Naalakkersuisut kikkut 45 millionit koruunit atorlugit ikiorsiissutinnassanersut suli aalajanginngitsut

Aningaasaqarnermut Naalakkersuisoq, Aqqaluaq B. Egede (IA) danskit aningaasaqarnermut ministeriannik, Peter Hummelgaardimik, isumaqatigiissummik 1.2 milliardit koruuninik aningaasartalimmik septembarip 15-anni atsioqateqarpoq. Aningaasanik taakkunannga 45 millionit koruunit, Kalaallit Nunaanni innuttaasunut ikiorsiissutitut taallugit pissarsitinneqartussatut toqqarneqartussanut, toqqaannartumik tunniunneqassapput.

AAMMA ATUARUK:

Innuttaasut inuussutissanut tapiserataannaasut

Innuttaasulli sorliit aningaasanik pissarsissanersut suli nalunarpoq. Naalakkersuisummi kikkut ikiorsiissutinnassanersut, tunngavissat suut atuutissanersut aaqqissuussinerillu qanoq aqunneqassanersut pillugit isummeqqaassasut, Aningaasaqarnermut Naalakkersuisoq, Aqqaluaq B. Egede, Sermitsiamut allakkatigut akissuteqarpoq.

- Ikiorsiissutinut tunngatillugu naalakkersuisut tunngavissanik aaqqissuussinerullu aqunneqarnissaanut tunngavissanik aalajangersaaqqaassapput, piffissarlu sivisunngitsoq qaangiuppat tamanna pillugu annertunerusumik oqaaseqarsinnaanissarput naatsorsuutigaarput, Naalakkersuisoq allappoq.

Naalakkersuisup isummernissartik, taassumalu kingorna nalunaaruteqarnissartik, sapaatit akunnerisa marluk pingasulluunniit akornanni pinissaaa naatsorsuutigaa.

Sermitsiaq inuussutissanut tapimik 45 millionit koruunit nalinganut tunniusseratarsinnaaneq pillugu upernaaq maajip 26-ani allaaserisaqarpoq. Tamanna Naalakkersuisut politikkikkut aningaasaqarneq pillugu nalunaarutaanni allassimavoq. Ikiorsiissummik maanna taagorneqartoq Naalakkersuisunit inuussutissanut tapimik taamani taagorneqaqqaarpoq.

Assigusumik aaqqissuussisoqartoq

Inuussutissanut tapit Danmarkimi takornartaanngillat. Inuussutissanut tapiissut 4,5 milliardit koruuninik aningaasartalik, Danmarkimi partiit amerlanerussutillit, Danmarkimi ukioq manna najugalinnut agguaanneqassasoq, ukioq manna januaari naalersoq akueraat.

Inuussutissanut tapiissut ataasiartumik akileraarusernagu tunniunneqarpoq. Tapiinermi inuussutissat ukiuni kingullerni akisunerulernerat tunngaviuvoq.