Mette Frederiksen Trumpip sioorasaarinerata kingorna: Danmarkip Kalaallit Nunaat illersorumaarpaa

USA-p Kunngeqarfiup Danmarkip killeqarfii oqartussaassuseqarneralu ataqqissavai.

Mministeriuneq Mette Frederiksen Nato-p Ankarami ataatsimeersuarnissaa sioqqullugu oqarpoq. Trumpip Kalaallit Nunaata "aqutarilernissaanik" piumasaqaateqaqqereersorlu taama qisuariarpoq.

Danmarkip ministeriunera Kalaallit Nunaat sakkutuulersorluni USA-mut illersorniarnerlugu piareersimanersoq aperineqarami ima akivoq:

- Danmarki Kunngeqarfiup Danmarkip illersornissaanut soorunami piareersimavoq, Mette Frederiksen oqarpoq.

Donald Trumpip Tyrkiap præsidentia Erdogan Ankarami ataatsimeersuarneq sioqqullugu marlunngornermi ataatsimeeqatiginerani, Kalaallit Nunaat pillugu akerleriinneq aallarteqqippaa.

Trump Kalaallit Nunaat pillugu tassani aperineqaqqippoq, imalu akivoq:

- Kalaallit Nunaat USA-mit aqunneqartariaqarpoq, Danmarkimiunngitsoq, Trump marlunngornermi oqarpoq.

Trumpi Danmarkip Kalaallit Nunaata illersornissaanut iliuuseqarnera naamannginnerarlugu isornartorsiuinini uteqqippaa.

- Kalaallit Nunaata Danmarki ikiunngilaa. Danmarkip Kalaallit Nunaannik ikiuiniarluni aningaasat naammanngitsut atorpai, tamannali USA-mut pingaaruteqarpoq, Trump oqarpoq.

Nato-mi nereqatigiinnermi Trump Mette Frederiksenilu marlunngornermi unnukkut peqatapput. Mette Frederiksenilli Kalaallit Nunaat pillugu oqaaseqaatit Trumpimut qisuariarfigisimanagit, qallunaat tusagassiiviinut pingasunngornermi ullaakkut oqarpoq.

- Nato-mi ataatsimeersuarnermi Donald Trump oqaloqatiginngilara. Oqaaserisai tupaallaatiginngilakka. Pimoorussisoq aallaqqaataaniilli oqaatigisarpara. Uagut aamma taamaappugut.

- Danmarkimiit kalaalliniillu aalajangiusimasarput allanngortinngilarput. Kalaallit USA-mut ilanngukkusugatik erseqqissumik oqaatigereernikuuaat, Mette Frederiksen oqarpoq.

Danmarkip nunap killeqarfii pillugit erseqqissunik killeqartoq naqissuserpaa, tamannalu Trumpi oqaaseqaqqikkaluartoq allanngorunnarani.

- Kunngeqarfittut nammineerluta oqartussaassuseqarpugut. Allanngortinnavianngilarput, Mette Frederiksen oqarpoq.

Danmarkimiilli Issittumi isumannaallisaanissaq pillugu USA-p suleqatiginissaanut piareersimasoqarpoq.

- Issittumiinnerulertoqarnissaa Nato-mut qulakkeernikuuarput, ilaatigut Arctic Sentry atorlugu. Aamma Danmarkip Kalaallit Nunaatalu USA-llu suleqatigiinnerat siunissami qanoq isikkoqarsinnaanera misissorniarlugu qaffasissumik suleqatigiissitaliortoqarpoq.

- Qanorluunniit oqaaseqartoqaraluarpat suliaq tamanna ingerlatiinnassavarput, Mette Frederiksen oqarpoq.

Nato-p generalsekretæriata Mark Ruttep Kalaallit Nunaat pillugu "suliaq ajunngitsoq" aallartittoq, pingasunngornermi ataatsimeersuartunukarluni oqaatigaa.

Ruttep Issittumi isumannaallisaanerup nukittorsarneqarnissaa, Kalaallit Nunaata pigilernissaanik anguniagaqarnermiit pingaarnerussasoq Davosimi World Economic Forum-ip upernaaq ataatsimiinnermi Trumpimut iluatsikkaluarpaa.

Ruttep Trumpimut Europami illersornissap pitsaanerulersinnissaanik suliniuteqarneranik qularunnaarsinniarsaraa, tamannali kissaatigisatut sunniuteqarsimagunanngilaq.

- Nato Issittumi avannaarsuanilu sakkortunerusumik peqataatinneqarnissaanut Mark Rutte akuummat nuannaarutigaara, Mette Frederiksen oqarpoq.

Apeqqut: Mark Ruttep Kalaallit Nunaat pillugu pisuni Danmarkimut tapersersuinissaa qularinngiliuk?

- Nato-mi generalsekretæriugami taamaattoqartariaqarpoq, aamma Kunngeqarfik Danmarkimut, Mette Frederiksen oqarpoq.

Apeqqut: Qularinngiliummi?

- Aap, Mette Frederiksen oqarpoq.

RITZAU