Naalakkersuisoq Naalakkersuisut imigassamik matusineranni: Killilersuinermut naaggaartuuvunga  

Isumaginninnermut, Suliffeqarnermut Ilaqutariinnut Nunamullu Namminermut Naalakkersuisup, Maritha Brobergip (A), Naalakkersuisut Kommune Kujallermi imigassamik aalakoornartortalimmik tuniniaanermut sassaalliinermullu piffissamik killiliinatik tallimanngornermi aalajangernerat isumaqatigineraa apeqquserneqassappat pissutissaqarsinnaavoq.

Isumaginninnermut, Suliffeqarnermut Ilaqutariinnut Nunamullu Namminermut Naalakkersuisoq, Maritha Broberg, Naalakkersuisut Kommune Kujallermi imigassamik tuniniaanerup sassaallernerullu matunissaannik aalajangiinerannut isumaqataanngitsutut paasineqarsinnaasumik Facebookkimi siammarterneqartumut allataqarpoq.

Naalakkersuisoq: Killilersuinermut naaggaartuuvunga

Isumaginninnermut, Suliffeqarnermut Ilaqutariinnut Nunamullu Namminermut Naalakkersuisup, Naalakkersuisut imigassamik tuniniaanermik sassaalliinermillu akuersissuteqarnerup kommunimi unitsikkallarneqarnera pillugu, isorinnittumik allagartalerlugu ingerlateqqitaq, ima oqaaseqarfissami allataqarfigaa:

- Uanga aamma killilersuinermut naaggaartuuvunga, Maritha Broberg sapaatit akunnerisa naaneranni allappoq.

Sermitsiap paasissutissaatai naapertorlugit Maritha Brobergip taama allannini maanna peersimavaa. 

Naalakkersuisut Siulittaasuat akinngisaminut innersuussisoq

Sermitsiap Isumaginninnermut, Suliffeqarnermut Ilaqutariinnut Nunamullu Namminermut Naalakkersuisoqarfik Naalakkersuisumik sammisaq pillugu apersuerunneq tunngavigalugu attaveqarfigaa. Saaffiginnissut tigugitsik, Naalakkersuisumullu akisussaasumut saaffiginnissut saqqummiunneqassasoq, Sermitsiarlu saaffiginnissut pillugu uterfigineqassasoq tassanngaanniit neriorsuutaavoq. Allaaserisalli suliarineqarnerani tassanngaanniit akisoqanngilaq. Sermitsiaq Naalakkersuisumik apersuerusulluni suli sulissuteqarpoq.

Sermitsiap Naalakkersuisut Siulittaasuat, Jens Frederik Nielsen (D), Isumaginninnermut, Suliffeqarnermut Ilaqutariinnut Nunamullu Namminermut Naalakkersuisup allataa pillugu attaveqarfigaa. Naalakkersuisut Siulittaasuata Naalakkersuisunut ilaasortap allataa toqqaannartumik qisuariarfiginngilaa. 

Apeqqut: Naalakkersuisut Siulittaasuata Isumaginninnermut, Suliffeqarnermut Ilaqutariinnut Nunamullu Namminermut Naalakkersuisup, Kommune Kujallermi imigassamik nioqquteqarnerup sassaallernerullu matugallarneqarneranut qisuariaataa qanoq oqaasissaqarfigaa?

- Kommune Kujalliup imigassamik tuniniaanerup sassaallernerullu matunissaanik piumasarinikuusaa Naalakkersuisut taperserlugu iliuuseqarfigaat, Naalakkersuisut Siulittaasuat allappoq.

Taassumali Maritha Brobergip allataa toqqaannartumik qisuariarfiginngilaa aamma Sermitsiamit aperineqaqqikkaluarnermi kingorna akissutini apeqqummik akinninngitsoq innersuussutigiinnarpaa.

Inerteqquteqalerneq

Naalakkersuisuit Kommune Kujallermi imigassanik aalakoornartortalinnik tuniniaanermut sassaalliinermullu piffissamik killiliinatik tallimanngornermi unnukkut inerteqquteqalerput. Kommune Kujallermi kommunalbestyrelsi tamatumunnga qinnuteqartuusoq, tusagassiorfinnut nalunaarummi ilisimatitsissutaavoq.  

- Imigassanik aalakoornartortalinnik tuniniaanerup sassaalliinerullu utaqqiisaasumik
unitsinneqarnerata siunertaraa meeqqat atugarisaanut innuttaasullu isumannaatsuunissaannut ulorianartorsiortitsinerup piuneerutsinneqarnissaa.

- Aammattaaq Kommune Kujalleq nalunaarpoq imigassanik aalakoornartortalinnik atuinerup toqqaannartumik kingunerisaanik ajunaarnartunik pisoqarnerisa kingorna kommunimi innuttaasut akornanni piffissami kingullermi annertuumik ernumanermik toqqissisimannginnermillu pilersitsisimammat, Peqqissutsimut inunnullu Innarluutilinnut Naalakkersuisoqarfik tallimanngornermi unnukkut allappoq.