Múte B. Egede: - IA-p Folketingimut qinersinermi annersanngoqqinnera annertuumik pisussaaffiliivoq

Inuit Ataqatigiinni siulittaasoq ullaaq manna sianerfigigaanni partiimi nuannassimaneq suli tusaaneqarsinnaavoq. Múte B. Egedemi iggiarluppoq. 

- Nipera eqqumiilaarpat, ippassaq nillipiloortaqattaarnermik, tassannga tunngaveqarpoq. Napparsimanngikkaluarpunga, Múte B. Egede illarlunilu oqarpoq. 

Inuit Ataqatigiit Folketingimi ilaasortaatitaqarnertik paariinnassavaat. Folketingimut 2022-mi qinersinermi partiit annersaanut tullersortaapput, taamani Siumut siuttuugami. Inuit Ataqatigiilli partiini annersanngoqqimmata siulittaasoq nuannaaqaaq. 

- Nuannaarutigaara, tulluusimaarutigaara partiitut aalajaatsuunerput Folketingimi sulinermi, kisianni aamma nuna tamakkerlugu politikkimi ingerlataqarnitsinni, attallugu ingerlatsinikuuvugut, sulinittalu tatigineqarnera taama annertutigimmat tulluusimaarutigaara. Kisianni aamma annertuumik pisussaaffiliisoq oqaatigissavara. 

Ajugaaneq isiginngitsuusaagassaanngitsoq 

Inuit Ataqatigiit Nuummi katersortarfimmi unnuaq nuannaffiat, Inatsisartunut siorna qinersinermut sanilliullugu uummaarinneruvoq. Inatsisartunut qinersinerup unnukkuani siorna partiip partiit annersaata pingajuattut inissinnera peqqutigalugu nuannaffiusoq inukisaaqigami. 

Taamatut inissinnersi sumut atorsinnaavisiuk?

- Siullertut Folketingimut tunngavoq, Folketingimilu partiitut anginerpaatut inissisimanerput aallaavigalugu ajunnginnerpaarpaaq, pitsaanerpaarpaaq inuillu atugaanut siuariartuutaanissamik sulinissatsinnut sakkussarivarput. Soorunami Folketingimut qinigaatitaqartut aappai peqatigalugit. 

- Kisianni aamma soorunami nuna tamakkerlugu suleriaqqinnissatsinnut isiginngitsuusaarsinnaanngilarput, katersuuffiusugut taama annertutigisumik. 

Naaja naalakkersuisuujunnaassaaq: - Pilersaaruteqarpugut

Naaja H. Nathanielsenip naalakkersuisuujutigaluni Folketingimut qineqqusaarnera isornartorsiorneqarlunilu isummersorfigineqarsimaqaaq. Maanna tassa naalakkersuisuujunnaarluni Danmarkimut suliartortussanngorpoq. 

- Aallaqqaataaniilli pilersaaruteqarpugut. Naaja sassassalluni aalajangermalli pilersaarusiornikuuvugut. Imaalisoqarpat taava imaaliussuugut. 

Taava inummik aalajangersimasumik innersuussassaqareerpusi? 

- Siunnerfeqareerpugut, siulersuisuunitta tamanna piffissami aggersumi  isummerfigiumaarpaat. Tassanngaanniit tassa ingerlariaqqissuugut. 

Qinigaasup Danmarkimukarnissaa piaartumik pissasoq Múte B. Egedep oqaatigaa. Siullermilli maani suliassaqarput. 

- Ullumikkut issiaqatigiinnigut partiip iluani, kisianni aamma partiit qinigaatitaqartut, taamatullu aamma partiit allat qinigaatitaqanngitsooraluartut kiinnerfiginissaat ullumikkut pilersaarutigaarput.

Danmarkimi naalakkersuisoqatigiilersussat kikkuussaneri eqqoriaruminaakkallarpoq. 

- Assut siapput partiit qinersisit akunneranni taamaammallu imaaliinnavilluni amerlanerussusiisoqarsinnaanera illuani illuanilu pilersinneqaruminaatsupilorujussoorpasippoq. Taamaammallu nunatsinnut ajortumik sunniuteqannginnissaa suliassaqarfiuvoq, taanna qulakkiigassarivarput, Múte B. Egede taama naggasiivoq.