Mette Frederiksenip USA-mut saassussinermi toqutaasut 3000-ngajaat eqqaaniarai

Ministeriunerup Mette Frederiksenip (S) inuit 3000-t missaanik, ukiut 25-t matuma siorna USA-mut saassussinermi toqutaasut Facebookikkut tallimanngornermi eqqaaniarpai. 

- Ullumikkut inuit 3000-ngajaat ullormi uani toqutaasut eqqaaniarpavut. Aammalu tamatuma kingorna illoqarfinni nunanilu tamani pinerliiniarnermit eqqorneqartut, annilaanganermik taamaattumik misigisaqartut ilanngullugit. 

- Sapiitsuliortorpassuittaaq, ukiuni malittaasuni isumannaatsuunitsinnik nunani allani nunamilu maani sorsuuteqarsimasut aamma eqqaamavagut. Nukiit ajortumik siunertallit uatsinnut ajortumik siunertaqartut, taanna allappoq. 

Septembarip aqqaneq aappaanni 2001-mi timmisartut tiguarneqartut marluk imminnut malisugaannarlutik illorsuarnik assigiinnik marlunnut World Trade Centerimut New Yorkimiittunut aporput, illorsuillu kingorna nakkaapput. 

New Yorkimi Washington D.C.-milu illersornissamut ministereqarfimmut Pentagonimut saassussinerup saniatigut timmisartut tiguarneqartut sisamaat, ilaasut timmisartup aquttarfianut iserniaraluarnerisa kingorna  Pensylvaniami narsaammut nakkarpoq. 

Saassussinerni pisortatigoortumik toqutaasut – saassussisut ilanngunnagit – inuit 2977-iupput. 

- Ullumikkut uumillerneq ingasattajaarniarnerlu suli siaruarterneqarput. Amerlanertigut qarasaasiatigut, tamannalu aatsaat taama sukkatigisumik ingerlanneqarpoq. Ukiut 25-t matuma siorna neriuutigisatsinnit nunarsuarmi sorsuunnerit avissaartuunnerillu amerlanerupput .  

- Taamaammallu inuiaqatigiinnik tamat oqartussaaqataanerannik ammasumik kiffaanngissuseqartumillu ingerlatsisunut sorsuutiginninneq ullut tamaasa sorsuutigineqartussaanera, ullumikkut ullormi sakkortuumik eqqaasitsisuuvoq, Mette Frederiksen allappoq. 

USA-mut saassussinerit USA-p ilaatigut Afghanistanimik saassussilluni suliniarneranik kinguneqarpoq, tamannalu ukiunik 20-nik sivisussuseqarpoq, tassanilu Danmarki aamma peqataavoq. Danskit sakkutuui 44-t Afghanistanimi toqutaapput. 

Islamisiortut ingasattajaarniat al-Qaeda USA-mut saassussivoq, tamannalu suliniaqatigiiffiup pisortaanik Osama bin Ladenimik sakkortuumik ujarlernermik aallartitsivoq. 

Amerikamiut sakkutuuisa immikkut sungiusarsimasut Pakistanimi maajimi 2011-mi saassussineranni taanna toqutaavoq. 

RITZAU