Naalakkersuisoqarfimmi pisortatut atorfeqarsimasoq isumaginninnermut pisortanngussaaq
Isumaginninnermut Naalakkersuisuusimasoq Martha Abelsen Kommune Kujallermi isumaginninnermut pisortanngussaaq. Atorfik arlaleriarluni inuttassarsiuunneqartarsimasoq juulip aallaqqaataani atorfinitsinneqassaaq.
Kommune Kujalleq A-skatterinik piffissaq eqqorlugu akiliisafsimannginenra pillugu suliami apriilip 28-ani nalunaaqutaq qulinut eqqartuussisoqassaaq.
Toqqorsivimmit assi: Trine Juncher Jørgensen
Kommune Kujalleq maanna piginnaaneqarluartumik isumaginninnermut pisortaqalerpoq, kommunimi pisortaaneq Randi Vestergaard Evaldsen tusagassiuutinut nalunaarummi taama oqarpoq.
Martha Abelsen isumaginninnermut tunngasunik ukiorpassuarni suliaqartarpoq, ilaatigut naalakkersuisutut kingusinnerusukkullu naalakkersuisoqarfimmi tassani pisortatut.
Kommune Kujallermi isumaginninnermut pisortatut maanna juulip aallaqqaataani 2026-mi atorfinissaaq.
- Uannut pingaaruteqarsimavoq inuk uanga sammiviginiakkannut ingerlaqataasinnaasoq ingerlaqataajumasorlu nassaarissallugu - tassa inuk kommunimik ineriartortitseqataarusuttoq kommunitsinnillu nuanneqisumik Nunatsinni kommunini pitsaanerpaanngortitsisinnaasoq. Inuk erseqqissunik anguniagalik aqutsisutullu erseqqissunik piginnaasalik, Randi Vestergaard Evaldsen oqarpoq.
Aqutsineq ersarissoq pisariaqartinneqarpoq
- Marthap atorfik tigussavaa aqutsisumik erseqqissumik, aaqqissugaanermik, nutaamik isumaliornermik peqqissaarnermillu pisariaqartitsiviusoq. Martha suliamut piginnaasaqarluarpoq assullu misilittagaqarluni, taakkulu Kommune Kujallermi assorsuaq nuannaarutigalugillu iluaqutigissavavut. Ukiorpassuarni Martha isumaginninnermi sulisimavoq - sulisutut, politikkikkut aqutsisutullu - taamaammat arnaq taanna suliffimmut toqqassallugu naleqqulluinnarpoq.
- Isumaginninnermik ingerlatsinerup pitsanngorsarnissaa suleqatigisassakka peqatigalugit qilanaaraara, Martha Abelsen oqarpoq.
Assi: Kommune Kujalleq
Kommune Kujallermi isumaginninnerup iluani annertuumik unammilligassaqarpoq. 2024-p naaneraniit Namminersorlutik Oqartussat isumaginninnermi suliassat ilaat tiguneqarput. Taamani kommunimi meeqqat inuusuttullu pillugit suliat 857-iupput, aamma innarluutillit pillugit suliat 300-usut, kommunip nammineq naatsorsuisimanera naapertorlugu.
- Nuannaarutigaara atorfimmut pingaarutilimmut innersuunneqarama. Suliassaqarfik innuttaasunit amerlasuunik malinnaaffigilluarneqartup inerisaaffigeqataanissaanut nukittorsaaqataaffiginissaanullu piareersimallunga qilanaarlungalu suleqataaffigissavara. Suleqatissat peqatigalugit isumaginnittoqarfiup qaffasissumik kiffartuusseqqissinnaanngornissaanut kivitseqataanissara qilanaaraara, Martha Abelsen oqarpoq.
