Mittarfiup ammarnissaa pissutigalugu qulimiguulimmik angallassinissamik isumaqatigiissut nutaaq isumaqatiginninniutigineqartoq

Air Greenland Naalakkersuisullu kiffartuussinissamut isumaqatigiissutaagallartussamik ukiumi ataatsimi atuuttussamik suliaqaleruttorput. Isumaqatigiissut Qaqortumi mittarfissap ammarneraniit ukiumi ataatsimi atuutissaaq.

Air Greenlandip neqeroorutini Ineqarnermut, Attaveqarnermut Nunaqarfinnullu Naalakkersuisoqarfimmut nassiutereerpaa, maannalu isumaqatigiinniartoqaleruttorpoq, naalakkersuisoqarfik tusagassiutitigut nalunaarummi ilisimatitsivoq.

2026-p ingerlanerani tamanut ammasumik neqerooruteqartitsisoqassaaq, tassani qulimiguulimmik angallassineq unammillerutigineqassaaq. Isumaqatigiissutit tamanut ammasumik neqerooruteqartitsinermit pissarsiarineqartussat kiffartuussinissamut isumaqatigiissutip utaqqiisaagallartup naanerani atuutilernissaat naatsorsuutigineqarlunilu ukiuni pingasuni 2027-miit 2030-mut atuuttussaapput.

Qaqortumi isumasioqatigiissitsiniartut

Naalakkersuisut Qaqortumi attaveqaasersuutit pillugit ukiup ingerlanerani isumasioqatigiissitsissapput. Najukkami innuttaasut, inuussutissarsiuteqartut suliffeqarfiillu taamaalillutik tikilluaqqusaallutillu ilaatigut makkununnga sunniuteqarsinnaassapput:

- Qaqortumi mittarfik ammarpat Kujataani angallannerup qanoq ikkumaarnera.

- Qulimiguulimmik umiarsuarmillu angallassineq qanoq pitsaanerpaamik aaqqissuunneqarsinnaanersoq.

Tassami Kujataani timmisartuussinermut tunngatillugu oqartussaasut aalajangiinissaanni innuttaasut sunniuteqarsinnaapput.

Naalakkersuisoq: Peqataasitsineq pingaartipparput

- Suliami matumani najukkami soqutigisat ilanngullugit pingaartikkiga erseqqissassallugu pingaaruteqarpoq.

- Taamaammat Qaqortumi attaveqaasersuutit pillugit isumasioqatigiinneq aaqqissuunneqarpoq, tassani najukkami soqutigisaqaqatigiit inuussutissarsiortullu siunissami angallannerup aaqqissuussaaneranut isummatik kissaatitillu avitseqatigiissutigissavaat, Isumaginninnermut, Suliffeqarnermut, Ineqarnermut, Attaveqarnermullu Naalakkersuisoq Aqqaluaq B. Egede (IA) oqarpoq.

Kujataani angallassinermut kiffartuussinissamut isumaqatigiissut Disko Line A/S-imit ingerlanneqarpoq, taannalu 2030-p tungaanut atuuppoq.