Ministerip eqqartuussiviit periaatsiminnik allannguinissaat naatsorsuutigaa
Rasmus Stoklundip eqqartuussivik Strasbourgimiittoq, aallakaatitsinissamut akornutaasoq, aalajangiinermut qisuariarnissaa naatsorsuutigaa.
Nunanut allanut akulerutsitsinermullu ministeri Rasmus Stoklund (S) nunasisarneq oqaluuserissallugu ataasinngormat Bruxellesimiippoq. Nunanit allaneersut pinerluuteqartut anisitaanissaat ajornannginnerulersinniarlugu, Europap Siunnersuisooqatigiivini nunat 27-t atsioqatigiinneranni pingasunngormat aamma Strasbourgimiippoq.
Assi: Olivier Hoslet/Ritzau Scanpix
Nunanut allanut akulerutsitsinermullu ministerip Rasmus Stollundip (S) Europami Inuit Pisinnaatitaaffii pillugit Eqqartuussiviup (EMD) nunat ilaasortaasut amerlanersaasa allamiunik pinerluuteqartunik anisitsinissaq ajornannginnerulersitserusunnerat qisuariarfigissagaa naatsorsuutigaa.
Strasbourgimi ministerit pingasunngormat ataatsimiinneranni peqataavoq, tassanilu nunat 27-t Danmarkip nalunaarutaa allannguisoq tapersersorpaat.
- Nunat 27-it taama
ersaritsigisumik nalunaaruteqarnerat Europami Inuit
Pisinnaatitaaffii pillugit Eqqartuussiviup pimoorullugu suliassatut
tigussagaa neriuutigalugulu naatsorsuutigaara, Rasmus Stoklund oqarpoq.
Danmark Italialu eqqartuussiviit periusissaannik, naalakkersuisut naleqqulluartutut isigisaannut naleqqiullugu qimagussortinneqartup pisinnaatitaaffiinik pingaartitsivallaartumik, ukioq manna siusinnerusukkut akerliliipput.
Nunat Danmarkimik tapersersuisut piffissami kingullermi amerliartupiloorsimapput.
Ataatsimiinneq sioqqullugu amerlanerussuteqartut akuersisinnaanerat qularutigineqarsimavoq, siunnersuisooqatigiinnili ilaasortanit 46-usunit nunat 27-t akuersipput.
Nunani allaniittunut akulerutsitsinermullu ministerip uppernarsarsinnaanngilaa inatsisitigut periutsit allanngortinneqarumaartut.
- Europami Siunnersuisoqatigiit, nunanik 46-nik ilaasortallit eqqartuussivillu attuumassuteqanngitsutut inissisimaffilik, siunnersorneqarsinnaanatillu ilitsersorneqarsinnaanngitsut sinnerlugit neriorsuisinnaanngilanga.
- Soorunami ilimagaara nunat 27-it ullumikkutut sukannertigisumik suaartarpata tupaallaatigissagaluarlugu pisoqarsimanngitsutut ingerlaannassappata, Rasmus Stoklund oqarpoq.
Europarådets generalsekretæri Alain Berset, eqqartuussivimmut saassussinissamik ernumavoq.
Europap Siunnersuisoqatigiivisa generalsekretæriata, Alain Bersetip, eqqartuussiviit assuarnaassusiat saassunneqartoq ernummatigaa.
- Nuannaarutigaara nunat 27-usut ullumikkut Europami Inuit Pisinnaatitaaffii pillugit Eqqartuussivimmut nalunaarmata naalagaaffiit ilaasortaasut nunanit allaneersut pillugit politikkiminnik namminneq aaqqissuussisinnaanerat inatsisinut naapertuulluinnartoq, ministeri oqarpoq.
Isumaqatigiissutip immikkoortuani tamatumani inuit pisinnaatitaaffii pillugit isumaqatigiissummi allassimaffiit marluk toqqaannartumik innersuussutigineqarput — tassa naalliutsitaanerup inunnillu ajortumik pinnittarnerup inerteqqutigineqarnera pillugu allassimaffik 3 aamma ilaqutariittut inuunermik kisimiittutullu inuunermik ataqqinnissinnaaneq pillugu allassimaffik 8.
Nunat 27-t taakkua naapertorlugit siunissami allatut oqimaaqatigiissaarisoqassaaq, taamaalilluni anisitsinissaq ajornannginnerulissaaq.
Strasbourgimi eqqartuussiviup aalajangersimavaa pisinnaatitaaffiit allassimaffinni taakkunani marlunniittut pingaarnerusut, tamannalu Danmarkimi eqqartuussivinni maleruagassaavoq.
/ritzau/
