Naaja piumasaqartoq: Sisimiuni politiit amerlanerusut
Pinerlunnerit amerliartorfiini politiit sulinerat annertusarneqartariaqarpoq. Maanna iliuuseqartoqartariaqarpoq, inatsisit atuutsinneqarnerannut naalakkersuisoq Naaja H. Nathanielsen Inatsiseqarnermut ministereqarfimmut taama piumasaqarpoq.
- Suliassamik nalunaarutiginninneq mianernartuusinnaavoq artornartuusinnaallunilu, aamma nammineq nalunaarutiginninnerup tutsuiginartumik sukkasuumillu suliarineqarnissaanik tatiginninnissamik piumasaqarfiusoq, Naaja H. Nathanielsen oqarpoq.
Toqqorsivimmit: Oscar Scott Carl
Kalaallit Nunaanni 2025-mi pinerlunnerit pillugit nalunaarusiaq, Kalaallit Nunaanni Politiit qanittukkut saqqummersitaat, inatsisit atuutsinneqarneranut naalakkersuisup Naaja H. Nathanielsenip arlalinnik ernumassutaasunik imaqartoq oqaatigaa.
- Inuttaasut politiinut tatiginnissappata, nalunaarutiginninnerit piffissaagallartillugu pinerluttoqarsimaneranik paasiniaaffigineqarnissaat aamma suliat pisariaqartinneqartumik peqqissaartumik suliarineqarnissaat, pingaaruteqarluinnarpoq, Naaja H. Nathanielsen tusagassiuutitigut nalunaarummi oqarpoq.
Pissutsit piviusut
Politiit ukiumoortumik nalunaarusiaanni uku tikkuarpai:
- Suliat 47 procentii unitsiinnarneqarput.
- 2025-imi suliat unitsiinnarneqartut 61 procentii uppernarsaatit eqqartuussuteqarnissamut naammannginnerat pissutigalugu naammassineqarsimapput.
- Suliat 21 procentii paasineqanngitsutut unitsiinnarneqarput.
- Suliat 10 procentii pisoqalivallaarnerup kingunerisaanik unitsiinnarneqarlutik.
- Kisitsisit taakku najukkani najuunnissap annertunerusumik pisariaqartinneqarneranik aamma pinerluttoqarsimaneranik paasiniaanermut isumalluutit amerlanersut atorneqarnissaannut salliutitsinissamik tunngaviliisut, Naalakkersuisut isumaqarput.
Naaja H. Nathanielsenip ”Sisimiuni nalunaarutiginninnerit amerleriarujussuarsimanerat, politeeqarfimmilu sulisut amerleriarnerannik kinguneqannginnera” uissuumissutigaa. Kangaatsiami politeeqarfeqalernissaanik kissaatini Inatsiseqarnermut ministereqarfimmiit siusinnerusukkut itigartitsissutaanikoq aamma uteqqippaa.
Kissaat saqqummiuteqqinneqartoq
- Taamaammat Kangaatsiami politeeqarfeqarnissaanik kissaat Naalakkersuisut qanittukkut saqqummiuteqqissimavaat aamma Sisimiuni politeeqarfimmi sulisut maannakkorpiaq ataavartumik amerlineqarnissaanik pisariaqartitsisoqartoq, aallaqqaataanilu immikkut inuttalersuinikkut aaqqinneqartariaqartoq, Inatsiseqarnermut ministereqarfimmut allaaserisimallugu.
Naaja H. Nathanielsenip qallunaat politiivinut ukiunut arlalinnut isumaqatigiissut, ilaatigut inuup ataatsip ukiumut suliarisinnaasaasa naatsorsorneqarneranni sulisunik 31-nik amerlineqarnissaannik imaqartoq ataqqivaa.
- Kisianni suliat unitsiinnarneqartartut, ingammik suliat pisoqalisoortitsineq pissutigalugu unitsiinnarneqartartut appartinneqarnissaat, Naalakkersuisut sinnerlugit aamma kimigiisiutigissavara. Sumiiffinni pinerluttuliornerit amerliartorfianni, sukkasuumik sulisut amerlineqarnissaat taamaammat aamma pisariaqartinneqarpoq. Sulisut amerlineqarnissaannut isumaqatigiissummik isumaqatigiissusiornissap utaqqineqarnissaa pitsaasumik kinguneqarnavianngilaq. Tamanna pisariaqartitsinerit paasineqartut tunngavigalugit pissaaq, Naaja H. Nathanielsen naqissusiivoq, nangipporlu:
Tatiginninneq pineqarpoq
- Sisimiuni pisariaqartitsineq erseqqissumik uppernarsaasersorneqarpoq. Kisianni Sisimiut kisiartaanngillat sumiiffimmi annertunerusumik najuuttoqarnissaanik pisariaqartitsiffiusut aamma piumasaqarfiusut. Suliassamik nalunaarutiginninneq mianernartuusinnaavoq artornartuusinnaallunilu, aamma nammineq nalunaarutiginninnerup tutsuiginartumik sukkasuumillu suliarineqarnissaanik tatiginninnissamik piumasaqarfiusoq. Taamaammat isumaqatigiissusiornerup isumaqatigiissutigineqartup atortuulersinneqarnissaa, kisianni aamma piffissami qanittumi politiit najukkani najuunnissaasa aamma politiit naammannissaasa qulakkeerneqarnissaannut alloriartoqarnissaa, qilanaaraara.
