MIO-mi aningaasanik atornerluisoqarsimanernik pasilliisoqarnerani IA iliuuseqarnissamik piumasaqartoq

Inuit Ataqatigiit MIO-mi aningaasanik atornerluinermik peqquserluttoqarneranik pasilliutit qisuariarfigaat. Partiip erseqqissarpaa meeqqat illersorneqarnissaannut, pisinnaatitaaffiinik qulakkeerinnittussanut oqallinnernilu taakkununnga attuumassuteqartuni tusarneqarnissaata qulakkeernissaanut pisortat aningaasaataat pineqartut.

Inatsisartuni ilaasortaq Nivi Rosing, IA, naapertorlugu aningaasat tamakkununnga atorneqartut atornerlunneqarsimappata tamanna ajornartorsiutaavoq.

MIO-mi sulisuusimasoq pisortat aningaasaataannik 3,5 million koruuninik atornerluisimasutut pasineqarluni politiinut unnerluutigineqarnera, pingasunngornermi paasinarsimmat, inuiaqatigiinni tupaallaatigineqarpoq.

- Suliaq politiinut tunniunneqarsimavoq, misissuineq ingerlanneqarnissaa suliallu ingerlanneqarnera ataqqineqarnissaa pingaaruteqarpoq. Aammattaaq meeqqat illersuisuat pasitsakkami iliuuseqapallassimanera qutsavigaarput, Nivi Rosing tusagassiuutinut nalunaarummi allappoq.

Politikkikkut aqutsineq sakkortunerulersikkusuppaa

Taamatuttaaq politikkikkut sinaakkusiussat aallaavigalugit pisortat aningaasaataannik atuinermut atornerluinermullu aqutsineq, Inuit Ataqatigiit aamma apeqquserpaat.

Aamma atuakkit

Meeqqat oqaaseqartartuat siornatigut sulisuusimasoq millioninik peqquserlunneq pillugu politiinut nalunaarutigaa

- Tamatuma peqatigisaanik Inuit Ataqatigiinniit pingaartipparput peqquserluttuliortarnerup aammattaaq pisortaniit aningaasaliissutit atornerlunneqartarnerat pinaveersaartinniarlugu politikkikkut sinaakkutit nakkutilliinerlu amigaataaneri ilungersuutigisariaqarpagut. Ersarissumik politikkikkut sinaakkusiisariaqarpugut tamakku pisarneri pinaveersaartinniarlugit. Nivi Rosing oqarpoq.

Inuit Ataqatigiit arlaleriarlutik Inatsisartuni siunnersuutigisarpaat Kalaallit Nunaata FN-ip peqquserlulluni iluanaarniartarneq akiorniarneranut pillugu isumaqatigiissutaanut ilannguteqqullugu. Siunnersuut qinigaaffimmi kingullermi saqqummiunneqarpoq, sulili piviusunngortinneqanngilaq.

- Suliaq kinguartinneqaqqissinnaanngilaq. Inuit Ataqatigiinniit isumaqarpugut Nunatsinni ileqqorlunneq pinaveersaartinniarlugu inatsisit nalimmassartariaqartut. Suliaq piaartumik aallartittariaqarpoq, Nivi Rosing oqarpoq.