Naalakkersuisoq: Kujalliup borgmesteriata kissaataa naapertuutinngilaq

Kommunit ataatsimoortumik tapiissutinik ataasiakkaarlutik Aningaasaqarnermut Naalakkersuisumut isumaqatigiinniartarnissaat pillugu, Kommuni Kujallermi borgmesterip, Malene Vahl Rasmussenip (D), kissaataa, Aningaasaqarnermut Naalakkersuisup, Aqqaluaq B. Egedep (IA), isumassarsiatsialattut isiginngilaa.

- Isumaqarpunga ataatsimoortumik tapiissutit pillugit kommunit ataasiakkaarlugit isumaqatiginninniarfigissallugit naapertuutinngitsoq. Ataatsimoortumik tapiissutit ataatsimoorluni aningaasaqarnikkut aaqqissuussaapput, pingaaruteqarporlu isumaqatiginninniarnerit ataatsimut ammasumillu sinaakkuteqarnissai, Naalakkersuisoq Sermitsiamut allakkatigut akissuteqarpoq.

AAMMA ATUARUK:

Borgmesteri: Ajornartorsioreertugut ajornartorsiortinneruleriaannaavaatigut

Sermitsiap Naalakkersuisoq aggutsip naaneranit apersorumallugu saaffigisarpaa, ullorli manna tikillugu tamanna pinngilaq. Naalakkersuisoqarfiup Sermitsiamut ilisimatitsinera naapertorlugu Naalakkersuisoq akisussaasoq ulluni makkunani ulapputeqangaatsiarpoq, taamaammat Sermitsiamit apersorneqarnissaa periarfissaanani. Naalakkersuisorli allakkatigut akissutinik Sermitsiamut nassiussivoq.

Kommunit Namminersorlutik Oqartussanit ataatsimoortumik tapiissutinik pissarsisarput. Tapiissutit kommuninut ataasiakkaanut qanoq agguataarneqassanersut, Inatsisartunut ilaasortat aningaasanut inatsimmik akuersinnginneranni inissinneqartarpoq. Aningaasat qanoq agguataarneqarnissaat kommunini tallimani borgmesterit, Aningaasaqarnermullu Naalakkersuisup, arfiniliullutik, akunnerminni ataatsimoorlutik isumaqatigiinniutigisarpaat

Isumaqatigiinniarnermi suleriuseq taanna Kommune Kujalliup borgmesteriata iluarinagu Sermitsiamut siusinnerusukkut oqaatigaa. 

- Kommunini ataasiakkaani atukkagut assigiinngissuteqaqimmata, Malene Vahl Rasmussen siusinnerusukkut oqarpoq.

Taassuma kommunit ataasiakkaarlutik naalakkersuisumut isumaqatigiinniartarnissaat angorusukkaluarpaa. Maannamulli tamanna itigartinneqarpoq.

- Kommuninili ataasiakkaani pissutsit aalajangersimasut assigiinngitsullu qaqinneqarnissaat oqaloqatigiissutigineqarnissaallu suli ammavoq, Naalakkersuisoq allappoq.

Tapiissutit ikilineqarnissaat siunnersuutaasoq

Naalakkersuisut aningaasanut aappaagumut inatsisissatut siunnersuutaat, Aningaasaqarnermut Naalakkersuisup aggustip 20-ni saqqummiuppaa. Siunnersuummi tassani kommuninut ataatsimoortumik tapiissutit ukioq manna 1,9 milliardit koruunit sinneqalaartut aappaagumut 51 millionit koruuninik ikinnerulernissaat Naalakkersuisut siunnersuutigaat.

Tamanna Kommune Kujallermut imaannaanngitsumik sunniuteqarsinnaasoq borgmesterip siusinnerusukkut aamma oqaatigaa.

 - Imatut kinguneqarsinnaavoq inatsisitigut pisussaaffigut suliassat naammassisinnaannginnerannik. Naalakkersuisut Inatsisartullu kommuninut akisusaaffilersuisarput suut kommuninit suliarineqassanersut, tamakkualu tassaakkajupput innuttaasunut qanimut sullissinerit. Aningaasalli tunniunneqartartut ikiliartortillugit inatsisilli amerliartortillugit tamanna imminut ataqatigiinngilaq. Tamanna ajuusaarnartorujussuuvoq, Malene Vahl Rasmussen Sermitsiamut siusinnerusukkut oqarpoq.

Ernummatillu tamakkua isumaqatigiinniarnerni eqqartorneqarsinnaasut naalakkersuisoq allappoq.

- Borgmesterip kommunit assigiinngissutai itinerusumik eqqarsaatigineqarnissaannik kissaataa aamma paasisinnaavara. Kommunit ataasiakkaat immikkut ilungersuutai oqaloqatigiinnerni ilaappata pissusissamisoorpoq, Aqqaluaq B. Egede allappoq.