinnut tunngatillugu piffissaq ungasinnerusoq eqqarsaatigalugu aaqqiissuteqartoqartariaqartoq aaqqissuussinermi oqarpoq:

- Piffissami kingullermi nunat assigiinngitsut akornanni Kalaallit Nunaat sammineqarluarpoq, sammineqarunnaaraangalli kalaallinut Danmarkimiittunut Kalaallit Nunaanniittunullu ulluinnarni inuunerannut allannguuteqarpallaanngilaq.

- Peqqinnissaqarfimmi, isumaginninnermi, ilinniartitaanermi eqqartuussiveqarnermullu tunngatillugu aaqqiissutissat siusinnerusukkut atorneqartut immikkoortiterneqarsimapput sivikitsumillu isiginiarnerullutik. Tamakkua allanngortittariaqarpagut, Julie Rademacher oqarpoq.