MIO Naalakkersuisunut ammasumik allagaqartoq: Meeqqat ataasiaannarlutik atuartinneqartarput

Meeqqat atuarfiat pillugu siunnersuutit sisamat ukiakkut ataatsimiinnermi matumani saqqummiunneqarput.

Ilaatigut meeqqat atuarfiannut inatsisip allanngortinneqarnissaanut siunnersuut, ilinniartitaanermut, kulturimut, timersornermut ilageeqarnermullu naalakkersuisumit Nivi Olsenimit (D) saqqummiunneqartoq, pilersaarutit malillugit novembarip pingajuanni aappassaaneerneqassaaq.

Meeqqat pisinnaatitaaffiinik illersuiniaqatigiiffik MIO Naalakkersuisunut kaammattueqqippoq. Meeqqat atuarfiat ineriartortinneqartariaqartoq isumaqataapput, Naalakkersuisunulli ammasumik allakkaminni allannguutit siunnersuutigineqartut naammattumik paasissutissanik tunngaveqarnersut apeqquserpaat.

Meeqqat atuarfiata nalilersorneqarnissaa nutaaq 2027-mi naammassineqartussaq aallartittoq, taamaattumillu aatsaat Naalakkersuisut siunnersuutaat Inatsisartuni suliarineqareerpat piareersimassasoq MIO allappoq.

Meeqqat ataasiaannarlutik atuartinneqartarput. Aaqqissuusseqqinnerit pingaaruteqartut kissaatigisatut sunniuteqanngitsut paasinarsippat meeqqat ullumikkut atuartut kingusinnerusukkut allanngortitsinissaminnut periarfissaqanngillat. Taamaammat annertuunik allannguisoqartinnagu meeqqat ilinniarnerannut, ingerlalluarnerannut, ineriartornerannut siunissamilu periarfissaannut qanoq sunniuteqassanersut paasitinneqartariaqarpoq. Aammattaaq allannguutit meeqqanut pitsaanerpaanissaat uppernarsarneqarsinnaasariaqarpoq, MIO allappoq.

Oqaatsinik ilinniartitsinermi allannguutit

Meeqqat atuarfianni atuartunut nukarlernut kalaallisut kisitsisilerinermilu atuartitsinerit pingaarnerutillugit atuartitsissutit ikinnerulernissaat meeqqat atuarfianni inatsisip nutaap kingunerissavaa.

AAMMA ATUARUK

Ilisimatusartut MIO-llu atuarfik pillugu inatsisissatut siunnersuut suli ernumanartoqartippaat

Danskisut tuluttutillu ilinniarneq aallarniutissaannanngussaaq, aatsaallu 4. klassimi ilinniarneqalissaaq.

Atuartut ilitsoqqussaralugu oqaasiisa oqaatsit allat ilinniarnissaannut tunngaviusutut nukittorsarnissaat isumaavoq.

MIO-p meeqqat ilitsoqqussaralugu oqaasiisa nukittorsarneqarnissaannik anguniagaq tapersersorpaa, oqaatsilli taakku kingusinnerusukkut ilinniarneqalerpata ilinniartut pitsaanerusumik ilinnialernissaata ilimaginissaanut naammattumik tunngavissaqanngitsoq isumaqarput.

Taamaammat ilinniartitsissutigineqartut qanoq ikkumaarnersut, meeqqallu oqaatsinik piginnaaneqalerniassammata 4. klassimiit ilinniartitsineq qanoq aaqqissuunneqartariaqarnersoq nukittorsarneqartariaqarnersorlu apeqqutigaat.

- Atuartitsinerup pitsaassusia meeqqallu oqaatsinik ineriartornerat atuarfiit ataasiakkaat piginnaanerinut pingaarnersiuinerannullu aalajangiisuujunnaassammata nuna tamakkerlugu erseqqissunik najoqqutassiaqartariaqarpoq.

