Mittarfik isumannaallisaanikkut misissuinermi allannguigallarpoq

Malugiuk: Nassatanik misissueqqissaarutit marluk aappaata ingerlaqqilernissaa iluatsittoq, Greenland Sermitsiamut Airports ataasinngornermi nal. 13 missaani ilisimatitsivoq. Ingerlatseqatigiiffiup naatsorsuutigaa pissutsit taamaalillutik nalinginnaasumik ingerlaqqilernissaat, isumannaallisaanermilu misissuinerit sivisunerusumik ingerlanneqassanngitsut.

Teknikkikkut ajornartorsiutit pissutigalugit Nuummi timmisartoqarfimmut isernissamut ulluni makkunani utaqqisoqarsinnaavoq.

Greenland Airports nittartakkamini ilisimatitsivoq timmisartoqarfimmi nassatanik misissueqqissaarutit teknikkikkut ajoquteqartut.

Ajutoorneq pissutigalugu ilaasut aallartussat tamarmik utaqqiisaarummik allatut iliuuseqarfigineqarput.

– Tigummisassat tamarmik utaqqiisaasumik scannerimut allamut, tigummisanik ikinnerusunik misissuisinnaasumut, misissorneqassapput. Taamaattumik isumannaallisaanermi sivisunerusumik utaqqinissaq naatsorsuutigissavat, nalinginnaasumillu siusinnerusukkut mittarfimmut takkunnissat innersuussutigaarput, Greenland Airports allappoq.

Ajoqutaasup aaqqinneqarnissaanut teknikerit aggersarneqarput, sapaatip-akunneranilu matumani tikissapput.

Greenland Airportsip angalasut kajumissaarpai pissutsinut atatillugu arlalinnik eqqumaffiginneqqullugit. Tamanna ingerlatseqatigiiffiup nittartagaani atuarneqarsinnaavoq.