Ministeri ilisimatitsereernermi kingorna: Inuup normuisa susassarinninngitsunit pissarsiarineqarsimanerisa kingorna inuup normuinik nutaanik pilersitsisoqarsimasinnaanera mattutinngikkaa

Inuttut normut millionilikkaat susassarinninngitsunit pissarsiarineqarsimanerat pissutigalugu innuttaasut ilaat inuttut normumik nutaamik pissarsisariaqarnersut oqaatigissallugu siusippallaarpoq.

Digitalimik ineriartortitsinermut ministeri Christina Egelund (M), inuit 8,8 millionit pillugit paasissutissat susassarinninngitsunit takuneqarsimanerisa kingorna Folketingimi inuussutissarsiornermut digitalimillu ineriartortitsinermut ataatsimiititaliaq nunanullu allanut illersornissamullu ataatsimiititaliaq ilisimatereerlugit taama oqarpoq.

- Inuup normuinut nalunaarsorsimaffik tamaat sillimaniarnikkut misissorneqassasoq piumasarinikuuara. Misissuineq naammassippat inuup normuinik nalunaarsorsimaffimmi qanoq allannguisoqarsinnaanersoq paasiniartariaqarparput, taanna tusagassiortunut oqarpoq.

Piffissaliisoqanngilaq.

- Suliaq maanna aallartinneqarpoq. Naammassineqareerpat tamatta tatigisinnaasatsinnik inuup normuinik nalunaarsugaateqarsinnaaniassagatta qanoq ililluni inuup normuinik nalunaarsorsimaffii isumannaallisarneqarsinnaanersut misissussavarput, Christina Egelund oqarpoq.

Inuup normuinik nalunaarsorsimaffimmi atit adressillu saniatigut kinaassusersiissutit paasissutissanik imaqarput, soorlu inuk qanoq aappaqarnersoq, qanga sumilu inunngorsimanersoq, qaniginerpaasai kikkuunersut, oqaluffimmi ilaasortaanersoq, naalagaaffimmi innuttaanersoq, aamma isumassuisoqarnermut tunngasunik paasissutissaqarnersoq.

- Siullermik paasissutissat kikkuunerannik paasiniaanermut, internetikkut peqquserlunnermut allanullu atorneqarsinnaannginnerat qulakkeertariaqarparput, taanna oqarpoq nanngillunilu:

- Taamaammat nittartagaq oqarasuaatikkullu siunnersorneqarnissamik immikkoortortaq pilersippagut, tassani innuttaasut qanoq pitsaanerpaamik imminut illersorsinnaanerlutik siunnersorneqarsinnaapput.

RITZAU