MIO-p inuussutissarsiornermut ilinniakkat qulit kisimik kalaallisut ingerlanneqartut, Kalaallit Nunaannilu qaffasinnerusumik ilinniarfiit tamarmik kalaallisuinnaq ingerlanneqarsinnaanngitsut ilaatigut tikkuarpaa.

- Qaffasinnerusumik ilinniagaqassagaanni danskisut ilaannikkullu tuluttut oqalussinnaasariaqarpoq.

Ullut atuarfiusut ikilinerat meeqqamut pitsaanerussava?

Ukiup atuarfiusup sivikillinissaa aamma siunnersuutigineqarpoq, taamaalilluni 1. klassimiit 3. klassimut atuartut ullumikkut ulluni 200-niit 240-nut atuartinneqartartunut ullut atuarfiusut 180-init 200-nut ikilineqassapput.

Ukiumut ullut atuarfiusut qassiunissaat kommunit aalajangertarpaat.

Ullut atuarfiusut ikinnerusut atuarfinnut tamanut piumasaqaataajunnaarnissaat MIO-p aamma ernumassutigaa. Ullut atuarfiusut ikinneruppata meeqqanut pitsaanerussanerata misissorneqarnissaa amigaatigaat.

- Atuarfik meeqqanut amerlasuunut atuartitsinerinnaanngilaq. Aamma ataatsimoorfiullunilu, inersimasunut attaveqarluarnerullunilu, aaqqissuussamik ulluinnaqarfiullunilu peqataanissamut periarfissaqartitsivoq. Taamaammat ukioq atuarfiusoq sivikinnerusoq allanngoruni meeqqap ulluinnaanut, ilikkagaqarniarneranut. atugarissaarneranut ineriartorneranullu sunniuteqarsinnaavoq.

- Taama aalajangiitinnata meeqqanut kingunissai ilisimasariaqarpagut. Aalajangigassamut tunngatillugu ilisimasaqarnerunissaq pisariaqassappat tamanna siulliuttariaqarpoq, meeqqat illersuiniaqatigiiffiat allappoq.

Suliffimmik misiliinermi meeqqanut uppernarsaatit piumasarineqarnerat

Naalakkersuisut 9. aamma 10. klassini inuussutissarsiutitigut ilinniarfinnik atuartitsineq atuartut nalinginnaasumik ilinniagaqarnerannik ilasaatitut atulersinniarlugu aamma suliniuteqarput. Inuussutissarsiornermut tunngasunik atuartitsineq ilinniarfiit suleqatigalugit ingerlanneqassaaq.

MIO-p suliffimmik ilinniartitsinerit meeqqat ilinniagaqarnissaannut, atugarissaarnissaannut ilinniaqqinnissamullu periarfissaannut qanoq sunniuteqarsinnaanersut amigaatigaa.

- Ilaatigut tassaapput atuartut immikkoortiterneqarpallaarsinnaanerat, ilinniartitsinerup pitsaassusaa, ilinniartinneqarnermi tapersersorneqartarnissaq ilinniakkaminnillu ineriartortitsinissamut periarfissaqartuarnissaat.

Suliffimmik sungiusarneq ilinniarnermut siunertaqarluartariaqartoq toqqissisimanartumillu ingerlanneqartariaqartoq aamma isumaqarput.

- Inatsisissatut siunnersuutip atuartut 15-it inorlugit ukiullit kisiisa meeqqanut uppernarsaatinik piumasaqarfigai MIO-p ajornartorsiutigaa.

Taamaammat meeqqat pillugit uppernarsaatit ilinniarfinni tamani inersimasut 18-it inorlugit ukiulinnik toqqaannartumik attaveqarfiginniffiini aamma piumasaqaatigineqartalissasut kissaatigaat.

Naalakkersuisut inatsisissatut siunnersuutaat siullermeerneqarami Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliamut ingerlateqqinneqarpoq, sulili isumaliutissiisoqanngilaq. Siunnersuut maanna ullormut oqaluuserineqartussat naapertorlugit novembarip aqqarnani naammassillugu suliarineqassaaq.